ಎನ್.ಆರ್.ಪುರ ರೈಲು ಮಾರ್ಗ ಹಳಿ ತಪ್ಪುವುದೇ?

ಬಯಲು ಸೀಮೆಗೆ ನೀರೊದಗಿಸಲು ಭದ್ರಾ ಡ್ಯಾಂ ನಿರ್ಮಾಣಕ್ಕಾಗಿ ಇಲ್ಲಿನ ರೈತರು ಜಮೀನನ್ನು ಬಿಟ್ಟುಕೊಟ್ಟರು. ತರೀಕೆರೆಯಿಂದ ಎನ್.ಆರ್.ಪುರ ಸಮೀಪದವರೆಗೆ ರೈಲು ಮಾರ್ಗವಿತ್ತು. ಭದ್ರಾ ಹಿನ್ನೀರಿನಿಂದ ಮುಳುಗಡೆಯಾದ ಬಳಿಕ ಎಲ್ಲ ಪ್ರದೇಶಗಳು ಹಾಗೂ ರೈಲು ಮಾರ್ಗವೂ ಮುಳುಗಡೆಯಾದವು. ಇದರಿಂದ ಊರು ವೈಭವವನ್ನೇ ಕಳೆದುಕೊಂಡಿತು. 

ಬಹಳ ವರ್ಷಗಳಿಂದಲೂ ಎನ್.ಆರ್.ಪುರ ಮಾರ್ಗವಾಗಿ ರೈಲ್ವೆ ಮಾರ್ಗ ನಿರ್ಮಾಣಕ್ಕೆ ಅನೇಕರು ಒತ್ತಡ ಹೇರಿದ್ದರು. ಎಚ್.ಡಿ.ದೇವೇಗೌಡ  ಪ್ರಧಾನಿಯಾದಾಗಿನಿಂದಲೂ ರೈಲ್ವೆ ಮಾರ್ಗಕ್ಕೆ ಒತ್ತಡ ಹೇರಲಾಗುತ್ತಿತ್ತು. ಅದರ ಫಲವಾಗಿ ಮಾರ್ಗದ ಸಮೀಕ್ಷೆಗಾಗಿ ಅನುದಾನ ಮೀಸಲಿಡಲಾಗಿತ್ತು. ಕೆ.ಎಚ್.ಮುನಿಯಪ್ಪ ರೈಲ್ವೆ ಮಂತ್ರಿಯಾಗಿದ್ದಾಗಲೂ ಈ ಮಾರ್ಗಕ್ಕೆ ಭರವಸೆ ಮೂಡಿತ್ತು. ಕೆ.ಜಯಪ್ರಕಾಶ್ ಹೆಗ್ಡೆ ಸಂಸದರಾಗಿದ್ದಾಗಲೂ ಸದನದಲ್ಲಿ ಪ್ರಸ್ತಾಪ ಮಂಡಿಸಿದ್ದರು. ನಂತರ ಸದಾನಂದ ಗೌಡ ಅವರು ರೈಲ್ವೆ ಮಂತ್ರಿಯಾಗಿದ್ದಾಗಲೂ ಪ್ರಸ್ತಾಪ ಮಾಡಲಾಗಿತ್ತು. ಆದರೆ ಇತ್ತೀಚೆಗೆ ಶಿವಮೊಗ್ಗ, ಎನ್.ಆರ್.ಪುರ, ಶೃಂಗೇರಿ ಮಾರ್ಗವಾಗಿ ಮಂಗಳೂರಿಗೆ ರೈಲ್ವೆ ಮಾರ್ಗ ನಿರ್ಮಾಣವಾಗುತ್ತದೆ ಎಂಬ ಸುದ್ದಿ ಕೇಳಿ ಈ ಭಾಗದ ಜನರು ಪಟ್ಟ ಖುಷಿ ಅಷ್ಟಿಷ್ಟಲ್ಲ. ಆದರೆ ಇದೀಗ ಮಾರ್ಗವನ್ನೇ ಬದಲಾಯಿಸಿ ಬೇರೆ ಮಾರ್ಗದ ಪ್ರಸ್ತಾವನೆ ಸಲ್ಲಿಸಲಾಗಿದೆ ಎಂದು ಕೇಳಿಬರುತ್ತಿದೆ. ಯೋಜನೆ ಇದೀಗ ಶಿವಮೊಗ್ಗ, ಅರಸಾಳು, ಹೊಸನಗರ, ರಿಪ್ಪನ್‌ಪೇಟೆ, ತೀರ್ಥಹಳ್ಳಿ, ಕೋಣಂದೂರು, ಕಮ್ಮರಡಿ, ಶೃಂಗೇರಿ, ಕೆರೆಕಟ್ಟೆ ಮಾರ್ಗವಾಗಿ ಮಂಗಳೂರು ತಲುಪುವ ಯೋಜನೆಯಾಗುವ ಮಾಹಿತಿ ತಿಳಿದುಬಂದಿದೆ. 

ಹೊಸ ಯೋಜನೆ ಕಾರ್ಯಗತವಾದರೆ ಶೃಂಗೇರಿ, ಮಂಗಳೂರು ಮಾರ್ಗದಲ್ಲಿ ಎನ್.ಆರ್.ಪುರ, ಕೊಪ್ಪ ತಾಲೂಕು ಸಂಪರ್ಕ ಬಿಟ್ಟು ಹೋಗಲಿದೆ. ಹೀಗಾಗಿ ನ್ಯಾಯಯುತ ಹೋರಾಟಕ್ಕಾಗಿ ಜನರು ರೈಲ್ವೆ ಹೋರಾಟ ಸಮಿತಿ ರಚಿಸಿಕೊಂಡಿದ್ದಾರೆ.  

ಭದ್ರಾ ಜಲಾಶಯದಿಂದಾಗಿ ಮುಳುಗಡೆಯಾಗಿದ್ದ ಊರು ಅನೇಕ ವರ್ಷಗಳಿಂದಲೂ ಅಭಿವೃದ್ಧಿ ಕಾಣದೆ ಮಂಕಾಗಿದೆ. ಹೊನ್ನೇಕುಡಿಗೆ ಸೇತುವೆ ನಿರ್ಮಾಣದಿಂದ ಊರು ಅಭಿವೃದ್ಧಿಯಾಗುವ ಹಾಗೂ ಪ್ರವಾಸೋದ್ಯಮ ತಾಣವಾಗುವ ಭರವಸೆ ಮೂಡುವಂತಾಗಿದೆ. ರೈಲ್ವೆ ಮಾರ್ಗ ನಿರ್ಮಾಣವಾದರೆ ಪ್ರವಾಸೋದ್ಯಮಕ್ಕೂ ಪೂರಕವಾಗಲಿದೆ. 

ರೈಲು ಮಾರ್ಗ ಬದಲಾವಣೆ ಆಗುತ್ತದೆ ಎಂಬ ಸುದ್ದಿ ಕೇಳುತ್ತಿದ್ದಂತೆ ವ್ಯಾಟ್ಸ್‌ಆ್ಯಪ್, ಫೇಸ್‌ಬುಕ್ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ವಿರೋಧ ವ್ಯಕ್ತವಾಗುತ್ತಿದೆ. ರೈಲು ಮಾರ್ಗ ನಮ್ಮ ಊರಿನ ಮೂಲಕವೇ ಹೋಗುವಂತಾಗಲು ಎನ್.ಆರ್.ಪುರ ರೈಲ್ವೆ ಹೋರಾಟ ಸಮಿತಿ ಅಸ್ತಿತ್ವಕ್ಕೆ ತರಲಾಗಿದೆ. ಪಕ್ಷಭೇದ ಮರೆತು ಒಗ್ಗಟ್ಟಿನ ಹೋರಾಟಕ್ಕೆ ಬೆಂಬಲ ಕೋರಿದ್ದಾರೆ. 

ಎನ್.ಆರ್.ಪುರದಲ್ಲಿ 80 ವರ್ಷಗಳ ಹಿಂದೆಯೇ ಎರಡು ರೈಲುಗಳು ಸಂಚರಿಸುತ್ತಿದ್ದವು. ಒಂದು ಭದ್ರಾವತಿ ವಿಶ್ವೇಶ್ವರಯ್ಯ ಉಕ್ಕು ಹಾಗೂ ಕಬ್ಬಿಣ ಕಾರ್ಖಾನೆಗೆ ಕಲ್ಲಿದ್ದಲು ಹಾಗೂ ಕಾಗದ ಕಾರ್ಖಾನೆಗೆ ಬಿದಿರು ಬೊಂಬು ಸಾಗಿಸಲು ಗೂಡ್ಸ್ ರೈಲು ಸಂಚರಿಸುತ್ತಿತ್ತು. ಈ ರೈಲು ಭದ್ರಾವತಿಯಿಂದ 22 ಕಿ.ಮೀ.ದೂರದ ಜಂಕ್ಷನ್, ಕಣಗಲಸರ, ಮಾರಿದಿಬ್ಬ, ನೆಲಗದ್ದೆ, ಕೋಡಿಹಳ್ಳಿ, ಮುತ್ತಿನಕೊಪ್ಪ, ಆರಂಬಳ್ಳಿಗೆ 1970ರವರೆಗೂ ಸಂಚರಿಸುತ್ತಿತ್ತು. ನಂತರ ಸ್ಥಗಿತಗೊಂಡಿತು. ಕಾಲಕ್ರಮೇಣ ರೈಲು ಹಳಿಯೂ ಇಲ್ಲವಾಗಿದೆ. ಆದರೆ ಈಗಲೂ ಪಹಣಿಯಲ್ಲಿ ಆ ರೈಲು ಮಾರ್ಗವಿದೆ. ಅದೇ ಮಾರ್ಗದಲ್ಲಿ ಮತ್ತೆ ರೈಲು ಓಡಿಸಿ ಎಂಬುದೇ ಎನ್.ಆರ್.ಪುರ, ಕೊಪ್ಪ, ಶೃಂಗೇರಿ ಜನರ ಪ್ರಮುಖ ಆಗ್ರಹ. ಇದಲ್ಲದೆ ಮತ್ತೊಂದು ಪ್ಯಾಸೆಂಜರ್ ರೈಲು ತರೀಕೆರೆ, ಲಕ್ಕವಳ್ಳಿ, ತಡಸಾ ಮಾರ್ಗವಾಗಿ ಎನ್.ಆರ್.ಪುರಕ್ಕೆ ಸಂಚರಿಸುತ್ತಿತ್ತು. 1960ರಲ್ಲಿ ಲಕ್ಕವಳ್ಳಿಯಲ್ಲಿ ಭದ್ರಾ ಡ್ಯಾಂ ನಿರ್ಮಾಣದ ನಂತರ ಭದ್ರಾ ಹಿನ್ನೀರು ನಿಂತು ತಡಸಾ ಸೇತುವೆ ಮುಳುಗಡೆಯಾಗಿದ್ದರಿಂದ ಆ ರೈಲು ಮಾರ್ಗವೂ ಸ್ಥಗಿತವಾಯಿತು.

ರೈಲು, ಬಸ್ ಎರಡಕ್ಕೂ ಒಂದೇ ಸೇತುವೆ ಇತ್ತು. 60-70 ವರ್ಷಗಳಿಂದ ನೀರಿನಲ್ಲಿ ಮುಳುಗಿದ್ದರೂ ಈಗಲೂ ಭದ್ರವಾಗಿದೆ. 9 ಕಮಾನಿನ ಸೇತುವೆಯಿಂದ ಎನ್.ಆರ್.ಪುರ ಮತ್ತು ತರೀಕೆರೆ ಪಟ್ಟಣಗಳ ಅಂತರ ಕೇವಲ 42 ಕಿ.ಮೀ. ಆಗುತ್ತಿತ್ತು. ಸುಣ್ಣ, ಇಟ್ಟಿಗೆ, ಮರಳಿನ ಮಿಶ್ರಣ ಮಾಡಿದ ಪುಡಿಯಿಂದ ಸುರ್ಕಿ ಗಾರೆಯನ್ನು ತಯಾರಿಸಿ ಸೇತುವೆ ಕಟ್ಟಲಾಗಿದೆ. ಸೇತುವೆ ಇನ್ನೊಂದು ವಿಶೇಷವೆಂದರೆ ಇದರ ಮೇಲೆ ರೈಲು ಮತ್ತು ಬಸ್ ಒಟ್ಟಿಗೆ ಸಂಚರಿಸುತ್ತಿದ್ದವು. ತರೀಕೆರೆಯಿಂದ ಸರಕು ಸಾಗಿಸುವ ಉದ್ದೇಶದಿಂದ 1915ರಲ್ಲಿ ಸರಕು ಸಾಗಣೆ ರೈಲು ಸಂಚಾರ ಆರಂಭವಾಯಿತು. ಭದ್ರಾ ಅಣೆಕಟ್ಟೆ ಪ್ರಸ್ತಾಪ ಬಂದಾಗ ಈ ಭಾಗ ಮುಳುಗಡೆಯಾಗುವ ಮುಂದಾಲೋಚನೆಯಿಂದ ರೈಲ್ವೆ ಮಾರ್ಗ ಸ್ಥಗಿತಗೊಳಿಸಲಾಯಿತು ಎಂಬ ಮಾಹಿತಿ ಇದೆ. 

ಎನ್.ಆರ್.ಪುರ ಸುತ್ತಮುತ್ತಲ ಕಾಡುಗಳಿಂದ ಭದ್ರಾವತಿ ವಿಐಎಸ್‌ಎಲ್ ಮತ್ತು ಕಾಗದ ಕಾರ್ಖಾನೆಗೆ ಬಿದಿರು, ಸೌದೆ ಹಾಗೂ ಇದ್ದಿಲನ್ನು ಸಾಗಿಸಲು ನ್ಯಾರೋಗೇಜ್ ರೈಲಿನ ಸೌಲಭ್ಯ ಕಲ್ಪಿಸಿದ್ದರು. ಕಾರ್ಖಾನೆಗಳಿಗೆ ಬೇಕಾದ ಸಾಮಗ್ರಿಗಳನ್ನು ತಡಸದಿಂದ ಹೆಬ್ಬೆ ಭವಾನಿಶಂಕರ ದೇವಸ್ಥಾನದವರೆಗೆ ಒಂದು ಮಾರ್ಗದಲ್ಲಿ ಸಾಗಿಸಲಾಗುತ್ತಿತ್ತು. ಅದೇ ರೀತಿಯಾಗಿ ಅಗಸನಹಡ್ಲುವಿನಿಂದ ದಾನಿವಾಸ, ನೆಲಗದ್ದೆ, ಕೋಡಿಹಳ್ಳಿ, ಮಾರಿದಿಬ್ಬ ಮಾರ್ಗವಾಗಿ ಉಂಬಳೆಬೈಲು, ಮುತ್ತಿನಕೊಪ್ಪದಿಂದ ಶೆಟ್ಟಿಕೊಪ್ಪದ ಹತ್ತಿರದ ಆಲಂದೂರಿನವರೆಗೆ ಇನ್ನೊಂದು ಮಾರ್ಗವಿತ್ತು. ಜತೆಗೆ ಭದ್ರಾ ನದಿ ಸೇತುವೆ ಪಕ್ಕದಲ್ಲಿ ಮೈಸೂರು ಸರ್ಕಾರದವರು ಆಗಿನ ಕಾಲಕ್ಕೆ ಸಾಮಿಲ್ ಸ್ಥಾಪಿಸಿ, ರೈಲ್ವೆ ಲೈನಿಗೆ ಬೇಕಾದ ಸ್ಲೀಪರ್‌ಗಳನ್ನು ಕೊಯ್ಯಿಸಿ ದೇಶಾದ್ಯಂತ ಇರುವಂತಹ ರೈಲ್ವೆ ಇಲಾಖೆಗೆ ಸರಬರಾಜು ಮಾಡುತ್ತಿದ್ದರು. ಭದ್ರಾ ಹಿನ್ನೀರಿನ ನೀರಿನ ಪ್ರಮಾಣ ಕಡಿಮೆಯಾದಾಗ ನೂರೈವತ್ತು ವರ್ಷಗಳ ಹಿಂದೆ ಸ್ಥಾಪಿಸಿದ ಸಾಮಿಲ್‌ನ ಅವಶೇಷಗಳನ್ನು ಇಂದಿಗೂ ಕಾಣಬಹುದು. ರೈಲಿನಲ್ಲಿ ನಾಟಾ ಸಾಗಿಸುವುದಲ್ಲದೆ ಎತ್ತಿನ ಗಾಡಿಗಳಲ್ಲೂ ಸಾಗಿಸುತ್ತಿದ್ದರು.  

ಭದ್ರಾವತಿಯಿಂದ ಎನ್.ಆರ್.ಪುರದ ಆರಂಬಳ್ಳಿವರೆಗಿನ 22 ಕಿ.ಮೀ ದೂರದ ಹಳೆಯ ರೈಲು ಮಾರ್ಗಕ್ಕೆ ಅರಣ್ಯ ಇಲಾಖೆ ಒಪ್ಪಿಗೆಯೂ ಇದೆ. ಭೂಸ್ವಾಧೀನವೂ ಆಗಿದೆ. ಇಲ್ಲಿಂದ ಮುಂದೆ ಕೊಪ್ಪ ಮಾರ್ಗವಾಗಿ ಕೇವಲ 55 ಕಿ.ಮೀ ದೂರ ಕ್ರಮಿಸಿದರೆ ಶೃಂಗೇರಿ ತಲುಪಬಹುದು. ಈ ಮಾರ್ಗದಲ್ಲಿ ಹೆಚ್ಚು ಅರಣ್ಯ ನಾಶದ ಚಿಂತೆಯೂ ಇರುವುದಿಲ್ಲ.