ಪತ್ರಿ ವರ್ಷ ಕ್ಷೀಣಿಸುತ್ತಿದೆ ಭತ್ತದ ಬೆಳೆ (paddy )

ಮೂಡಿಗೆರೆ: ಕಾರ್ಮಿಕರ ಕೊರತೆ, ಕಾಡುಪ್ರಾಣಿ ಹಾವಳಿ ವ್ಯತಿರಿಕ್ತ ಹವಾಮಾನದಿಂದ ಭತ್ತ ಬೆಳೆಯಲು ರೈತರು ಹಿಂದೇಟು ಹಾಕುತ್ತಿದ್ದಾರೆ.

ಜೂನ್ ಮೊದಲ ವಾರದಲ್ಲಿ ಸಸಿಮಡಿ ಮಾಡಬೇಕಾಗಿತ್ತು. ಆರಂಭಿಕ ಮಳೆ ಕೊರತೆಯಿಂದ ಸಸಿಮಡಿ ಸಿದ್ಧಪಡಿಸಲು ರೈತರಿಗೆ ಕಷ್ಟವಾಗಿತ್ತು. ಜೂನ್ ಅಂತ್ಯದಲ್ಲಿ ಒಂದು ವಾರ ಮಳೆಯಾಗಿದ್ದರಿಂದ ಸಸಿಮಡಿ ತಯಾರಿಕೆಗೆ ರೈತರು ಗದ್ದೆಗಿಳಿದರು. ಕೆಲವು ರೈತರು ನೀರಿನ ಅಂಶವಿಲ್ಲದ ಗದ್ದೆಯಲ್ಲಿ ಒಣಭೂಮಿ ಬೇಸಾಯದ ಮೂಲಕ ಸಸಿಮಡಿ ತಯಾರಿಕೆಗೆ ಮುಂದಾಗಿದ್ದರು. 

ಸಸಿ ಬೆಳೆಯುತ್ತಿದ್ದಂತೆ ಸಣ್ಣ ಪ್ರಮಾಣದಲ್ಲಿ ಮಳೆಯಾಗಿದ್ದು, ಸಸಿ ಬೆಳೆಯಲು ಮಳೆ ಸಹಕಾರ ನೀಡಿತ್ತು. ಈಗ ರೈತರು ಸಸಿಕೀಳುವ ಹಾಗೂ ನಾಟಿ ಮಾಡುವ ಕಾರ್ಯದಲ್ಲಿ ತೊಡಗಿದ್ದಾರೆ. ಮೂರ‌್ನಾಲ್ಕು ದಿನ ನಿರಂತರವಾಗಿ ಸುರಿದ ಮಳೆ ಭತ್ತದ ಸಸಿ ನಾಟಿಗೆ ವರದಾನವಾಗಿದೆ. ಮಳೆ ಹೆಚ್ಚಾದರೆ ಹೊಳೆ ಸಾಲಿನ ಗದ್ದೆಗಳು ಜಲಾವೃತವಾಗುತ್ತದೆ. ಆ ಗದ್ದೆಗಳಿಗೆ ಈಗಲೆ ನಾಟಿ ಮಾಡಿದರೆ ನದಿ ಉಕ್ಕಿ ಹೊಳೆ ಸಾಲಿನ ಗದ್ದೆಗಳಲ್ಲಿ ವಾರಗಟ್ಟಲೆ ಪ್ರವಾಹದ ನೀರು ನಿಂತಾಗ ನಾಟಿ ಮಾಡಿದ ಸಸಿ ಕೊಳೆತು ಹೋಗುತ್ತದೆ. ಇದರಿಂದಾಗಿ ಹೇಮಾವತಿ, ಜಪಾವತಿ, ಸುಂಡೆಕೆರೆ ಹಳ್ಳ, ಸುಣ್ಣದಹಳ್ಳ ಸೇರಿದಂತೆ ನದಿಯ ಸಾಲಿನ ಗದ್ದೆಗಳಿಗೆ ಆಗಸ್ಟ್ ಅಂತ್ಯದ ವೇಳೆಗೆ ರೈತರು ನಾಟಿ ಮಾಡಲು ಆರಂಭಿಸುತ್ತಾರೆ.

ಹೊಳೆ ಸಾಲಿನ ಗದ್ದೆಯಾದ್ದರಿಂದ ನಾಟಿ ಮಾಡುವುದು ತಡವಾದರೂ ತ್ವರಿತವಾಗಿ ತೆನೆ ಹೊರಟು ಎಲ್ಲ ಗದ್ದೆಗಳಲ್ಲೂ ಏಕಕಾಲದಲ್ಲಿ ಫೈರು ಕೊಯ್ಲಿಗೆ ಬರುತ್ತದೆ. ಭತ್ತದ ಸಸಿ ನಾಟಿ ಮುಗಿದ ಬಳಿಕ ನಿರಂತರವಾಗಿ ಒಂದು ತಿಂಗಳು ಮಳೆಯಾಗ ಬೇಕು. ಮಳೆ ಕೈ ಕೊಟ್ಟರೆ ಸಸಿಯ ಬೆಳವಣಿಗೆ ಕುಂಠಿತಗೊಳ್ಳುತ್ತದೆ. ಕೆಲವು ನೀರಾವರಿ ಪ್ರದೇಶದ ಗದ್ದೆಗಳಿಗೆ ಕೆರೆ, ಬಾವಿ, ನದಿಗಳಿಂದ ರೈತರು ಪಂಪ್‌ಸೆಟ್ ಮೂಲಕ ನಿರಾಯಿಸುತ್ತಾರೆ. ಸಮೀಪದಲ್ಲಿ ಕೆರೆ, ಬಾವಿ, ನದಿಗಳಿಲ್ಲದ ಗದ್ದೆಗಳ ರೈತರಿಗೆ ಬೆಳೆಯನ್ನು ಉಳಿಸಿಕೊಳ್ಳುವುದು ಕಷ್ಟ. 

ಸೋಮವಾರದಿಂದ ಮಳೆ ಸಂಪೂರ್ಣ ಬಿಡುವು ನೀಡಿ ಬಿಸಿಲು ಕಾಣಿಸಿಕೊಂಡಿದೆ. ಈ ವಾತಾವರಣ ಭತ್ತದ ಗದ್ದೆಗಳಿಗೆ ವ್ಯತಿರಿಕ್ತವಾಗಿದೆ. ನಾಟಿ ಸಮಯ ಮಳೆಯಾಗದಿದ್ದರೂ ಸಸಿ ಬೆಳೆಯಲು ಕಡ್ಡಾಯವಾಗಿ ಮಳೆಯಾಗಬೇಕು.