ಹಾಂದಿ-ಬಸ್ಕಲ್ ರಸ್ತೆಯಲ್ಲಿ ಸಂಚಾರ ಸಂಕಷ್ಟ

ಆಲ್ದೂರು: ಹಾಂದಿ ಮಾರ್ಗವಾಗಿ ಬೇಲೂರಿಗೆ ಸಂಪರ್ಕ ಕಲ್ಪಿಸುವ ಹಾಂದಿ-ಬಸ್ಕಲ್ ರಸ್ತೆ ದೊಡ್ಡ, ದೊಡ್ಡ ಗುಂಡಿಗಳಿಂದ ಈ ಮಾರ್ಗದಲ್ಲಿ ಸಂಚರಿಸಲು ವಾಹನ ಸವಾರರು ಪರದಾಡುವಂತಾಗಿದೆ.

ಹಾಂದಿ-ಬಸ್ಕಲ್ ಮಾರ್ಗವಾಗಿ ಗೆಂಡೇಹಳ್ಳಿ ಮೂಲಕ ಬೇಲೂರಿಗೆ ಸಂಪರ್ಕ ಕಲ್ಪಿಸುವ ರಸ್ತೆಯಲ್ಲಿ ಪ್ರತಿನಿತ್ಯ ಸಾವಿರಾರು ವಾಹನಗಳು ಸಂಚರಿಸುತ್ತವೆ. ಧಾರ್ಮಿಕ ಕ್ಷೇತ್ರಗಳಾದ ರಂಭಾಪುರಿ ಪೀಠ, ಹೊರನಾಡು ,ಶೃಂಗೇರಿ ಸೇರಿದಂತೆ ಹಲವು ಪ್ರಮುಖ ಪ್ರವಾಸಿ ತಾಣಗಳಿಗೆ ಬೆಂಗಳೂರು, ಹಾಸನ ಸೇರಿದಂತೆ ಹೊರ ಜಿಲ್ಲೆ, ರಾಜ್ಯಗಳಿಂದ ಬರುವ ಪ್ರವಾಸಿಗರು ಈ ಮಾರ್ಗವಾಗಿ ಆಗಮಿಸುತ್ತಾರೆ. ಆದರೆ ರಸ್ತೆ ಅವ್ಯವಸ್ಥೆಯಿಂದ ಪ್ರಯಾಣಿಕರು ಹಿಡಿಶಾಪ ಹಾಕುತ್ತಿದ್ದಾರೆ.

ಬಸ್ಕಲ್‌ನಿಂದ ಹಾಂದಿಗೆ 9 ಕಿ.ಮೀ ಅಂತರವಿದ್ದು, ಈ ರಸ್ತೆಯಲ್ಲಿ ಸಂಚರಿಸಲು ಒಂದು ಗಂಟೆ ಬೇಕಾಗುತ್ತದೆ. ಮ್ಯಾಪ್‌ನಲ್ಲಿಯೂ ಈ ಮಾರ್ಗದ ರಸ್ತೆ ತೋರಿಸುವುದರಿಂದ ಸಾಕಷ್ಟು ಪ್ರವಾಸಿಗರು ಚಿಕ್ಕಮಗಳೂರು ಬಿಟ್ಟು ಗೆಂಡೇಹಳ್ಳಿ ಮಾರ್ಗದ ಮೂಲಕ ಸಾಗುತ್ತಾರೆ. ಈ ರಸ್ತೆ ಮೂಲಕ ಸಾಗಿದರೆ ಸುಮಾರು 10 ಕಿಮೀ ಉಳಿತಾಯವಾಗುವುದರಿಂದ ಹೆಚ್ಚು ಪ್ರವಾಸಿಗರು ಈ ಮಾರ್ಗದಲ್ಲಿ ಸಂಚರಿಸುತ್ತಾರೆ.

ಬಸ್ಕಲ್‌ನಿಂದ ಹಾಂದಿಗೆ ಸಂಪರ್ಕ ಕಲ್ಪಿಸುವ ಮಾರ್ಗದ ದೊಡ್ಡನಗುಡ್ಡ ಗ್ರಾಮದ ಮಧ್ಯೆ 4ಕಿ.ಮೀ ರಸ್ತೆ ನಿರ್ಮಾಣವಾಗದೆ ಗುಂಡಿಬಿದ್ದು ಹಾಳಾಗಿದೆ . ಈ ರಸ್ತೆ ಅಭಿವೃದ್ಧಿ ಪಡಿಸುವಂತೆ ಹಲವು ಬಾರಿ ಜನಪ್ರತಿನಿಧಿಗಳ ಗಮನ ಸೆಳೆದಿದ್ದರಿಂದ ಅನುದಾನ ಬಿಡುಗಡೆಯಾಗಿದೆ. ಅದರೆ ಈವರೆಗೂ ಕಾಮಗಾರಿ ಪ್ರಾರಂಭಿಸಿಲ್ಲ ಎಂದು ಸ್ಥಳೀಯ ನಿವಾಸಿಗಳು ಅಸಮಧಾನ ವ್ಯಕ್ತಪಡಿಸಿದ್ದಾರೆ.