ನೇತ್ರಾವತಿ ಪೀಕ್ಗೆ ಹೋಗಲು ಕಳಸ ತಾಲೂಕಿನ ಸಂಸೆ ಗ್ರಾಮದ ಮೂಲಕ ಎಳನೀರು, ಗುತ್ಯಡ್ಕ, ಕುರೆಕ್ಕಲ್ ಗ್ರಾಮಗಳ ಮೂಲಕ ಹಾದು ಹೋಗಬೇಕು. ಈ ಭಾಗದಲ್ಲಿ ಗುತ್ಯಡ್ಕ, ಕುರೆಕ್ಕಲ್, ಬಂಗಾರ್ಪಲ್ಕೆ, ಉಕ್ಕುಡ ಸೇರಿದಂತೆ ಹಲವು ಗ್ರಾಮಗಳಿದ್ದು, ಸುಮಾರು 90ಕ್ಕೂ ಹೆಚ್ಚು ಕುಟುಂಬಗಳು ವಾಸಿಸುತ್ತಿವೆ. ಭೌಗೋಳಿಕವಾಗಿ ಇವು ಬೆಳ್ತಂಗಡಿ ತಾಲೂಕಿನ ಮಲವಂತಿಗೆ ಗ್ರಾಮ ಪಂಚಾಯಿತಿಗೆ ಸೇರುತ್ತವೆ. ಆದರೆ, ಈ ಭಾಗದ ಜನ ಸಣ್ಣ ಕೆಲಸವಾಗಬೇಕಾದರೂ ಅಥವಾ ಗ್ರಾಮ ಪಂಚಾಯಿತಿಗೆ ಹೋಗಬೇಕಾದರೂ ಬರೋಬ್ಬರಿ 110 ಕಿಲೋಮೀಟರ್ ದೂರ ಕ್ರಮಿಸಬೇಕು. ನಿತ್ಯದ ರೇಷನ್, ವೈದ್ಯಕೀಯ ನೆರವು ಹಾಗೂ ಶಾಲಾ ಶಿಕ್ಷಣಕ್ಕಾಗಿ ಕಳಸ ತಾಲೂಕನ್ನು ಆಶ್ರಯಿಸಿದ್ದಾರೆ. ಎರಡು ಜಿಲ್ಲೆಗಳ ಗಡಿ ಮಧ್ಯ ಸಿಲುಕಿರುವ ಈ ಗ್ರಾಮಸ್ಥರು ನರಕಯಾತನೆ ಅನುಭವಿಸುತ್ತಿದ್ದಾರೆ.
