ಈ ವರ್ಷದ ಮುಂಗಾರಿನಲ್ಲಿ ಲಿಂಗದಹಳ್ಳಿ ಹೋಬಳಿಯಾದ್ಯಂತ ಈವರೆಗೂ ಶೇ.50ರಷ್ಟು, ಮಳೆ ಬಾರದೇ ರೈತರು ಬಿತ್ತನೆ ಮಾಡಿದ ಹುರುಳಿ, ಬಟಾಣಿ, ಆಲೂಗಡ್ಡೆ, ಅವರೆ, ಜೋಳ, ರಾಗಿ, ಭತ್ತ, ಚಂಡು ಹೂವಿನ ಬೆಳೆ ಒಣಗುತ್ತಿವೆ. ನಂದಿಬಟ್ಟಲು ಸುತ್ತಮುತ್ತಲ ಗ್ರಾಮಗಳ ವ್ಯಾಪ್ತಿಯಲ್ಲಿ ಮಳೆಗಾಗಿ ಈ ಭಾಗದ ಗ್ರಾಮಸ್ಥರು ಮಳೆ ಮಲ್ಲಪ್ಪನ ಬೆಟ್ಟಕ್ಕೆ ನಂದಿಬಟ್ಟಲು ಗ್ರಾಮ ದೇವರಾಗಿರುವ ಕೋಟೆ ಶ್ರೀ ಲಕ್ಷ್ಮೀರಂಗನಾಥ ಸ್ವಾಮಿ ಹೊರಡುವ ದೇವರನ್ನು ಕರೆತಂದು ಮಳೆ ಮಲ್ಲಪ್ಪ ದೇವರ ಸನ್ನಿಧಾನದಲ್ಲಿ ಶ್ರೀಲಕ್ಷ್ಮೀರಂಗನಾಥ ಸ್ವಾಮಿ ದೇವರಿಗೆ ವಿವಿಧ ಭಕ್ಷಗಳಿಂದ ತಯಾರಿಸಿದ ಎಡೆ ಸೇವೆ ಸಲ್ಲಿಸಿದರು. ವಿವಿಧ ಎಡೆ ಪೂಜೆಗಳ ಪೂಜೆ ಸ್ವೀಕರಿಸಿ ಭಕ್ತರ ಬೇಡಿಕೆಗೆ ಸ್ಪಂದಿಸುವ ಮಳೆ ಮಲ್ಲಪ್ಪ ಸ್ವಾಮಿ ಮತ್ತು ಕೋಟೆ ಶ್ರೀಲಕ್ಷ್ಮೀ ರಂಗನಾಥ ಸ್ವಾಮಿ ದೇವರು ಭಕ್ತರು ನೀಡಿದ ಎಡೆ ಸೇವೆಗಳಿಂದ ಸಂತೃಪ್ತರಾಗಿ ಮಳೆ ಸುರಿಸುತ್ತಾರೆ ಎಂಬ ಪ್ರತೀತಿ ಇದೆ. ಈ ದೇವರಿಗೆ ಪೂಜೆ ಸಲ್ಲಿಸಿದಾಗ ಉತ್ತಮ ಮಳೆಯಾಗಿದೆ.
