ಮಳೆ ಇಲ್ಲದೆ ಭತ್ತದ ಕೃಷಿ ಸ್ಥಗಿತ

ಮೂಡಿಗೆರೆ: ಆರು ವರ್ಷದಿಂದ ಮೇ ಕೊನೆಯ ವಾರದಲ್ಲಿ ಮುಂಗಾರು ಆರಂಭವಾಗುತ್ತಿತ್ತು. ಈ ಬಾರಿ ಜೂನ್ ಅಂತ್ಯದ ದಿನಗಳು ಹತ್ತಿರವಾಗುತ್ತಿದ್ದರೂ ಮಳೆಯಿಲ್ಲ. ನಿರೀಕ್ಷಿತ ಪ್ರಮಾಣದಲ್ಲಿ ಮಳೆಯಾದರೆ ರೈತರು ಮತ್ತು ಕಾಫಿ ಬೆಳೆಗಾರರಿಗೆ ಹೆಚ್ಚಿನ ಅನುಕೂಲವಾಗುತ್ತದೆ. ಮುಂಗಾರು ಆರಂಭವಾಗದಿರುವ ಕಾರಣ ತಾಲೂಕಿನ ಕಾಫಿ, ಕಾಳುಮೆಣಸು ಬೆಳೆಗಾರರು ಹಾಗೂ ಭತ್ತ, ಶುಂಠಿ ಬೆಳೆಯುವ ರೈತರನ್ನು ಚಿಂತೆಗೀಡು ಮಾಡಿದೆ. 

ತಾಲೂಕಿನಾದ್ಯಂತ ಜೂನ್ ಮೊದಲ ವಾರದಲ್ಲಿ ಸುರಿದ ಮಳೆ ಬಳಿಕ ಕಣ್ಮರೆಯಾಗಿದೆ. ಬೇಸಿಗೆಯ ವಾತಾವರಣ ಮಳೆಗಾಲದಲ್ಲೂ ನಿರ್ಮಾಣವಾಗಿರುವುದರಿಂದ ಬೆಳೆಗಾರರು ಆತಂಕಗೊಂಡಿದ್ದಾರೆ. ಕಳೆದ ವರ್ಷ ಜೂನ್ ಮಧ್ಯದ ವೇಳೆಗೆ ಸರಾಸರಿ 30 ಇಂಚು ಮಳೆಯಾಗಿತ್ತು. ಈ ಬಾರಿ ತಾಲೂಕಿನ ಬಹುತೇಕ ಗ್ರಾಮಗಳಲ್ಲಿ 10 ಇಂಚು ಕೂಡ ಮಳೆಯಾಗಿಲ್ಲ. ಮಳೆ ತೀರ ಕಡಿಮೆಯಾಗಿರುವುದರಿಂದ ಕಾಫಿ, ಕಾಳುಮೆಣಸಿನ ಬೆಳೆಗಾರರು ಮತ್ತು ಭತ್ತ, ಶುಂಠಿ ಬೆಳೆಯುವ ರೈತರು ನಷ್ಟ ಅನುಭವಿಸುವ ಸಾಧ್ಯತೆ ಇದೆ. 

ತಾಲೂಕಿನಲ್ಲಿ ಭತ್ತದ ಬೆಳೆ ಗಣನೀಯವಾಗಿ ಕ್ಷೀಣಿಸಿದೆ. ಕಳೆದ 5 ವರ್ಷದಲ್ಲಿ 4 ಸಾವಿರ ಹೆಕ್ಟೇರ್‌ನಷ್ಟು ಪ್ರದೇಶದಲ್ಲಿ ಭತ್ತದ ಬೆಳೆ ನಶಿಸಿದೆ. ಅತಿವೃಷ್ಟಿ, ಅನಾವೃಷ್ಟಿ, ಕಾಡಾನೆ ಇತರ ಕಾಡುಪ್ರಾಣಿಗಳ ಹಾವಳಿಯಿಂದಾಗಿ ರೈತರು ಗದ್ದೆಗಳನ್ನು ಪಾಳು ಬಿಡುತ್ತಿದ್ದಾರೆ. ಈಗ ತಾಲೂಕಿನಲ್ಲಿ 2500 ಹೆಕ್ಟೇರ್‌ನಷ್ಟು ಪ್ರದೇಶದಲ್ಲಿ ಮಾತ್ರ ಭತ್ತ ಬೆಳೆಯಲಾಗುತ್ತದೆ. ಜೂನ್ ಮೊದಲ ಮಳೆಗೆ ಸಸಿಮಡಿ ನಿರ್ಮಿಸಲು ಭತ್ತದ ಗದ್ದೆಗಳನ್ನು ಉಳುಮೆ ಮಾಡಲಾಗಿದೆ. ಸಸಿಮಡಿಗೆ ಹದ ಮಾಡಿದ ಗದ್ದೆಗಳೆಲ್ಲವೂ ನೀರಿಲ್ಲದೆ ಬರಡಾಗಿವೆ. ಈಗ ಮಳೆ ಆರಂಭವಾದರೂ ಸಸಿ ಮಡಿಗಳನ್ನು ರೈತರು ನಿರ್ಮಿಸಿಕೊಳ್ಳಲು ಕನಿಷ್ಠ 25 ದಿನ ಬೇಕಾಗುತ್ತದೆ. ಹಾಗಾಗಿ ಜುಲೈ ಅಂತ್ಯದವರೆಗೂ ಗದ್ದೆ ನಾಟಿ ಪ್ರಾರಂಭವಾಗುವ ಬಗ್ಗೆ ರೈತರು ಅನುಮಾನ ವ್ಯಕ್ತಪಡಿಸುತ್ತಿದ್ದಾರೆ.