ಮಂಗಳೂರು: ಅಪಹರಣ ಪ್ರಕರಣದ ಆರೋಪಿಗಳನ್ನು ಭಾನುವಾರ ಬೆಳ್ತಂಗಡಿಗೆ ಕರೆತಂದು ಕೋರ್ಟ್ಗೆ ಹಾಜರುಪಡಿಸಲಾಯಿತು. ನ್ಯಾಯಾಲಯ ಆರೋಪಿಗಳನ್ನು ಹೆಚ್ಚಿನ ವಿಚಾರಣೆಗಾಗಿ 4 ದಿನಗಳ ಕಾಲ ಪೊಲೀಸ್ ಕಸ್ಟಡಿಗೆ ಒಪ್ಪಿಸಿದೆ. ಪ್ರಕರಣಕ್ಕೆ ಸಂಬಂಧಿಸಿ ಮಂಡ್ಯ ನಿವಾಸಿಗಳಾದ ರಂಜಿತ್ (22), ಹನುಮಂತ್ (21), ಮೈಸೂರು ನಿವಾಸಿ ಗಂಗಾಧರ (25), ಬೆಂಗಳೂರಿನ ನಿವಾಸಿ ಕಮಲ್ (22), ಕೋಲಾರ ನಿವಾಸಿಗಳಾದ ಮಂಜುನಾಥ್ (24), ಮಹೇಶ್ (26) ಎಂಬವರನ್ನು ಬಂಧಿಸಲಾಗಿತ್ತು. ದಕ್ಷಿಣ ಕನ್ನಡ ಜಿಲ್ಲಾ ಎಸ್ಪಿ ಲಕ್ಷ್ಮೀಪ್ರಸಾದ್ ಅವರು ತನಿಖೆಗೆ 5 ತಂಡಗಳನ್ನು ರಚಿಸಿದ್ದರು. ತನಿಖಾ ತಂಡ ಕ್ಷಿಪ್ರಗತಿಯಲ್ಲಿ ತನಿಖೆ ನಡೆಸಿ ಕೋಲಾರ ಜಿಲ್ಲೆ ಎಸ್ಪಿ ಕಾರ್ತಿಕ್ ಅವರ ಸಹಕಾರದೊಂದಿಗೆ ಆರೋಪಿಗಳನ್ನು ಡಿ.19ರಂದು ಬೆಳಗ್ಗಿನ ಜಾವ ಕೋಲಾರದ ಮಾಸ್ತಿಯಲ್ಲಿ ಬಂಧಿಸಿದೆ. ಮಗುವನ್ನು ಶನಿವಾರ ಹೆತ್ತವರಿಗೆ ಒಪ್ಪಿಸಲಾಗಿದೆ. ಪ್ರಮುಖ ಆರೋಪಿಗಳ ಬಂಧನವಾದರೆ ಅಪಹರಣದ ಹಿಂದಿನ ಸಂಚು ಬಯಲಾಗಲಿದೆ. ಬಿಜೋಯ್ ಕುಟುಂಬದ ಮಾಹಿತಿ ಇರುವಾತ ಈ ಪ್ರಕರಣದಲ್ಲಿ ಭಾಗಿಯಾಗಿರುವುದು ಸ್ಪಷ್ಟವಾಗಿದ್ದು, ಆತನ ಬಂಧನಕ್ಕಾಗಿ ಪೊಲೀಸರು ಪ್ರಯತ್ನಿಸುತ್ತಿದ್ದಾರೆ. ಪ್ರಮುಖ ಆರೋಪಿ ಹಾಸನ ಜಿಲ್ಲೆಯವನು ಎನ್ನಲಾಗಿದ್ದು, ಅಲ್ಲಿಗೂ ಪೊಲೀಸರ ತಂಡ ತೆರಳಿದೆ. ಬಿಟ್ಕಾಯಿನ್ ವ್ಯವಹಾರವೇ ಅಪಹರಣಕ್ಕೆ ಕಾರಣ ಎಂದು ಶಂಕಿಸಲಾಗಿದೆ.
