ರೈಲ್ವೆ ಹೋರಾಟ ಸಮಿತಿ ಅಸ್ತಿತ್ವಕ್ಕೆ (Railway)

ಎನ್.ಆರ್.ಪುರ: ರೈಲು ಮಾರ್ಗವನ್ನು ಎನ್.ಆರ್.ಪುರಕ್ಕೆ ಪಡೆಯುವುದೇ ನಮ್ಮ ಹೋರಾಟ ಎಂದು ನರಸಿಂಹರಾಜಪುರ ರೈಲ್ವೆ ಹೋರಾಟ ಸಮಿತಿ ಪ್ರಧಾನ ಸಂಚಾಲಕ ಮಂಜು ಎನ್. ಗೌಡ ಹೇಳಿದರು.

ಭಾನುವಾರ ನಡೆದ ನರಸಿಂಹರಾಜಪುರ ರೈಲ್ವೆ ಹೋರಾಟ ಸಮಿತಿ ಪದಾಧಿಕಾರಿಗಳ ಆಯ್ಕೆ ಕಾರ್ಯಕ್ರಮದಲ್ಲಿ ಮಾತನಾಡಿ, ಈ ಹಿಂದೆ ಭದ್ರಾವತಿಯಿಂದ ಎನ್.ಆರ್.ಪುರಕ್ಕೆ ರೈಲು ಮಾರ್ಗವಿತ್ತು. ಈಗ ಶಿವಮೊಗ್ಗದಿಂದ ಭದ್ರಾವತಿ, ಎನ್.ಆರ್.ಪುರ, ಕೊಪ್ಪ, ಶೃಂಗೇರಿ ಮೂಲಕ ಮಂಗಳೂರು ತಲುಪುವ ಯೋಜನೆ ಆಗಬೇಕು ಎಂಬುವುದು ಈ ಸಮಿತಿ ಮುಖ್ಯಗುರಿ. ನಮ್ಮೂರಿನ ಅಭಿವೃದ್ಧಿಗಾಗಿ ಎನ್.ಆರ್.ಪುರಕ್ಕೆ ರೈಲು ಬೇಕೆನ್ನುವ ನಮ್ಮ ಹೋರಾಟಕ್ಕೆ ಪಕ್ಷಾತೀತವಾಗಿ, ಜಾತ್ಯತೀತವಾಗಿ, ಸಂಘ ಸಂಸ್ಥೆಗಳು,  ಸಾರ್ವಜನಿಕರು ಬೆಂಬಲ ನೀಡಬೇಕು ಎಂದು ಮನವಿ ಮಾಡಿದರು.

ಗೌರವ ಸಂಚಾಲಕ ಸತೀಶ್ ಆಚಾರ್ ಮಾತನಾಡಿ, 1960ರಲ್ಲಿ ಲಕ್ಕವಳ್ಳಿಯಲ್ಲಿ ಭದ್ರಾ ನದಿಗೆ ಅಣೆಕಟ್ಟು ನಿರ್ಮಿಸಿದ ಪರಿಣಾಮ ಎನ್.ಆರ್.ಪುರದ ಹಲವು ಹಳ್ಳಿಗಳು ಮುಳುಗಡೆಯಾಗಿದ್ದು ಸರ್ಕಾರ ಪ್ರತಿಯಾಗಿ ಈ ಊರಿನ ಅಭಿವೃದ್ಧಿಗೆ ಯಾವುದೇ ಪರ್ಯಾಯ ಯೋಜನೆಯನ್ನು ಇಲ್ಲಿಯವರೆಗೆ ನೀಡಲಿಲ್ಲ, ಈಗ ಈ ರೈಲು ಮಾರ್ಗ ಕೂಡ ತಪ್ಪಿಹೋಗುತ್ತಿದೆ. ಶಿವಮೊಗ್ಗದಿಂದ ಮಂಗಳೂರಿಗೆ ಹೊಸ ರೈಲು ಮಾರ್ಗ ಯೋಜನೆಯು ಈ ಹಿಂದೆ ಎನ್.ಆರ್.ಪುರದ ಮೂಲಕ ಹಾದುಹೋಗುವ ಮಾರ್ಗ ಯೋಜನೆಯಾಗಿತ್ತು. ಆದರೆ ಇದೀಗ ಸದರಿ ರೈಲು ಮಾರ್ಗವು ಶಿವಮೊಗ್ಗದಿಂದ ಅರಸಾಳು, ಹೊಸನಗರ, ರಿಪ್ಪನ್‌ಪೇಟೆ, ತೀರ್ಥಹಳ್ಳಿ, ಶೃಂಗೇರಿ ಮೂಲಕ ಮಂಗಳೂರು ತಲುಪುವ ಯೋಜನೆಯಾಗಿ ಬದಲಾಗುತ್ತಿದೆ. ಎನ್.ಆರ್.ಪುರದ ಮೂಲಕವೇ ಸದರಿ ರೈಲು ಮಾರ್ಗ ಶೃಂಗೇರಿಗೆ ಹಾದುಹೋಗಬೇಕು ಎಂಬ ಉದ್ದೇಶ ಹೊಂದಲಾಗಿದೆ ಎಂದರು.