ಶೃಂಗೇರಿ ಸಮೀಪದ ತುಂಗಾನದಿಗೆ ಬ್ಯಾರೇಜ್ ನಿರ್ಮಾಣಕ್ಕೆ 89 ಕೋಟಿ ರೂ.

ಶೃಂಗೇರಿ: ಶ್ರೀಶಾರದಾ ಪೀಠದ ತುಂಗಾ ನದಿಗೆ ಬ್ಯಾರೇಜ್ ನಿರ್ಮಾಣಕ್ಕೆ ಸರ್ಕಾರ 89 ಕೋಟಿ ರೂ.ಅನುದಾನ ನೀಡಿದೆ.

ಶ್ರೀಮಠದಲ್ಲಿ ವರ್ಷಪೂರ್ತಿ ತುಂಗಾ ನದಿಯಲ್ಲಿ ಭಕ್ತಾದಿಗಳು ಧಾರ್ಮಿಕ ವಿಧಿ ವಿಧಾನ ನೆರವೇರಿಸಲು ನೀರಿನ ಕೊರತೆಯಾಗದಂತೆ ನದಿಗೆ ಅಡ್ಡಲಾಗಿ ಬ್ಯಾರೇಜ್ ನಿರ್ಮಾಣದ ಕಾಮಗಾರಿ ಶೀಘ್ರದಲ್ಲಿ ಆರಂಭಗೊಳ್ಳಲಿದೆ. ಶ್ರೀ ಮಠದ ಮನವಿಯಂತೆ ಶಾಸಕ ಟಿ.ಡಿ.ರಾಜೇಗೌಡ ಕೋರಿಕೆ ಮೇರೆಗೆ ಉಪ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಯೋಜನೆಯನ್ನು ಕಾರ್ಯರೂಪಕ್ಕೆ ತಂದಿದ್ದಾರೆ.

ನದಿ ಹರಿವಿನ ಉದ್ದಕ್ಕೂ 19ಬ್ಯಾರೇಜ್‌ನಲ್ಲಿ ವಿಶ್ವೇಶ್ವರಯ್ಯ ಜಲ ನಿಗಮದ ಸಭೆಯಲ್ಲಿ ಉಪ ಮುಖ್ಯಮಂತ್ರಿಗಳು ಈ ಬ್ಯಾರೇಜ್ ನಿರ್ಮಾಣಕ್ಕೆ ಹಸಿರು ನಿಶಾನೆ ತೋರಿದ್ದಾರೆ. ಶ್ರೀಮಠದ ತೂಗು ಸೇತುವೆ ಕೆಳ ಭಾಗದಲ್ಲಿ ನೀರು ಸಂಗ್ರಹಿಸಲು ಬ್ಯಾರೇಜ್ ನಿರ್ಮಿಸಲಿದ್ದಾರೆ. ಅಡಿಪಾಯ ಹಾಕಲು ಈಗಾಗಲೇ ಪರೀಕ್ಷಾ ಕಾರ್ಯ ನಡೆಸಿದ್ದು, 1ಕೋಟಿ ರೂ.ವೆಚ್ಚದ ಟೆಂಡರ್ ಪ್ರಕ್ರಿಯೆ ನಡೆದಿದೆ. ಬೆಂಗಳೂರಿನ ಡಿಸೈನ್ ಕನ್ಸೆಲ್ಟಿಂಗ್ ಕಂಪನಿ ಗುತ್ತಿಗೆ ಪಡೆದುಕೊಂಡಿದೆ.

ಅಂದಾಜು 4-5 ಮೀ.ನದಿಯ ಕೆಳಭಾಗದಲ್ಲಿ ಗಟ್ಟಿ ಬಂಡೆ ಸಿಗುವರೆಗೂ ಪರೀಕ್ಷೆ ನಡೆಸಿ ಕಾಮಗಾರಿ ಆರಂಭಿಸಲಿದೆ. ಬ್ಯಾರೇಜ್ 135-140 ಮೀ ಅಗಲವಿದ್ದು, ಎತ್ತರ ಅಂದಾಜು 3 ಮೀ.ಇರಲಿದೆ. ಕಪ್ಪೆ ಶಂಕರ ಮಟ್ಟದವರೆಗೂ ನೀರು ನಿಲ್ಲಲಿದೆ. ನರಸಿಂಹವನದ ಗುರುಭವನಕ್ಕೆ ತೆರಳಲು ಯಾವುದೇ ಸಮಸ್ಯೆ ಉಂಟಾಗದಂತೆ ರೂಪಿಸಲಾಗಿದೆ. ನೀರು ನಿಲ್ಲಲು ನದಿಯಲ್ಲಿರುವ ಮಣ್ಣು ಹಾಗೂ ಕೆಸರು ತೆಗೆಯಲಾಗುವುದು. ಮಣ್ಣು ಕೊರೆಯುವ ಸ್ಥಳದಲ್ಲಿ ತಡೆಗೋಡೆ ನಿರ್ಮಿಸಲಾಗುತ್ತದೆ.

ಮಳೆಗಾಲದಲ್ಲಿ ನೀರು ಸರಾಗವಾಗಿ ಹರಿಯಲು ಗೇಟ್ ಅಳವಡಿಸಲಾಗುತ್ತದೆ. ಬ್ಯಾರೇಜ್ ನಿರ್ಮಾಣದಿಂದ ಅಂತರ್ಜಲ ಹೆಚ್ಚಾಗಲಿದ್ದು, ಪ್ರವಾಸೋದ್ಯಮಕ್ಕೆ ಅನುಕೂಲ ಕಲ್ಪಿಸಲಿದೆ. ಮುಂದಿನ ದಿನದಲ್ಲಿ ತುಂಗಾನದಿ ಸೇತುವೆ ಮೆಣಸೆ ಹಾಗೂ ಹರಿಹರಪುರ ಮಠದ ಸಮೀಪ ಬ್ಯಾರೇಜ್ ನಿರ್ಮಿಸಲು ಉದ್ದೇಶಿಸಲಾಗಿದೆ.