ರಾಜ್ಯ ಹೆದ್ದಾರಿಯ ಸೇತುವೆಗಳು ಶಿಥಿಲ

ಮಲೆನಾಡು ಮತ್ತು ಕರಾವಳಿಯನ್ನು ಸಂಪರ್ಕಿಸುವ ಅತ್ಯಂತ ಪ್ರಮುಖ ಕೊಂಡಿಯಾಗಿರುವ ಕುದುರೆಮುಖ-ಕಾರ್ಕಳ ರಾಜ್ಯ ಹೆದ್ದಾರಿಯ ಮೂರು ಪ್ರಮುಖ ಸೇತುವೆಗಳು ಸಂಪೂರ್ಣವಾಗಿ ಶಿಥಿಲಾವಸ್ಥೆ ತಲುಪಿದ್ದು, ಯಾವುದೇ ಕ್ಷಣದಲ್ಲೂ ಕುಸಿಯುವ ಸಾಧ್ಯತೆ ಇದೆ. ನಿರ್ವಹಣೆ ಮಾಡಬೇಕಿರುವ ಪಿಡಬ್ಲುೃಡಿ ನಿರ್ಲಕ್ಷ್ಯದಿಂದ ಸೇತುವೆಗಳು ದುಸ್ಥಿತಿಗೆ ತಲುಪಿದ್ದು, ಪ್ರಯಾಣಿಕರು ಉಸಿರು ಬಿಗಿಹಿಡಿದು ಸಂಚರಿಸುವಂತಾಗಿದೆ.

ಕುದುರೆಮುಖ-ಕಾರ್ಕಳ ಮಾರ್ಗದಲ್ಲಿರುವ ಮೂರೂ ಸೇತುವೆಗಳ ಸ್ಥಿತಿ ಶೋಚನೀಯವಾಗಿದೆ. ಸೇತುವೆಯ ಒಂದು ಬದಿಯಲ್ಲಿ ರಸ್ತೆ ಮತ್ತು ಸೇತುವೆಯ ಜಾಯಿಂಟ್ ಬಿಟ್ಟುಕೊಂಡು ಬೇರ್ಪಟ್ಟು ನಿಂತಿದೆ. ಸುರಕ್ಷೆ ದೃಷ್ಟಿಯಿಂದ ಅಳವಡಿಸಿದ್ದ ರಾಡ್‌ಗಳು ಸಂಪೂರ್ಣವಾಗಿ ಮೇಲೆದ್ದು ಬಂದಿದ್ದು, ವಾಹನ ಸವಾರರಿಗೆ ಕಂಟಕವಾಗಿ ಪರಿಣಮಿಸಿವೆ. ಸೇತುವೆಗಳ ಮೇಲೆ ನಿಂತಾಗ, ಯಾವುದಾದರೂ ಒಂದು ಸಣ್ಣ ವಾಹನ ಹಾದುಹೋದರೂ ಇಡೀ ಸೇತುವೆಯೇ ಜೋರಾಗಿ ಅಲುಗಾಡುವ ಅನುಭವವಾಗುತ್ತಿದೆ.

ರಸ್ತೆ ಮತ್ತು ಸೇತುವೆ ಕೂಡುವ ಜಾಗದಲ್ಲಿ ದೊಡ್ಡ ದೊಡ್ಡ ಹೊಂಡಗಳು ಬಿದ್ದಿವೆ. ಮಳೆಗಾಲದಲ್ಲಿ ಈ ಹೊಂಡಗಳಲ್ಲಿ ನೀರು ನಿಂತು,  ನೀರು ಕೆಳಗೆ ಕೊರೆದು ಹೋಗುತ್ತಿರುವುದರಿಂದ ಸೇತುವೆಯ ಪಿಲ್ಲರ್ ಹಾಗೂ ತಳಪಾಯದ ಭಾಗಗಳು ದುರ್ಬಲಗೊಳ್ಳುತ್ತಿವೆ. ಅಲ್ಲದೆ ರಸ್ತೆಯೂ ಕೊರೆದುಕೊಂಡು ಹೋಗುತ್ತಿದೆ.

ಇದೇ ರಸ್ತೆಯಲ್ಲಿ 2011ರಲ್ಲಿ ಸೇತುವೆಯೊಂದು ಕುಸಿದು ತಿಂಗಳುಗಳ ಕಾಲ ಕರಾವಳಿ ಮತ್ತು ಮಲೆನಾಡಿನ ನಡುವಿನ ರಸ್ತೆ ಸಂಚಾರ ಸಂಪೂರ್ಣ ಕಡಿತಗೊಂಡಿತ್ತು. ಅಂದು ಸಾರ್ವಜನಿಕರು ಅನುಭವಿಸಿದ ಕಷ್ಟ ಅಷ್ಟಿಷ್ಟಲ್ಲ. ಸದ್ಯದ ಪರಿಸ್ಥಿತಿ ನೋಡಿದರೆ ಮತ್ತೆ ಅಂಥದ್ದೇ ದುರಂತ ಮರುಕಳಿಸುವ ಆತಂಕ ಸ್ಥಳೀಯರನ್ನು ಕಾಡುತ್ತಿದೆ.

ದುರಂತ ಸಂಭವಿಸಿದ ನಂತರ ಕಣ್ಣೀರು ಸುರಿಸುವ ಬದಲು, ಪಿಡಬ್ಲುೃಡಿ ಹಾಗೂ ಜಿಲ್ಲಾಡಳಿತ ತಕ್ಷಣವೇ ಎಚ್ಚೆತ್ತುಕೊಳ್ಳಬೇಕಿದೆ. ಮೂರೂ ಸೇತುವೆಗಳ ದುರಸ್ತಿ ಕೈಗೊಂಡು ಜನರ ಜೀವ ಉಳಿಸಬೇಕು.  

ರಸ್ತೆಯು ಕೇವಲ ಒಂದು ಪ್ರವಾಸಿ ಮಾರ್ಗವಲ್ಲ, ಬದಲಿಗೆ ಸಾವಿರಾರು ಜನರ ದೈನಂದಿನ ಬದುಕಿನ ಆಸರೆಯಾಗಿದೆ. ಈ ರಸ್ತೆಯು ಅತ್ಯಂತ ಸೂಕ್ಷ್ಮ ಪರಿಸರ ವಲಯವಾದ ಕುದುರೆಮುಖ ಅಭಯಾರಣ್ಯ ವ್ಯಾಪ್ತಿಯಲ್ಲಿ ಹಾದು ಹೋಗುತ್ತದೆ. ಕಳಸ ತಾಲೂಕಿನ ಜನತೆ ತುರ್ತು ವೈದ್ಯಕೀಯ ಚಿಕಿತ್ಸೆ ಹಾಗೂ ಉನ್ನತ ಶಿಕ್ಷಣಕ್ಕಾಗಿ ಕರಾವಳಿ ಭಾಗವನ್ನೇ ನೆಚ್ಚಿಕೊಂಡಿದ್ದಾರೆ. ಪ್ರತಿ ದಿನ ಸಾವಿರಾರು ಪ್ರವಾಸಿಗರು, ರೋಗಿಗಳು, ವಿದ್ಯಾರ್ಥಿಗಳು ಹಾಗೂ ಸರಕು ಸಾಗಣೆಗಾರರು ವಾಹನಗಳಲ್ಲಿ ಇದೇ ಮಾರ್ಗವಾಗಿ ಸಂಚರಿಸುತ್ತಾರೆ. ಒಂದು ವೇಳೆ ಈ ಮೂರೂ ಸೇತುವೆಗಳಲ್ಲಿ ಯಾವುದಾದರೂ ಒಂದು ಸೇತುವೆ ಕುಸಿದರೂ ಕಳಸ ಸೇರಿದಂತೆ ಇಡೀ ಮಲೆನಾಡು ಭಾಗ ಕರಾವಳಿಯಿಂದ ಸಂಪೂರ್ಣ ಸಂಪರ್ಕ ಕಳೆದುಕೊಳ್ಳಲಿದೆ. 

ಮಳೆಗಾಲದ ಸಿದ್ಧತೆ, ರಸ್ತೆ, ಸೇತುವೆಗಳ ಸುರಕ್ಷೆಗಾಗಿ ಭಾರತೀಯ ರಸ್ತೆ ಕಾಂಗ್ರೆಸ್ ಲೋಕೋಪಯೋಗಿ ಇಲಾಖೆ ಮತ್ತು ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ ಪ್ರತ್ಯೇಕ ಹಾಗೂ ಸ್ಪಷ್ಟ ಮಾರ್ಗಸೂಚಿಗಳನ್ನು ನೀಡಿವೆ. ಮುಂಗಾರು ಆರಂಭಕ್ಕೆ ಕನಿಷ್ಠ ಎರಡು ತಿಂಗಳು ಮುಂಚಿತವಾಗಿ ಎಲ್ಲ ಸೇತುವೆಗಳ ತಪಾಸಣೆ ಮಾಡಬೇಕು. ಸೇತುವೆಯ ಬೇರಿಂಗ್‌ಗಳು, ಜಾಯಿಂಟ್‌ಗಳು ರಸ್ತೆ ಮತ್ತು ಸೇತುವೆ ಕೂಡುವ ಜಾಗ ಮತ್ತು ರೇಲಿಂಗ್‌ಗಳನ್ನು ಕಡ್ಡಾಯವಾಗಿ ತಪಾಸಣೆ ನಡೆಸಿ ದುರಸ್ತಿ ಮಾಡಬೇಕು. ಮಳೆಗಾಲದಲ್ಲಿ ರಸ್ತೆ ಕುಸಿಯದಂತೆ ತಡೆಯಲು ರಸ್ತೆಯ ಮೇಲ್ಮೈಯಲ್ಲಿರುವ ಹೊಂಡಗಳನ್ನು ಮತ್ತು ಬಿರುಕುಗಳನ್ನು ಜಲನಿರೋಧಕ ಮಿಶ್ರಣಗಳಿಂದ ಮುಚ್ಚಬೇಕು. ರಸ್ತೆಯ ಮೇಲಿನ ನೀರು 10ರಿಂದ 15 ನಿಮಿಷಗಳಿಗಿಂತ ಹೆಚ್ಚು ಕಾಲ ನಿಲ್ಲದಂತೆ ಚರಂಡಿಗಳನ್ನು ಇಳಿಜಾರು ಮಾಡಬೇಕು ಮತ್ತು ಹೂಳುಮುಕ್ತವಾಗಿರಬೇಕು. ಹೀಗೆ ಪ್ರತಿ ವರ್ಷ ಮಾರ್ಚ್ ಅಥವಾ ಏಪ್ರಿಲ್‌ನಲ್ಲಿ ಪ್ರಧಾನ ಕಚೇರಿಯಿಂದ ಎಲ್ಲ ಜಿಲ್ಲಾ ಇಂಜಿನಿಯರ್‌ಗಳಿಗೆ ಹೊರಡಿಸುವ ಅಧಿಕೃತ ಸುತ್ತೋಲೆಯಂತೆ ಮೇ 15 ಅಥವಾ ಮೇ 31ರ ಒಳಗಾಗಿ ರಸ್ತೆ ಬದಿ ಹೂಳೆತ್ತುವುದು ಮತ್ತು ಪ್ಯಾಚ್‌ವರ್ಕ್ ಮುಗಿಯಬೇಕು. ರಸ್ತೆ ಬದಿಯ ಜಂಗಲ್ ಕಟಿಂಗ್, ಹೆದ್ದಾರಿಯ ಇಕ್ಕೆಲಗಳಲ್ಲಿ ಬೆಳೆದಿರುವ ಗಿಡಗಂಟಿಗಳನ್ನು ಕತ್ತರಿಸಬೇಕು. ಈ ಹಿಂದೆ ಕುಸಿದಿದ್ದ ರಸ್ತೆ ಅಥವಾ ಸೇತುವೆಗಳನ್ನು ಅತ್ಯಂತ ಸೂಕ್ಷ್ಮ ವಲಯ ಎಂದು ಗುರುತಿಸಿ ಅಲ್ಲಿ ಹೆಚ್ಚುವರಿ ನಿಗಾ ಇಡಬೇಕು. ಆದರೆ ಈ ಎಲ್ಲ ನಿಯಮಗಳನ್ನು ಕುದುರೆಮುಖ ರಸ್ತೆಯ ವಿಚಾರದಲ್ಲಿ ಇಲಾಖೆ ಅಧಿಕಾರಿಗಳು ಉಲ್ಲಂಘಿಸಿದ್ದಾರೆ.