ಟ್ರಾಕ್ಟರ್​ ಹರಿದು ಆಟವಾಡುತ್ತಿದ್ದ ಮಗು ಸಾವು

ಮಾಗಡಿ: ತಾಲೂಕಿನ ರಸ್ತೆಪಾಳ್ಯದ ಬಳಿ ಆಟವಾಡುತ್ತಿದ್ದ ಮಗುವಿನ ಮೇಲೆ ಮಂಗಳವಾರ ಟ್ರಾಕ್ಟರ್​ ಹರಿದು ಗೋಕಾಕ್​ ಮೂಲದ ಮಗುವೊಂದು ಮೃತಪಟ್ಟಿದೆ.

ಗೋಕಾಕ್​ ತಾಲೂಕಿನ ಹಾಲದ ಕಟ್ಟಿ ಗ್ರಾಮದ ನಿವಾಸಿ ಪಕ್ಕೀರಪ್ಪ ಅವರ ಪುತ್ರ ಹನುಮಂತ (6) ಮೃತ ಮಗು.

ಪಕ್ಕೀರಪ್ಪ ಕುಟುಂಬ ಸೇರಿದಂತೆ 10 ಮಂದಿ ತಾಲೂಕಿನ ರಸ್ತೆಪಾಳ್ಯದ ಬಳಿ ಶೆೆಡ್​ ಹಾಕಿಕೊಂಡು ಸುತ್ತಮುತ್ತಲ ಗ್ರಾಮಗಳಲ್ಲಿ ಮರಗೆಲಸ ಮಾಡುತ್ತಿದ್ದಾರೆ. ಎಂದಿನಂತೆ ಮಂಗಳವಾರವೂ ಪಕ್ಕೀರಪ್ಪ ರೈತರೊಬ್ಬರ ಹೊಲದಲ್ಲಿ ಮರ ಕೊಯ್ಯುವ ವೇಳೆ ಮರ ತುಂಬಲು ಬರುತ್ತಿದ್ದ ಟ್ರಾಕ್ಟರ್​ಗೆ ಆಟವಾಡುತ್ತಿದ್ದ ಮಗು ಏಕಾಏಕಿ ಓಡಿ ಬಂದಿದೆ. ಚಾಲಕನ ನಿಯಂತ್ರಣ ಕಳೆದುಕೊಂಡ ಟ್ರಾಕ್ಟರ್​ನ ಹಿಂಬದಿ ಚಕ್ರ ಹರಿದು ಗಂಭೀರಗಾಯಗೊಂಡಿದ್ದ ಮಗುವನ್ನು ಕೂಡಲೇ ಸೂಕ್ತ ಚಿಕಿತ್ಸೆಗಾಗಿ ಮಾಗಡಿ ರ್ಸಕಾರಿ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ ಮಾರ್ಗ ಮಧ್ಯೆ ಮೃತಪಟ್ಟಿದೆ.

ಗೋಕಾಕ್​ ತಾಲೂಕಿನ ಹಾಲದ ಕಟ್ಟಿ ಗ್ರಾಮದ ಸರ್ಕಾರಿ ಶಾಲೆಯಲ್ಲಿ ಓದುತ್ತಿದ್ದ ಬಾಲಕ ದಸರಾ ರಜೆಯ ಕಾರಣ ಸೋಮವಾರ ರಸ್ತೆಪಾಳ್ಯದ ತನ್ನ ತಂದೆಯ ಮನೆಗೆ ಬಂದಿದ್ದ ಎನ್ನಲಾಗಿದೆ. ಕುದೂರು ಪೋಲೀಸ್​ ಠಾಣೆಯಲ್ಲಿ ಮೃತ ಬಾಲಕನ ತಂದೆ ಪಕ್ಕೀರಪ್ಪ ದೂರು ದಾಖಲಿಸಿದ್ದಾರೆ.