ಪರಿಹಾರ ಭರವಸೆ ಕೊಟ್ಟರೆ ಮಾತ್ರ ವಿಮೆ ಪಾವತಿ Meeting

ಪಟ್ಟಣದ ತಾಲೂಕು ಆಡಳಿತ ಸೌಧದಲ್ಲಿ ಶನಿವಾರ ಆಯೋಜಿಸಿದ್ದ ಬೆಳೆ ವಿಮೆ ಪಾವತಿ ಕುಂದುಕೊರತೆ, ತಾಲೂಕು ಮಟ್ಟದ ಅಧಿಕಾರಿಗಳು ಹಾಗೂ ರೈತಪರ ಸಂಘಟನೆ ಪದಾಧಿಕಾರಿಗಳ ಜಂಟಿ ಸಭೆಯಲ್ಲಿ ರೈತರು ಒಕ್ಕೊರಲಿನಿಂದ ತಮ್ಮ ನಿರ್ಧಾರ ಪ್ರಕಟಿಸಿದರು.

7ವರ್ಷಗಳ ಸರಾಸರಿ ಬೆಳೆ ಆಧರಿಸಿ ವಿಮಾ ಪರಿಹಾರ ಕೊಡುವ ಅವೈಜ್ಞಾನಿಕ ಮಾನದಂಡಗಳನ್ನು ನಂಬಿಕೊಂಡು ಪ್ರತಿ ವರ್ಷ ಬೆಳೆ ವಿಮೆ ಪಾವತಿಸಿದರೂ ಸೂಕ್ತ ಪರಿಹಾರ ದೊರೆತಿಲ್ಲ. ಕಂಪನಿಗಳನ್ನು ಉದ್ಧಾರ ಮಾಡುವ ಸಂಚಿನಲ್ಲಿ ರೈತರ ಜೇಬಿಗೆ ಕನ್ನ ಹಾಕುವ ಕುತಂತ್ರ ಅಡಗಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಕಳೆದ ವರ್ಷ ಚಳ್ಳಕೆರೆ, ಮೊಳಕಾಲ್ಮೂರು ತಾಲೂಕಿನ ರೈತರು ಬೆಳೆ ನಷ್ಟ ಅನುಭವಿಸಿದರೂ ವಿಮಾ ಹಣ ಕಟ್ಟಿದ ರೈತರಿಗೆ ಪರಿಹಾರ ಸಿಗಲಿಲ್ಲ. ಇದನ್ನು ಮನಗಂಡ ಚಳ್ಳಕೆರೆ ಶಾಸಕ ರಘುಮೂರ್ತಿ ಜಿಲ್ಲಾಡಳಿತ ಮತ್ತು ಕಂಪನಿ ಗಮನ ಸೆಳೆದು 48ರ ಪೈಕಿ 28 ಗ್ರಾಪಂಗಳ ವ್ಯಾಪ್ತಿಯ ರೈತರಿಗೆ ಸೂಕ್ತ ಪರಿಹಾರದ ಹಣ ಕೊಡಿಸಿದರು. ಆದರೆ, ಮೊಳಕಾಲ್ಮೂರು ತಾಲೂಕಿನ 16 ಗ್ರಾಪಂಗಳ ಪೈಕಿ ನೆಪ ಮಾತ್ರಕ್ಕೆ ಕೇವಲ 3 ಗ್ರಾಪಂ ವ್ಯಾಪ್ತಿಯ ರೈತರಿಗೆ ಒಂದಿಷ್ಟು ಪರಿಹಾರ ಸಿಕ್ಕಿತು. ಇಂತಹ ತಾರತಮ್ಯ ನೀತಿ ಏಕೆ ಎಂದು ಪ್ರಶ್ನಿಸಿದರು.

ಈ ವರ್ಷವೂ ಸಂಪೂರ್ಣ ಬರ ಆವರಿಸಿದೆ. ಸಿಎಂ ಖುದ್ದು ಜಿಲ್ಲೆಗೆ ಭೇಟಿ ಕೊಟ್ಟು ಬರ ಅಧ್ಯಯನ ಮಾಡಿದರೂ ಇದುವರೆಗೂ ಬರಪೀಡಿತ ಪ್ರದೇಶ ಎಂದು ಘೋಷಣೆ ಮಾಡಿಲ್ಲ. ರೈತರ ಮೂಗಿಗೆ ತುಪ್ಪ ಸವರುವ ಕೆಲಸ ನಡೆದಿದೆ. ಬರ ಪರಿಹಾರದ ವಿಚಾರದಲ್ಲಿ ಅಧಿಕಾರಿಗಳ ಕಂತೆ ಪುರಾಣ ಬೇಕಿಲ್ಲ. ನಮಗೆ ಬೆಳೆ ನಷ್ಟಕ್ಕೆ ಪೂರಕವಾಗಿ ಪರಿಹಾರ ಕೊಡುವ ಜವಾಬ್ದಾರಿ ನೀವು ತೆಗೆದುಕೊಳ್ಳಬೇಕು. ನಾವು ವಿಮೆ ಹಣ ಕಟ್ಟುತ್ತೇವೆ. ಸುಖಾಸುಮ್ಮನೆ ಸಭೆ ಮಾಡುವ ಔಚಿತ್ಯವೇನಿದೆ. ಅದರಿಂದ ರೈತರಿಗೆ ಯಾವ ಉಪಯೋಗವೂ ಇಲ್ಲ. ಇದರ ಬಗ್ಗೆ ಜಿಲ್ಲೆಯ ಎಲ್ಲ ಕ್ಷೇತ್ರದ ಶಾಸಕರು ಹಾಗೂ ಸಂಸದರು ಕಾಳಜಿ ವಹಿಸಿ ರೈತರಿಗೆ ನ್ಯಾಯಕೊಡಿಸಬೇಕು. ಇಲ್ಲವಾದಲ್ಲಿ ರೈತರಿಗೆ ಮಾರಕವಾಗಿರುವ ಬೆಳೆ ವಿಮಾ ಯೋಜನೆಯನ್ನೇ ರದ್ದುಮಾಡಿಸಬೇಕು ಎಂದು ಒತ್ತಾಯಿಸಿದರು.

ಕೃಷಿ ಇಲಾಖೆ ಅಧಿಕಾರಿ ಡಾ.ಮಂಜುನಾಥ ಮಾತನಾಡಿ, ಬೆಳೆ ವಿಮೆ ಪಾವತಿಗೆ ಜು.31ಕೊನೇ ದಿನವಾಗಿದೆ. ತಾಲೂಕಿನಲ್ಲಿ ಒಟ್ಟು 24 ಸಾವಿರ ರೈತರಿದ್ದಾರೆ. 16 ಸಾವಿರ ರೈತರು ನಾನಾ ಬೆಳೆಗಳಿಗೆ ವಿಮೆ ಪಾವತಿಸಿದ್ದಾರೆ. ಈ ಪೈಕಿ 11,290 ಮಂದಿ ರೈತರು ಶೇಂಗಾ ಬೆಳೆಗೆ ವಿಮೆ ಪಾವತಿ ಮಾಡಿದ್ದಾರೆ. ಬೆಳೆ ನಷ್ಟ ಆಧರಿಸಿ ಎಕರೆಗೆ 5-6 ಸಾವಿರ ಪರಿಹಾರ ಸಿಗಲಿದೆ. ಸರ್ಕಾರಗಳು ರೈತರಿಗೆ ನೆರವಾಗಲೆಂದು ಬೆಳೆ ವಿಮಾ ಯೋಜನೆ ಜಾರಿಗೆ ತಂದಿವೆ ಎಂದು ಸಮಜಾಯಿಷಿ ನೀಡಿದರು.

ಇದಕ್ಕೆ ರೈತರು ಸುತಾರಾಂ ಒಪ್ಪಲಿಲ್ಲ. ಸ್ಥಳೀಯ ಶಾಸಕರು ಹಾಗೂ ಜಿಲ್ಲಾಧಿಕಾರಿ ಸಮುಖದಲ್ಲೇ ಸಭೆ ನಡೆಯಲಿ ಎಂದರು.

ಗ್ರೇಡ್-2 ತಹಸೀಲ್ದಾರ್ ಸಂತೋಷ್‌ಕುಮಾರ, ಕೃಷಿ ಇಲಾಖೆ ಅಧಿಕಾರಿ ಡಾ. ಮಂಜುನಾಥ, ಸಹಾಯಕ ಅಧಿಕಾರಿ ಹೇಮಂತನಾಯ್ಕ, ತೋಟಗಾರಿಕೆ ಇಲಾಖೆ ಅಧಿಕಾರಿ ಕೃಷ್ಣಮೂರ್ತಿ, ರೇಷ್ಮೆ ಇಲಾಖೆ ವಿಸ್ತರಣಾಧಿಕಾರಿ ಮಹೇಶ್, ಸಹಾಯಕ ಸಾಂಖ್ಯಿಕ ಅಧಿಕಾರಿ ಅಶ್ವತ್ಥಾಮ, ಕೃಷಿಕ ಸಮಾಜದ ತಾಲೂಕು ಅಧ್ಯಕ್ಷ ಭಕ್ತ ಪ್ರಹ್ಲಾದ, ನಿರಂಜನಮೂರ್ತಿ, ರೈತಪರ ಸಂಘಟನೆ ಪದಾಧಿಕಾರಿ ಗಳಾದ ರವಿಕುಮಾರ, ಮಹಮದ್‌ಜಾಫರ್, ಕೊಂಡಾಪುರ

ಪರಮೇಶಿ, ಡಿ.ಸಿ. ನಾಗರಾಜ, ನಿಂಗಣ್ಣ, ಈರಣ್ಣ ಇತರರು ಇದ್ದರು.