ಸಂಭ್ರಮದಿಂದ ಕ್ರಿಸ್​ಮಸ್​ ಆಚರಣೆ

ವಿಜಯವಾಣಿ ಸುದ್ದಿಜಾಲ ಧಾರವಾಡ

ಕ್ರೈಸ್ತ ಸಮುದಾಯದವರು ನಗರದಲ್ಲಿ ಬುಧವಾರ ಕ್ರಿಸ್​ಮಸ್​ ಹಬ್ಬವನ್ನು ಸಂಭ್ರಮ ಸಡಗರದಿಂದ ಆಚರಿಸಿದರು.

ಬೆಳಗ್ಗೆಯೇ ಕುಟುಂಬ ಸಮೇತರಾಗಿ ಚರ್ಚಗೆ ತೆರಳಿ ಶ್ರದ್ಧಾ ಭಕ್ತಿಯಿಂದ ಪ್ರಾರ್ಥನೆ ಸಲ್ಲಿಸಿದರು. ಯೇಸುವಿನ ಕುರಿತು ಗೀತೆಗಳನ್ನು ಹಾಡಿದರು. ಧರ್ಮ ಗುರುಗಳ ಹಬ್ಬದ ಸಂದೇಶವನ್ನು ಆಲಿಸಿ ಶುಭಾಶಯ ವಿನಿಮಯ ಮಾಡಿಕೊಂಡರು.

ನಗರದ ಸೇಂಟ್​ ಜೋಸೆಫ್ ಚರ್ಚ್​, ಹೆಬಿಕ್​ ಮೆಮೋರಿಯಲ್​ ಚರ್ಚ, ಹೋಲಿ ಕ್ರಾಸ್​ ಚರ್ಚ್​, ನಿರ್ಮಲ ನಗರ, ಕಲ್ಯಾಣ ನಗರದ ಚರ್ಚ್​ಗಳು ಸೇರಿ ಎಲ್ಲ ಚರ್ಚ್​ಗಳಲ್ಲಿ ವಿಶೇಷ ದೀಪಾಲಂಕಾರ ಮಾಡಲಾಗಿತ್ತು. ಹೆಬಿಕ್​ ಸ್ಮಾರಕ ದೇವಾಲಯದಲ್ಲಿ ಬಾಲ ಯೇಸುವಿನ ಜನ್ಮ ವೃತ್ತಾಂತ ಸಾರುವ ಗೋದಲಿ ಎಲ್ಲರ ಗಮನ ಸೆಳೆಯಿತು.

ಹೆಬಿಕ್​ ಮೆಮೋರಿಯಲ್​ ಚರ್ಚ್​ನಲ್ಲಿ ಬಿಷೋಪ್​ ರೈ.ರೆ. ಮಾರ್ಟಿನ್ ಬೋರ್ಗಾಯಿ ಅವರು ಕ್ರಿಸ್​ಮಸ್​ ಸಂದೇಶ ಸಾರುವ ಮೂಲಕ ಯೇಸು ಎಲ್ಲರೂ ಒಳ್ಳೆಯದನ್ನು ಮಾಡಲಿ ಎಂದು ಹಾರೈಸಿದರು.