ಎಸ್‌ಐಆರ್‌ಗೆ ಸಾರ್ವಜನಿಕರ ಸಹಕಾರ ಅಗತ್ಯ

ಮೂಡಿಗೆರೆ: ಚುನಾವಣಾ ಆಯೋಗದ ನಿರ್ದೇಶನದಂತೆ ಮತದಾರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ ನಡೆಯುತ್ತಿದೆ. ಈ ಪ್ರಕ್ರಿಯೆ ಪಾರದರ್ಶಕವಾಗಿ ನಡೆಯಲು ಹಾಗೂ ಇದರ ಯಶಸ್ಸಿಗೆ ಸಾರ್ವಜನಿಕರ ಸಹಕಾರ ಅಗತ್ಯ ಎಂದು ಉಪವಿಭಾಗಾಧಿಕಾರಿ ನಟೇಶ್ ಹೇಳಿದರು.

ತಹಸಿಲ್ದಾರ್ ಕಚೇರಿ ಸಭಾಂಗಣದಲ್ಲಿ ಎಸ್‌ಐಆರ್ ಪ್ರಕ್ರಿಯೆಗೆ ಸಂಬಂಧಿಸಿದಂತೆ ವಿವಿಧ ಪಕ್ಷಗಳ ಮತಗಟ್ಟೆ ಏಜೆಂಟ್‌ಗಳ ಸಭೆಯಲ್ಲಿ ಮಾತನಾಡಿ, ಮೂಡಿಗೆರೆ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ 109, ಚಿಕ್ಕಮಗಳೂರು ತಾಲೂಕಿನ 4 ಹೋಬಳಿಗಳಲ್ಲಿ 89, ಕಳಸ ತಾಲೂಕಿನಲ್ಲಿ 33 ಮತಗಟ್ಟೆ ಕೇಂದ್ರವಿದೆ. ಮೂಡಿಗೆರೆ 77,062, ಚಿಕ್ಕಮಗಳೂರು ತಾಲೂಕಿನ 4 ಹೋಬಳಿಯಲ್ಲಿ 65,510, ಕಳಸ 24,727, ಸಂಪರ್ಕಕ್ಕೆ ಸಿಗದ 465 ಮತದಾರರು ಸೇರಿದಂತೆ ಒಟ್ಟು 1,67,299 ಮತದಾರರಿದ್ದಾರೆ. ಅದರ ಪೈಕಿ 1,63,296 ಮ್ಯಾಪಿಂಗ್ ಅರ್ಜಿ ವಿತರಣೆಯಾಗಿದೆ. ಮತಗಟ್ಟೆ ಅಧಿಕಾರಿಗಳು, ಮೇಲ್ವಿಚಾರಕರು, ಎಸ್‌ಐಆರ್ ನೋಡಲ್ ಅಧಿಕಾರಿಗಳು ಮನೆ ಮನೆಗೆ ಭೇಟಿ ನೀಡಿ 59,936 ಅರ್ಜಿಗಳನ್ನು ಪಡೆದ ಬಳಿಕ ಅದನ್ನು ಪರಿಶೀಲಿಸಿ ಗಣಕೀಕರಣಗೊಳಿಸಿದ್ದಾರೆ ಎಂದು ಮಾಹಿತಿ ನೀಡಿದರು.

ಬಾಕಿ ಉಳಿದಿರುವ ಅರ್ಜಿಗಳ ಪ್ರಕ್ರಿಯೆ ಚುರುಕುಗೊಳಿಸಲು ಕ್ರಮ ವಹಿಸಲಾಗಿದೆ. ಪರಿಷ್ಕರಣೆಗಾಗಿ ಮತಗಟ್ಟೆ ಅಧಿಕಾರಿಗಳು ಪ್ರತಿ ಮನೆಗಳಿಗೆ ಭೇಟಿ ನೀಡಿದಾಗ ಮತದಾರರು ತಮ್ಮ ಹೆಸರು, ವಿಳಾಸ ಹಾಗೂ ಇತರ ವಿವರಗಳನ್ನು ಅಗತ್ಯವಾಗಿ ನೀಡುವ ಜತೆಗೆ ಭರ್ತಿ ಮಾಡಿದ ಅರ್ಜಿಗಳನ್ನು ಸ್ವತಃ ಪರಿಶೀದಿಸಿಕೊಳ್ಳಬೇಕು. ಮತಗಟ್ಟೆ ಅಧಿಕಾರಿಗಳು ಒಂದೇ ಕಡೆ ಕುಳಿತು ಪ್ರಕ್ರಿಯೆ ನಡೆಸಲು ಅವಕಾಶವಿಲ್ಲ. ಅವರಿಗೆ ಮನೆ ಮನೆಗೆ ಭೇಟಿ ನೀಡಲು ಸೂಚಿಸಲಾಗಿದೆ ಎಂದರು.

ಸಾರ್ವಜನಿಕರಿಂದ ಆಕ್ಷೇಪಣೆಗಲಿದ್ದರೆ ಆಗಸ್ಟ್ನಲ್ಲಿ ನಡೆಸುವ ಪರಿಷ್ಕರಣೆ ಸಂದರ್ಭದಲ್ಲಿ ಆಕ್ಷೇಪಣೆ ಸಲ್ಲಿಸಲು ಅವಕಾಶ ನೀಡಲಾಗಿದೆ. ನಿಖರ ಹಾಗೂ ದೋಷ ರಹಿತ ನವೀಕೃತ ಮತದಾರರ ಪಟ್ಟಿಯನ್ನು ಸಿದ್ಧಪಡಿಸುವ ಉದ್ದೇಶದಿಂದ ಎಲ್ಲ ಮತದಾರರು ಚುನಾವಣಾ ಆಯೋಗದ ಅಧಿಕಾರಿಗಳೊಂದಿಗೆ ಸಹಕರಿಸಬೇಕು ಎಂದು ಮನವಿ ಮಾಡಿದರು.

ತಹಸಿಲ್ದಾರ್ ಎಸ್.ಅಶ್ವಿನಿ, ತಾಪಂ ಇಒ ದಯಾವತಿ, ಸಂಪತ್ ಕುಮಾರ್, ನೂರುಲ್ಲಾ ಇತರರಿದ್ದರು.