ವೈದ್ಯಕೀಯ ಕ್ಷೇತ್ರದ ವೈಭವಿಕರಣ ಸಲ್ಲ

ಕಡೂರು: ವಿದ್ಯಾರ್ಥಿಗಳಿಗೆ ವೈದ್ಯಕೀಯ ಕ್ಷೇತ್ರದ ಹೊರತು ಇತರೆ ಕ್ಷೇತ್ರಗಳಲ್ಲಿ ಗೌರವಯುತವಾದ ಬದುಕು ರೂಪಿಸಲು ಸಾಕಷ್ಟು ಅವಕಾಶಗಳಿದ್ದು, ಪಾಲಕರು ವಿದ್ಯಾರ್ಥಿಗಳಿಗೆ ಆತ್ಮವಿಶ್ವಾಸ ತುಂಬುವ ಕೆಲಸವಾಗಬೇಕಿದೆ ಎಂದು ಶಿಕ್ಷಣ ತಜ್ಞ ಎನ್.ಪಿ.ಮಂಜುನಾಥ ಪ್ರಸನ್ನ ತಿಳಿಸಿದರು.

ಪಟ್ಟಣದಲ್ಲಿ ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತನಾಡಿ, ಈ ಬಾರಿ ನೀಟ್ ಪರೀಕ್ಷೆಯಲ್ಲಿ 22ಲಕ್ಷ ವಿದ್ಯಾರ್ಥಿಗಳು ಹಾಜರಾಗಿದ್ದರು. ನಂತರ ಪ್ರಶ್ನೆಪತ್ರಿಕೆ ಸೋರಿಕೆಯಿಂದ ಮರು ಪರೀಕ್ಷೆ ನಡೆಯಿತು. ನಂತರದ ಬೆಳವಣಿಗೆಗಳಿಂದ 12ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ವಿದ್ಯಾರ್ಥಿಗಳ ಆಸಕ್ತಿ ಬದಿಗಿಟ್ಟು ವೈದ್ಯರೇ ಆಗಬೇಕು ಎಂಬ ಸಾಕಷ್ಟು ಒತ್ತಡ ಮಕ್ಕಳ ಮೇಲೆ ಸಾಕಷ್ಟು ಪರಿಣಾಮ ಬೀರಿದೆ ಎಂದರು.

ವೈದ್ಯಕೀಯ ಕ್ಷೇತ್ರದ ಅತಿಯಾದ ವೈಭವೀಕರಣ, ಪಾಲಕರ ಒತ್ತಾಯದಿಂದ ಆಸಕ್ತಿಯಿಲ್ಲದಿದ್ದರೂ ವೈದ್ಯಕೀಯ ಸೀಟ್ ಪಡೆಯಲು ವಿದ್ಯಾರ್ಥಿಗಳು ಅನಿವಾರ್ಯವಾಗಿ ಒತ್ತಡಕ್ಕೆ ಸಿಲುಕುತ್ತಿದ್ದಾರೆ. ಮೆಡಿಕಲ್ ಸೀಟ್ ಪಡೆಯುವ ಗುರಿ ವಿಫಲವಾದದ್ದರಿಂದ ಈ ಮಕ್ಕಳು ಮನೋಸ್ಥೈರ್ಯ ಕಳೆದುಕೊಂಡು ಅತ್ಮಹತ್ಯೆಗೆ ಶರಣಾಗಿದ್ದಾರೆ. ಹಿಂದೆ ಕೆಲ ಪಾಲಕರು ಮಕ್ಕಳಲ್ಲಿ ಎದುರಾಗುವ ಎಲ್ಲ ಪರೀಕ್ಷೆಗಳನ್ನು ಎದುರಿಸಲು ಬೇಕಾದ ಸ್ಥೈರ್ಯ ತುಂಬಲು ವಿಫಲರಾಗಿದ್ದಾರೆ ಎಂದರು.

ವೈದ್ಯಕೀಯ ಅಥವಾ ಇಂಜಿನಿಯರಿಂಗ್ ಇಲ್ಲದೆ ಬಹುದೊಡ್ಡ ಗೌರವಯುತವಾದ ಓದು ಇದೆ ಎಂಬ ಅರಿವು ಪಾಲಕರಲ್ಲಿ ಮೂಡಬೇಕಿದೆ. ಆಡಳಿತ, ಶಿಕ್ಷಣ, ಆರ್ಥಿಕ ಕ್ಷೇತ್ರ, ಕೃಷಿ, ಕಾನೂನು ಮುಂತಾದ ಆಯ್ಕೆಗಳಿವೆ. ಈ ಬಗ್ಗೆ ಅರಿವು ಮೂಡಿಸುವ ಕಾರ್ಯವಾಗಲೇಬೇಕು. ಇದಕ್ಕೆ ಪರಿಹಾರವಾಗಿ ಫಿನ್‌ಲ್ಯಾಂಡ್ ಮಾದರಿ ಅಳವಡಿಸಿಕೊಳ್ಳಬಹುದಾಗಿದೆ. ಸಮಾನ ಹುದ್ದೆ, ಸಮಾನ ವೇತನ ಇದರ ಪ್ರಮುಖ ಲಕ್ಷಣವಾಗಿದೆ ಎಂದು ಹೇಳಿದರು.

ವಿದ್ಯಾರ್ಥಿಗಳಲ್ಲಿ ವೈದ್ಯಕೀಯ ಕ್ಷೇತ್ರ ಮಾತ್ರವೇ ಅಂತಿಮವಲ್ಲ.ಅದನ್ನು ಹೊರತುಪಡಿಸಿಯೂ ಬಹುದೊಡ್ಡ ಅವಕಾಶಗಳಿವೆ ಎಂಬ ವಿಚಾರವನ್ನು ಮಕ್ಕಳಿಗೆ ತಿಳಿಸುವ ಸಾಮಾಜಿಕ ಜವಾಬ್ದಾರಿಯನ್ನು ಪ್ರಜ್ಞಾವಂತ ಸಮಾಜ ಅರಿತುಕೊಳ್ಳಬೇಕು ಎಂದರು.