ಕೋನಸಾಗರದ ಉಣ್ಣೆ ಕೈಮಗ್ಗ ನೇಕಾರರ ಸಂಘಕ್ಕೆ ತೀವ್ರ ಸ್ಪರ್ಧೆ

ಕೋನಸಾಗರ ಉಣ್ಣೆ ಕೈಮಗ್ಗ ನೇಕಾರರ ಸಹಕಾರ ಸಂಘದ ಕಚೇರಿಯ ಸೂಚನಾ ಫಲಕದಲ್ಲಿ ಪ್ರಕಟಿಸಿರುವ ಮತದಾರರ ಪಟ್ಟಿಯನ್ನು ಮತದಾರರು ಗಮನಿಸುತ್ತಿರುವುದು.

Published on:

15 Nov 2025, 5:58 pm

ಪ್ರಮುಖ ಮುಖ್ಯಾಂಶಗಳು

8 ಸ್ಥಾನಗಳಿಗೆ 21 ಸ್ಪರ್ಧಿಗಳು ಕಣದಲ್ಲಿ
ಪ್ರಚಾರ ಭರಾಟೆ ಜೋರು
6 ದಶಕಗಳ ಬಳಿಕ ಚುನಾವಣೆ ಕಣ

ಕೊಂಡ್ಲಹಳ್ಳಿ: ಮೊಳಕಾಲ್ಮೂರು ತಾಲೂಕಿನ ಕೋನಸಾಗರ ಗ್ರಾಮದ ಉಣ್ಣೆ ಕೈಮಗ್ಗ ನೇಕಾರರ ಸಹಕಾರ ಸಂಘದ ನಿರ್ದೇಶಕರ ಸ್ಥಾನಗಳಿಗೆ ಭಾನುವಾರ ಚುನಾವಣೆ ನಡೆಯಲಿದ್ದು, ಚುನಾವಣಾ ಅಖಾಡದಲ್ಲಿ ಪ್ರಚಾರದ ಭರಾಟೆ ಜೋರಾಗಿದೆ.

ಸ್ಥಳೀಯ ಮುಖಂಡರ ಚಿತ್ತ ಸಹಕಾರ ಸಂಘದತ್ತ

ಹಲವು ವರ್ಷಗಳಿಂದ ಸ್ಥಳೀಯ ಸಂಸ್ಥೆಗಳ (ಗ್ರಾಮ ಪಂಚಾಯಿತಿ) ಚುನಾವಣೆಗಳು ನಡೆಯದೆ ಇರುವುದು ರಾಜಕೀಯ ಮುಖಂಡರಲ್ಲಿ ಬೇಸರ ಮೂಡಿಸಿದೆ.

ಈ ನಿರಾಸೆಯಿಂದ ವಿಚಲಿತರಾಗದೆ, ಅವರು ಇದೀಗ ತಮ್ಮ ಸಂಪೂರ್ಣ ಗಮನವನ್ನು ಸ್ಥಳೀಯ ಸಂಘ-ಸಂಸ್ಥೆಗಳ ಚುನಾವಣೆಗಳತ್ತ ಹರಿಸಿದ್ದು, ಕೋನಸಾಗರದ ನೇಕಾರರ ಸಂಘದ ಚುನಾವಣೆಯಲ್ಲಿ ತೀವ್ರ ಸ್ಪರ್ಧೆ ಕಂಡುಬರುತ್ತಿದೆ.

6 ದಶಕಗಳ ಬಳಿಕ ಮೊದಲ ಚುನಾವಣೆ

1961 ರಲ್ಲಿ ಸ್ಥಾಪನೆಗೊಂಡ ಈ ಉಣ್ಣೆ ಕೈಮಗ್ಗ ನೇಕಾರರ ಸಹಕಾರ ಸಂಘದಲ್ಲಿ ಇದೇ ಪ್ರಥಮ ಬಾರಿಗೆ ಚುನಾವಣೆ ನಡೆಯುತ್ತಿರುವುದು ಗಮನಾರ್ಹ ಅಂಶ.

ಸುಮಾರು ಆರು ದಶಕಗಳ ನಂತರ ಸಂಘದ ಆಡಳಿತ ಮಂಡಳಿಗೆ ಆಯ್ಕೆ ನಡೆಯುತ್ತಿರುವುದು ಮತದಾರರಲ್ಲಿ ಅಚ್ಚರಿ ಮೂಡಿಸಿದೆ.

ಸಂಘದ ಒಟ್ಟು 8 ನಿರ್ದೇಶಕರ ಸ್ಥಾನಗಳಿಗೆ ಚುನಾವಣೆ ನಡೆಯುತ್ತಿದೆ. ಆರಂಭದಲ್ಲಿ 42 ನಾಮಪತ್ರಗಳು ಸಲ್ಲಿಕೆಯಾಗಿದ್ದು, ಪ್ರಸ್ತುತ 21 ಸ್ಪರ್ಧಿಗಳು ಕಣದಲ್ಲಿದ್ದಾರೆ.

ಮನೆ ಮನೆಗೆ ತೆರಳಿ ಮತಯಾಚನೆ

ಸಂಘದಲ್ಲಿ ಒಟ್ಟು 745 ಮತದಾರರಿದ್ದಾರೆ. ಚುನಾವಣಾ ದಿನಾಂಕ ಸಮೀಪಿಸುತ್ತಿದ್ದಂತೆ, ಸ್ಪರ್ಧಿಗಳು ಮತಯಾಚನೆಗಾಗಿ ಮನೆ ಮನೆಗೆ ಭೇಟಿ ನೀಡುತ್ತಿರುವುದು ಬಿರುಸುಗೊಂಡಿದೆ. ಈ ಬಿರುಸಿನ ಪ್ರಚಾರದ ವಾತಾವರಣವು ಗ್ರಾಮ ಪಂಚಾಯಿತಿ ಚುನಾವಣೆಯ ಬಿಸಿ ವಾತಾವರಣವನ್ನು ನೆನಪಿಸುವಂತಿದೆ.

ಆಯ್ಕೆಯಾದ ನಿರ್ದೇಶಕರ ಮಂಡಳಿಯು ಪ್ರತಿ ಐದು ವರ್ಷಗಳ ಅವಧಿಗೆ ಸಂಘದ ಆಡಳಿತವನ್ನು ಮುನ್ನಡೆಸಲಿದೆ. ಆರು ದಶಕಗಳ ನಂತರ ನಡೆಯುತ್ತಿರುವ ಈ ಚುನಾವಣೆಯ ಫಲಿತಾಂಶದ ಬಗ್ಗೆ ಗ್ರಾಮಸ್ಥರಲ್ಲಿ ತೀವ್ರ ಕುತೂಹಲ ಮೂಡಿದೆ.

ಕೋನಸಾಗರ ಉಣ್ಣೆ ಕೈಮಗ್ಗ ಸಹಕಾರ ಸಂಘದ 8 ನಿರ್ದೇಶಕರ ಸ್ಥಾನಗಳಿಗೆ ಭಾನುವಾರ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಚುನಾವಣೆ ನಡೆಯಲಿದೆ. 745 ಮತದಾರರಿದ್ದು, 2 ಮತಗಟ್ಟೆಗಳ ವ್ಯವಸ್ಥೆ ಮಾಡಲಾಗಿದೆ.

ಸಂಘದ ಆರಂಭದಿಂದಲೂ ಇಲ್ಲಿಯವರೆಗೂ ಅವಿರೋಧವಾಗಿಯೇ ನಿರ್ದೇಶಕರ ಆಯ್ಕೆ ನಡೆದಿದೆ. ಈ ಬಾರಿ ಸ್ಪರ್ಧೆಯ ತೀವ್ರತೆಯಿಂದ ಪ್ರಥಮ ಬಾರಿ ಚುನಾವಣೆ ನಡೆಯುತ್ತಿದೆ.

ಚುನಾವಣೆ