ಎರಡು ವರ್ಷವಾದರೂ ಉದ್ಘಾಟನೆಯಾಗದ ಓವರ್ ಹೆಡ್‌ಟ್ಯಾಂಕ್

ಬೀರೂರು: ಬೀರೂರು ಪುರಸಭೆ ಪಟ್ಟಣದಲ್ಲಿ ಭದ್ರಾ ನೀರು ಮತ್ತು ಕೊಳವೆ ಬಾವಿ ನೀರನ್ನು ಪೂರೈಸುತ್ತದೆ. ಆದರೆ ನೀರಿನ ಸಂಗ್ರಹಣೆ ಭವಣೆ ಪೂರೈಸಲು ನಿರ್ಮಿಸಿರುವ ಓವರ್‌ಹೆಡ್ ಟ್ಯಾಂಕ್ ಉದ್ಘಾಟನೆಯಾಗದೆ ಭದ್ರಾ ನೀರಿನ ಬದಲಾಗಿ ಕೊಳವೆ ಬಾವಿ ನೀರಿನ ಮೊರೆ ಹೋಗುವಂತಾಗಿದೆ.

ಮಾರ್ಗದ ಕ್ಯಾಂಪ್ ಭಾಗದಲ್ಲಿ ಇದ್ದ ನೀರಿನ ಟ್ಯಾಂಕ್ ಶಿಥಿಲಗೊಂಡಿದ್ದರಿಂದ ಎರಡು ವರ್ಷ ಕಾಮಗಾರಿ ನಡೆದು ಟ್ಯಾಂಕ್ ನಿರ್ಮಿಸಲಾಗಿದೆ. ಅದರೆ ಕೆಲವು ತಾಂತ್ರಿಕ ಸಮಸ್ಯೆಯಿಂದ ಉದ್ಘಾಟನೆಗೆ ಕಾಲ ಕೂಡಿ ಬಂದಿಲ್ಲ. ಮಾರ್ಗದ ಕ್ಯಾಂಪ್, ಬಳ್ಳಾರಿ ಕ್ಯಾಂಪ್, ಹೊಸಳಮ್ಮ ಬಡಾವಣೆ, ಅಶೋಕ ನಗರ, ಬೂತನಗುಡಿ ಬೀದಿ, ಉಪ್ಪಾರ ಕ್ಯಾಂಪ್, ಭಗವತ್ ನಗರ, ಭೋವಿ ಕಾಲನಿ ಸೇರಿದಂತೆ ವಲಯದ 7 ವಾರ್ಡ್‌ಗಳ ಸಾವಿರಾರು ಜನರಿಗೆ ಕೊಳವೆ ಬಾವಿ ನೀರು ಆಧಾರವಾಗಿದೆ. ಸಿದ್ದವಾಗಿರುವ ಟ್ಯಾಂಕ್ ಉದ್ಘಾಟನೆಯಾದರೆ ಇಲ್ಲಿನ ಜನತೆಗೆ ಭದ್ರಾ ನೀರು ಸಿಗುವ ನಿರೀಕ್ಷೆಯಲ್ಲಿದ್ದಾರೆ.

ಬೀರೂರು ಪಟ್ಟಣದಲ್ಲಿ ಅಮೃತ್ 2.0 ಯೋಜನೆ ಎರಡು ಹಂತಗಳಲ್ಲಿ ಅನುಷ್ಠಾನಗೊಳ್ಳುತ್ತಿದ್ದು, ಈವರೆಗೆ ಶೇ.60 ರಷ್ಟು ಕಾಮಗಾರಿ ಮುಗಿದಿದೆ. ಭದ್ರಾ ಕುಡಿಯುವ ನೀರು ಪೂರೈಕೆಯಲ್ಲಿ ಕಡೂರು ಮತ್ತು ಬೀರೂರು ಪುರಸಭೆಗಳು ಶೇ.60 ಮತ್ತು ಶೇ.40ರ ನಿರ್ವಹಣಾ ಜವಾಬ್ದಾರಿ ಹಂಚಿಕೊಂಡಿವೆ. ತರೀಕೆರೆ ಸಮೀಪದ ಜಲ ಶುದ್ಧೀಕರಣ ಘಟಕ ನಿರ್ವಹಣೆ ಕಡೂರು ಪುರಸಭೆ ನೋಡಿಕೊಂಡರೆ ಲಕ್ಕವಳ್ಳಿ ಸಮೀಪದ ಜಾಕ್‌ವೆಲ್ ನಿರ್ವಹಣೆ ಬೀರೂರು ಪುರಸಭೆಗೆ ಸೇರಿದೆ. ಪುರಸಭೆ ಸೀಮಿತ ಆದಾಯ ಹೊಂದಿದ್ದು, ಹಲವು ಕಾರ್ಯಗಳಿಗೆ ಸರ್ಕಾರದ ಅನುದಾನವನ್ನೇ ಆಧರಿಸಿರುವುದರಿಂದ ಅಮೃತ್ 2.0 ಯೋಜನೆಯು ಶೇ.15 ಅನುದಾನ ಭರಿಸುವುದು ಪುರಭೆಗೆ ಕಷ್ಟವಾಗಿದೆ.

ಅಮೃತ್ 2.0 ಯೋಜನೆಯು ಶೇ.60 ರಷ್ಟು ಕಾಮಗಾರಿ ಮಾತ್ರ ಮುಗಿದಿದೆ. ಇದು ಪೂರ್ಣಗೊಳ್ಳುವುದು ಯಾವಾಗ ಪ್ರಶ್ನೆಗೆ ಉತ್ತರ ಸಿಗದಂತಾಗಿದೆ. ಅಮೃತ್ 2.0 ಯೋಜನೆ ಜಾರಿಯಾದರೆ ನೀರಿನ ಪೂರೈಕೆಯಲ್ಲಿ ಸಮಸ್ಯೆ ಪರಿಹಾರವಾಗುವ ಜತೆಗೆ ಸೋರಿಕೆ ಕಡಿಮೆಯಾಗಲಿದೆ. ಪುರಸಭೆ ಯೋಜನೆ ಸಮರ್ಪಕ ಅನುಷ್ಟಾನದ ಬಳಿಕ ನೀರಿನ ಕರ ವಸೂಲಿಯಲ್ಲಿ ಪ್ರಗತಿ ಸಾಧಿಸಬಹುದು ಎನ್ನುವ ನಿರೀಕ್ಷೆಯಲ್ಲಿದೆ ಪುರಸಭೆ.

ಬೀರೂರು ಪಟ್ಟಣದಲ್ಲಿ ಸದ್ಯ 3-4 ದಿನಗಳಿಗೆ ಒಮ್ಮೆ ನೀರು ಪೂರೈಸಲಾಗುತ್ತಿದೆ. ಶುದ್ಧೀಕರಣ ಘಟಕದ ಸಮೀಪ ಸಮಸ್ಯೆಯಾದರೆ ಕೆಲವೊಮ್ಮೆ ವಾರಗಟ್ಟಲೆ ಭದ್ರಾ ನೀರು ಪೂರೈಕೆಯಾಗುವುದಿಲ್ಲ. ಇಂತಹ ಸಮಯದಲ್ಲಿ ಕೊಳವೆ ಬಾವಿ ಮೂಲಕ ನೀರು ಪೂರೈಸಲಾಗುತ್ತಿದೆ. ಭದ್ರಾ ನೀರು ಪೂರೈಕೆಯಲ್ಲಿ ನಿರ್ವಹಣೆ ಹೊಣೆಗಾರಿಕೆಯ ಹಂಚಿಕೆಯೂ ಇರುವುದರಿಂದ ಕೆಲವೊಮ್ಮೆ ಕಡೂರು ಕಡೆ ಮುಖ ಮಾಡಬೇಕಾಗುತ್ತದೆ.

ಬೀರೂರಿನಲ್ಲಿ ಭದ್ರಾ ನೀರು ಸಂಗ್ರಹಕ್ಕಾಗಿ ಐದು ಓವರ್‌ಹೆಡ್ ಟ್ಯಾಂಕ್‌ಗಳು ಕೆಲಸ ನಿರ್ವಹಿಸುತ್ತಿವೆ. ಮಾರ್ಗದ ಕ್ಯಾಂಪ್‌ನಲ್ಲಿ ಅಮೃತ್ 2.0 ಯೋಜನೆಯಲ್ಲಿ ಟ್ಯಾಂಕ್ ನಿರ್ಮಾಣ ಮುಕ್ತಾಯ ಹಂತದಲ್ಲಿದ್ದು, 10 ಲಕ್ಷ ಲೀಟರ್ ಸಂಗ್ರಹಣೆ ಸಾಮರ್ಥ್ಯ ಹೊಂದಿದೆ. ಈ ಟ್ಯಾಂಕ್ ನಿರ್ಮಾಣ ಪೂರ್ಣವಾದರೆ ಕ್ಯಾಂಪ್ ಭಾಗದಲ್ಲಿ ನೀರಿನ ಬವಣೆ ತಪ್ಪಲಿದೆ. 35 ಕೊಳವೆ ಬಾವಿಗಳು ಜಲಮೂಲ ಹೊಂದಿದ್ದು, ವಾರ್ಡ್‌ಗಳಿಗೆ ನೀರು ಪೂರೈಕೆ ಸಂಪರ್ಕ ಹೊಂದಿವೆ ಎನ್ನುತ್ತಾರೆ ಪುರಸಭೆ ಅಧಿಕಾರಿಗಳು.

ಅಮೃತ್ ಯೋಜನೆ ಎರಡನೇ ಹಂತದ 33.18 ಕೋಟಿ ರೂ. ವೆಚ್ಚವಾಗಲಿದೆ. ಇದರಲ್ಲಿ ಪುರಸಭೆ ಶೇ.15 ರಷ್ಟು ಭರಿಸಬೇಕಾಗುತ್ತದೆ. ಪಟ್ಟಣದ ಜನಸಂಖ್ಯೆ 22,723 (2011ರ ಜನಗಣತಿ ಪ್ರಕಾರ) ಇದ್ದು, 3,802 ಮನೆಗಳು 3,754 ನಲ್ಲಿ ಸಂಪರ್ಕ 48 ವಾಣಿಜ್ಯ ಸಂಪರ್ಕಗಳು ಇವೆ.