ಶೃಂಗೇರಿ ಜಗದ್ಗುರುಗಳಿಂದ ಚಾತುರ್ಮಾಸ್ಯ ವ್ರತ ಸಂಕಲ್ಪ

ಶೃಂಗೇರಿ: ಗುರುಪೂರ್ಣಿಮೆ ದಿನ ಬುಧವಾರ ಶ್ರೀ ಶಾರದಾಪೀಠದ ಜಗದ್ಗುರುಗಳಾದ ಶ್ರೀ ಭಾರತೀತೀರ್ಥ ಸ್ವಾಮೀಜಿ ಮತ್ತು ಶ್ರೀ ವಿಧುಶೇಖರ ಭಾರತೀಸ್ವಾಮೀಜಿ ಅವರು ಗುರುನಿವಾಸದಲ್ಲಿ ಚಾತುರ್ಮಾಸ್ಯ ವ್ರತ ಕೈಗೊಂಡರು. 

ಚಾತುರ್ಮಾಸ್ಯ ವ್ರತ ಅಂಗವಾಗಿ ಆಷಾಢ ಮಾಸದ ಶುಕ್ಲಪಕ್ಷದ ದಿನ ಮಂಗಳವಾರ ಸಂಜೆ ಶ್ರೀಮಠದ ಸಂಪ್ರದಾಯದಂತೆ ಜಗದ್ಗುರುಗಳು ಸಾಂಪ್ರದಾಯಿಕವಾಗಿ ವೇದವಾದ್ಯಘೋಷಗಳೊಂದಿಗೆ ಈಶ್ವರಗಿರಿಗೆ ತೆರಳಿ ಶ್ರೀ ಮಲಹಾನಿಕರೇಶ್ವರ ಸ್ವಾಮಿ ದೇಗುಲವನ್ನು ದರ್ಶಿಸಿದರು. ಬುಧವಾರ ಬೆಳಗ್ಗೆ ವ್ಯಾಸಪೂಜೆಗೂ ಮುನ್ನ ಶ್ರೀ ಶಾರದಾಂಬ, ಶ್ರೀ ತೋರಣಗಣಪತಿ, ಶ್ರೀ ವಿದ್ಯಾಶಂಕರ, ಶ್ರೀ ಶಂಕರಾಚಾರ್ಯ, ಶ್ರೀ ಸುಬ್ರಹ್ಮಣ್ಯ, ಶ್ರೀ ಶಕ್ತಿಗಣಪತಿ, ಶ್ರೀ ಜನಾರ್ದನಸ್ವಾಮಿ ಮುಂತಾದ ದೇಗುಲಗಳಿಗೆ ತೆರಳಿ ವಿಶೇಷ ಪೂಜೆಯಲ್ಲಿ ಭಾಗಿಯಾದರು. ಮಠದಲ್ಲಿ ಲಲಿತಾ ಹೋಮ, ಶ್ರೀ ಶಾರದಾಂಬೆ ಸನ್ನಿಧಿಯಲ್ಲಿ ಲಕ್ಷಮಲ್ಲಿಕಾರ್ಚನೆಯ ಉದ್ಯಾಪನೆಗಳು ನೆರವೇರಿದವು. ನಾನಾ ಪ್ರಾಂತ್ಯಗಳಿಂದ ಆಗಮಿಸಿದ ಸದ್ಭಕ್ತರು ವ್ರತದ ಧಾರ್ಮಿಕ ವಿಧಿಗಳನ್ನು ಕಣ್ತುಂಬಿಕೊಂಡರು. ಸೆ.26ರ ತನಕ ಚಾತುರ್ಮಾಸ್ಯ ವ್ರತ ನೆರವೇರಲಿದೆ.

ಚಾತುರ್ಮಾಸ್ಯ ಸಂಕಲ್ಪಗಿಂತಲೂ ಮೊದಲು ವ್ಯಾಸಪೂಜೆಯನ್ನು ಯತಿಗಳು ನೆರವೇರಿಸಿದರು. ಪೂಜೆಯನ್ನು ಮೂರು ಗುಂಪುಗಳ ಆಚಾರ್ಯರಿಗೆ ಸಲ್ಲಿಸಲಾಗುತ್ತದೆ. ಒಂದೊಂದು ಗುಂಪಿನಲ್ಲಿ ಐದು ಆಚಾರ್ಯರುಗಳಿದ್ದು, ಕೃಷ್ಣ ಪಂಚಕ, ವ್ಯಾಸ ಪಂಚಕ ಹಾಗೂ ಶ್ರೀ ಶಂಕರಾಚಾರ್ಯ ಪಂಚಕ ಎಂಬ ಹೆಸರಿನಿಂದ ಕರೆಯಲಾಗುತ್ತದೆ. ಕೃಷ್ಣ ಪಂಚಕದಲ್ಲಿ ಶ್ರೀ ಕೃಷ್ಣ, ಸನಕ, ಸನಂದನ, ಸನತ್ಕುಮಾರ, ಸನತ್ಸುಜಾತರನ್ನೂ, ವ್ಯಾಸಪಂಚಕದಲ್ಲಿ ಶ್ರೀ ವೇದವ್ಯಾಸರು, ಜೈಮಿನಿ ಮಹರ್ಷಿ, ವೈಶಂಪಾಯನ ಮಹರ್ಷಿ, ಸುಮಂತು ಮಹರ್ಷಿ ಹಾಗೂ ಆಚಾರ್ಯ ಪಂಚಕದಲ್ಲಿ ಶ್ರೀ ಶಂಕರಾಚಾರ್ಯ, ಶ್ರೀ ಸುರೇಶ್ವರಾಚಾರ್ಯ, ಹಸ್ತಾಮಲಕಾಚಾರ್ಯ, ತೋಟಕಾಚಾರ್ಯ,ಪದ್ಮಪಾದಾಚಾರ್ಯರನ್ನೂ ಪೂಜಿಸಲಾಗುತ್ತದೆ. ಈ ಮೂರೂ ಗುಂಪುಗಳ ಪಂಚಕಗಳಿಗೆ ಶ್ರೀಗಳು ಪ್ರತ್ಯೇಕವಾಗಿ ಪೂಜೆ ಸಲ್ಲಿಸಿದರು. ಬಳಿಕ ಶೃಂಗೇರಿ ಜಗದ್ಗುರು ಪರಂಪರಾ ಸ್ತೋತ್ರಗಳನ್ನು ಪಠಿಸಿ ಗುರುಪರಂಪರೆಯಲ್ಲಿ ಬರುವ ಯತಿವರೇಣ್ಯರಿಗೆ ಪೂಜೆ ಸಲ್ಲಿಸಿದರು.

ಭಗವಾನ್ ಸದಾಶಿವನಿಂದ ಪ್ರಾರಂಭವಾಗುವ ಗುರುಪರಂಪರೆ ಮೂವತ್ತೈದನೇ ಜಗದ್ಗುರುಗಳ ಶ್ರೀ ಅಭಿನವ ವಿದ್ಯಾತೀರ್ಥ ಮಹಾಸ್ವಾಮಿ ತನಕ ಪೂಜೆಯನ್ನು ಜಗದ್ಗುರು ಶ್ರೀ ಭಾರತೀತೀರ್ಥ ಸ್ವಾಮೀಜಿ ನೆರವೇರಿಸಿದರು.

 ಪೂಜಾವಿಧಿಗಳು ಮುಗಿದ ಬಳಿಕ ಜಗದ್ಗುರುಗಳು ಮಳೆಗಾಲದ ಸಮಯ ಸಣ್ಣ ಕ್ರಿಮಿ-ಕೀಟಗಳು ದಾರಿಯಲ್ಲಿ ಗುಂಪುಗುಂಪಾಗಿ ಕಾಣಿಸಿಕೊಳ್ಳುತ್ತವೆ. ಶ್ರುತಿಯ ನಿರ್ದೇಶನದಂತೆ ಅವುಗಳಿಗೆ ಹಿಂಸೆ ನೀಡಬಾರದು ಎಂಬ ದೃಷ್ಟಿಯಿಂದ ನಾವು ಒಂದೇ ಸ್ಥಳದಲ್ಲಿ ಇರುತ್ತೇವೆ ಎಂದು ವಿಧ್ಯುಕ್ತವಾಗಿ ಚಾರ್ತುಮಾಸ್ಯ ಸಂಕಲ್ಪ ಕೈಗೊಂಡರು. ಆಗ ಶಿಷ್ಯರು ಗುರುಸೇವೆಯನ್ನು ಯಥಾಶಕ್ತಿಯಾಗಿ ಈ ಅವಧಿಯಲ್ಲಿ ನಿರ್ವಹಿಸುತ್ತೇವೆ. ಯತಿಗಳು ಸುಖವಾಗಿ ವಾಸ ಮಾಡಬೇಕು ಎಂದು ವಿನಂತಿಸಿಕೊಂಡರು. ನಂತರ ಗುರುಪಾದುಕೆಗಳಿಗೆ ಸಮಸ್ತ ಭಕ್ತರ ಪರವಾಗಿ ಶ್ರೀಮಠದ ಪುರೋಹಿತರು ಪೂಜೆ ನೆರವೇರಿಸಿದರು. ಶೃಂಗಪುರ-ಸಚ್ಚಿದಾನಂದಪುರ-ನರಸಿಂಹಪುರ-ವಿದ್ಯಾರಣ್ಯಪುರದ  ಜನರು ಶ್ರೀಗಳಿಗೆ ಕಾಣಿಕೆ ಸಮರ್ಪಿಸಿದರು. ಶೃಂಗೇರಿ ಶಾರದಾಪೀಠಕ್ಕೆ ರಾಜರು ನೀಡಿದ ದತ್ತಿ ಕಾಣಿಕೆಗಳನ್ನು ಆಡಳಿತಾಧಿಕಾರಿ ಪಿ.ಎ.ಮುರಳಿ ಅವರು ಯತಿವರ್ಯರಿಗೆ ಸಮರ್ಪಿಸಿದರು. ಯತಿಗಳು ಸಮಸ್ತ ಭಕ್ತರಿಗೆ ತೀರ್ಥ ನೀಡಿ ಅನುಗ್ರಹಿಸಿದರು. ಜು.30ರಂದು ಪುನಃ ಶ್ರೀಗಳು ಗುರುಪರಂಪರೆಗೆ ಪೂಜೆ ಸಲ್ಲಿಸುತ್ತಾರೆ. ಪೂಜೆ ಬಳಿಕ ಭಕ್ತರಿಗೆ ಪ್ರಸಾದ, ವ್ಯಾಸಾಕ್ಷತೆ ನೀಡುತ್ತಾರೆ.