ಸಿಎಂ ಸಿದ್ದರಾಮಯ್ಯ ಕಚೇರಿ ಮೇಲೆ ಕ್ರೈಸ್ತ ಮಿಷನರಿ ನೆರಳು...

ಮಾಜಿ ಸಚಿವ ವಿ.ಸುನೀಲಕುಮಾರ್​ ಟೀಕೆ

ಗಣತಿಯ ಅಗತ್ಯತೆಯ ಸ್ಪಷ್ಟನೆಗೆ ಒತ್ತಾಯ

ವಿಜಯವಾಣಿ ಸುದ್ದಿಜಾಲ ಉಡುಪಿ

ರಾಜ್ಯ ಸರ್ಕಾರ ಹಾಗೂ ಹಿಂದುಳಿದ ವರ್ಗಗಳ ಆಯೋಗ ತರಾತುರಿಯಲ್ಲಿ, ಪೂರ್ವಸಿದ್ಧತೆ ಇಲ್ಲದ ಗಣತಿ ಮಾಡಲು ಹೊರಟಿದೆ. 47 ಹಿಂದು ಉಪಜಾತಿಯೊಂದಿಗೆ 'ಕ್ರಿಶ್ಚಿಯನ್​' ಜೋಡಿಸಲಾಗಿದೆ. ಈ ಬಗ್ಗೆ ವಿರೋಧವಿದ್ದರೂ ಸಿಎಂ ಸಿದ್ದರಾಮಯ್ಯ ಅಧಿಕೃತ ಪ್ರಕಟಣೆ ಹೊರಡಿಸಿಲ್ಲ. ಕ್ರೈಸ್ತ ಮಿಷನರಿ ನೆರಳು ಸಿಎಂ ಕಚೇರಿ ಮೇಲೆ ಬಿದ್ದಿದೆ. ಹೀಗಾಗಿ ಮೂಲ ಸಿದ್ದರಾಮಯ್ಯ ನಮಗೆ ಮರೆತು ಹೋಗಿದ್ದಾರೆ ಎಂದು ಮಾಜಿ ಸಚಿವ ವಿ.ಸುನೀಲಕುಮಾರ್​ ಟೀಕಿಸಿದ್ದಾರೆ.

ಉಡುಪಿಯಲ್ಲಿ ಸೆಪ್ಟೆಂಬರ್​ 21ರಂದು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಸಿಎಂ ಒತ್ತಾಯಕ್ಕೆ ಮಣಿದು ಗಣತಿ ನಡೆಯಲಿದೆ. ಮರುಚಿಂತನೆಯೊಂದಿಗೆ ಜಾತಿ ಗಣತಿ ಮುಂದೂಡಬೇಕು. ಅಗತ್ಯತೆ ಅಥವಾ ಅನಿವಾರ್ಯತೆಯ ಕುರಿತು ಎಲ್ಲರ ಅಭಿಪ್ರಾಯ ಪಡೆಯಬೇಕು ಎಂದರು.

ಸಿಎಂ ಈಗ ಫಾದರ್​ ಸಿದ್ದರಾಮಯ್ಯ

ಬಿಜೆಪಿಯಿಂದ ಹೋರಾಟ ನಿರಂತರ

ಸಿದ್ದರಾಮಯ್ಯ ಅವರು ಕುಲ ಶಾಸ್ತ್ರದ ಅಧ್ಯಯನ ಮಾಡಬೇಕು. ಸಮೀಕ್ಷೆ ಹೆಸರಲ್ಲಿ ಸಮಾಜ ಒಡೆಯುತ್ತಿರುವ ಅವರು ಸಂವಿಧಾನವನ್ನು ಹೇಗೆ ಅರ್ಥ ಮಾಡಿಕೊಂಡಿದ್ದಾರೆ? ಕೂಡಲೇ ರಾಜ್ಯ ಸರ್ಕಾರ ಕ್ರಿಶ್ಚಿಯನ್​ ಹಾಗೂ 75 ಉಪಜಾತಿಯ ಬಗ್ಗೆ ಅಧಿಕೃತ ಪ್ರಕಟಣೆ ಹೊರಡಿಸಬೇಕು. ಹಿಂದು ಜಾತಿಯೊಂದಿಗೆ ಕ್ರಿಶ್ಚಿಯನ್​ ಹೆಸರು ತೆಗೆಯುವವರೆಗೆ ರಾಜ್ಯವ್ಯಾಪಿ ಪ್ರತಿ ತಾಲೂಕಿನಲ್ಲೂ ಬಿಜೆಪಿಯಿಂದ ಹೋರಾಟ ನಡೆಸುತ್ತೇವೆಂದು ಸುನೀಲಕುಮಾರ್​ ಎಚ್ಚರಿಕೆ ನೀಡಿದರು.

ಮಠಾಧೀಶರ ಮನ ಒಲಿಸುತ್ತೇವೆ

ಲಿಂಗಾಯತ ಧರ್ಮ ಪ್ರತ್ಯೇಕ ಚರ್ಚೆ ವಿಚಾರದಲ್ಲಿ ಬಿಜೆಪಿಗೆ ಸ್ಪಷ್ಟವಾದ ನಿಲುವಿದೆ. ಸಮೀಕ್ಷೆಯಲ್ಲಿ ಧರ್ಮದ ಕೋಷ್ಟಕದಲ್ಲಿ ಹಿಂದು ಬರೆಸಬೇಕು ಎಂದು ರಾಜ್ಯಾಧ್ಯಕ್ಷ ವಿಜಯೇಂದ್ರ ಅವರೂ ಹೇಳಿದ್ದಾರೆ. ಈ ವಿಚಾರದಲ್ಲಿ ಮಠಾಧೀಶರು ಹಾಗೂ ಲಿಂಗಾಯತ ನಾಯಕರ ಮನ ಒಲಿಸುತ್ತೇವೆ ಎಂದು ಸುನೀಲಕುಮಾರ್​ ತಿಳಿಸಿದರು.