ಕೊಪ್ಪ ಪಟ್ಟಣ ಹಲವು ಪ್ರವಾಸಿ ಕೇಂದ್ರಗಳಿಗೆ ಸಂಪರ್ಕ ಸಾಧಿಸುತ್ತದೆ. ಕಮಂಡಲ ಗಣಪತಿ, ಹರಿಹರಪುರ, ಪಂಚಮಿಕಲ್ಲು, ಸೀತಾವನ, ಶಕಠಪುರ, ಗೌರಿಗದ್ದೆ, ಬೊಮ್ಮಲಾಪುರಕ್ಕೆ ಸಂಪರ್ಕದ ಕೊಂಡಿಯಾಗಿದೆ. ಅದಲ್ಲದೇ ಶೃಂಗೇರಿ, ರಂಭಾಪುರಿಪೀಠ, ಬಸ್ತಿಮಠ ಸಂಪರ್ಕಕ್ಕೂ ಕೊಪ್ಪ ರಸ್ತೆಗಳು ಪ್ರಮುಖವಾಗಿವೆ. ಪ್ರವಾಸಿ ತಾಣಗಳ ಸಂಪರ್ಕ ಕೊಂಡಿಯಾಗಿರುವ ತಾಲೂಕಿನ ಪ್ರಮುಖ ರಸ್ತೆಗಳೇ ಗುಂಡಿಮಯವಾಗಿರುವುದರಿಂದ ದೂರದಿಂದ ಊರುಗಳಿಂದ ಬರುವ ಪ್ರವಾಸಿಗರು ಸ್ಥಳೀಯ ಆಡಳಿತ, ಜನಪ್ರತಿನಿಧಿಗಳಿಗೆ ಹಿಡಿಶಾಪ ಹಾಕುತ್ತಾ ಸಾಗುತ್ತಿದ್ದಾರೆ. ಪಟ್ಟಣದ ಮುಖ್ಯ ರಸ್ತೆಯಂತೂ ಸಂಪೂರ್ಣ ಹದಗೆಟ್ಟಿದ್ದು, ಇಲ್ಲಿನ ವಾಹನ ಚಾಲನೆ ಮಾಡುವುದಕ್ಕಿಂತ ಗುಂಡಿಗಳನ್ನು ತಪ್ಪಿಸುವುದೇ ಒಂದು ದೊಡ್ಡ ಸವಾಲು.! ಮೇಲಿನಪೇಟೆಯ ಕುವೆಂಪು ವೃತ್ತದಿಂದ ದ್ಯಾವೇಗೌಡ ವೃತ್ತದವರೆಗಿನ ರಸ್ತೆಯ ಸ್ಥಿತಿ ಇದಕ್ಕಿಂತ ಭಿನ್ನವಾಗಿಲ್ಲ.
