ಬಡ ಹೆಣ್ಣು ಮಕ್ಕಳ ಮದುವೆಗೆ ಸಹಾಯಧನ ನೀಡಿ

ಎನ್.ಆರ್.ಪುರ: ಬಡವರ ಹೆಣ್ಣು ಮಕ್ಕಳ ಮದುವೆಗೆ 5 ಸಾವಿರ ರೂ. ಸಹಾಯಧನ ಕೊಡುವ ಯೋಜನೆ ಜಾರಿಗೊಳಿಸಬೇಕು ಎಂದು ಪಪಂ ಮಾಜಿ ಅಧ್ಯಕ್ಷೆ ಜುಬೇದಾ ಹೇಳಿದರು.

ಪಟ್ಟಣ ಪಂಚಾಯಿತಿಯಲ್ಲಿ ಮಂಗಳವಾರ 2026-27ನೇ ಸಾಲಿನ ಬಜೆಟ್ ತಯಾರಿ ಪೂರ್ವಭಾವಿ ಸಭೆಯಲ್ಲಿ ಸಲಹೆ ನೀಡಿ, ತಂದೆ, ತಾಯಿ ಇಲ್ಲದ ಅಥವಾ ಏಕ ಪಾಲಕರನ್ನು ಹೊಂದಿರುವ ಹೆಣ್ಣು ಮಕ್ಕಳ ವಿವಾಹಕ್ಕೆ ಸಹಾಯ ಧನ ನೀಡಲು ಕ್ರಮ ತೆಗೆದುಕೊಳ್ಳಬೇಕು ಎಂದರು.

ಅಣ್ಣಪ್ಪ ಮಾತನಾಡಿ, ಪಟ್ಟಣದ ಎಸ್‌ಟಿ ಸಮುದಾಯದ ಮೇದರಾ ಜನಾಂಗಕ್ಕೆ ಮೀಸಲಿರುವ ಸ್ಮಶಾನದಲ್ಲಿ ಚಿತಾಗಾರದ ವ್ಯವಸ್ಥೆ ಮಾಡಬೇಕು. ವಿದ್ಯುತ್ ದೀಪ ಅಳವಡಿಸಬೇಕು ಎಂದು ಒತ್ತಾಯಿಸಿದರು.

ಪಟ್ಟಣದ ಒಂದನೇ ವಾರ್ಡ್‌ನ ಹಿಳುವಳ್ಳಿ ವ್ಯಾಪ್ತಿಯಲ್ಲಿರುವ ಸ್ಮಶಾನದಲ್ಲಿ ಶವಸಂಸ್ಕಾರಕ್ಕೆ ಅಳವಡಿಸಿರುವ ಕಬ್ಬಿಣದ ಬಾಕ್ಸ್ ಶಿಥಿಲಾವಸ್ಥೆ ತಲುಪಿದೆ. ಸ್ಮಶಾನದ ಮೇಲ್ಛಾವಣಿಯು ಶಿಥಿಲವಾಗಿದೆ. ಅಲ್ಲದೆ ಇಲ್ಲಿ ಬೆಳಕಿನ ವ್ಯವಸ್ಥೆಯ ಕೊರತೆಯಿದ್ದು ವಿದ್ಯುತ್ ದೀಪ ಅಳವಡಿಸಲು ಅನುದಾನ ಮೀಸಲಿಡಬೇಕು. ಪಟ್ಟಣ ಪಂಚಾಯಿತಿಯಿಂದ ಸರ್ಕಾರಿ ಶಾಲೆಯನ್ನು ದತ್ತು ಪಡೆದು ಅಭಿವೃದ್ಧಿಪಡಿಸಬೇಕು ಎಂದರು. 

ಪಟ್ಟಣ ಪಂಚಾಯಿತಿ ಆರ್ಥಿಕ ಸೌಲಭ್ಯಗಳನ್ನು ನೋಡಿಕೊಂಡು ಸರ್ಕಾರಿ ಶಾಲೆ ದತ್ತು ಪಡೆಯಲು ಚಿಂತನೆ ನಡೆಸಬಹುದು. ಪಟ್ಟಣದಲ್ಲಿ ಅಳವಡಿಸಿರುವ ಸಿಸಿಎಂಸ್ ದೀಪಗಳು ಸಮರ್ಪಕ ಬೆಳಕು ನೀಡುತ್ತಿಲ್ಲ ಎಂದು ತಹಸೀಲ್ದಾರ್ ಡಾ. ನೂರುಲ್‌ಹುದಾ ತಿಳಿಸಿದರು.

ರಸ್ತೆ ವಿಭಜಕ ಅಳವಡಿಸಿರುವ ಕಡೆ ಮಧ್ಯದಲ್ಲಿ ಹೂವು, ಹಣ್ಣಿನ ಗಿಡ ನೆಡಬಹುದು ಎಂಬ ಸಲಹೆ ನೀಡಲಾಯಿತು. ಈ ಬಗ್ಗೆ ಸಾಮಾಜಿಕ ವಲಯ ಅರಣ್ಯಾಧಿಕಾರಿಗೆ ಪತ್ರ ಬರೆಯುವಂತೆ ತಹಸೀಲ್ದಾರ್ ಸೂಚಿಸಿದರು. 

ಪಪಂ ಮುಖ್ಯಾಧಿಕಾರಿ ಆರ್.ವಿ.ಮಂಜುನಾಥ್ ಮಾತನಾಡಿ, ಪಪಂಗೆ 2025-26ನೇ ಸಾಲಿನಲ್ಲಿ ಆಸ್ತಿ ತೆರಿಗೆ 36.62 ಲಕ್ಷ ರೂ. ಬರಬೇಕಾಗಿತ್ತು. ಇದರಲ್ಲಿ 33.31 ಲಕ್ಷ  ರೂ. ವಸೂಲಾಗಿದೆ. ಮಾರ್ಚ್ ಅಂತ್ಯದೊಳಗೆ ಉಳಿದ ತೆರಿಗೆ ವಸೂಲಿ ಮಾಡಲಾಗುವುದು. ಕುಡಿಯುವ ನೀರಿನ ಶುಲ್ಕ 20.10 ಲಕ್ಷ ರೂ. ಬರಬೇಕಾಗಿತ್ತು. ಇದರಲ್ಲಿ 14 ಲಕ್ಷ ರೂ. ವಸೂಲಾತಿಯಾಗಿದೆ. ವ್ಯಾಪಾರ ಪರವಾನಗಿಯಿಂದ 2.25 ಲಕ್ಷ ರೂ. ಬರಬೇಕಾಗಿತ್ತು. ಇದರಲ್ಲಿ 1.96 ಲಕ್ಷ ರೂ. ವಸೂಲಾಗಿದೆ ಎಂದು ಮಾಹಿತಿ ನೀಡಿದರು. ಸುಬ್ರಹ್ಮಣ್ಯ, ರಜಿ, ಪಪಂ ಸಮುದಾಯ ಸಂಘಟನಾಧಿಕಾರಿ ಲಕ್ಷ್ಮಣ್ ಗೌಡ ಇದ್ದರು.