ಕೆರೆ ಒತ್ತುವರಿ ತೆರವಿಗೆ ಸೂಚಿಸಿ 12 ನಿವಾಸಿಗಳಿಗೆ ನೋಟಿಸ್

ಬಾಳೆಹೊನ್ನೂರು: ಪಟ್ಟಣದಿಂದ ಎನ್.ಆರ್.ಪುರಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆ ಬದಿಯಲ್ಲಿರುವ ಸರ್ಕಾರಿ ಕೆರೆ ಚೌಡಿಕೆರೆ (ಹೊಟ್ಟಿನಕೆರೆ) ಒತ್ತುವರಿಯಾಗಿರುವ ಹಿನ್ನೆಲೆಯಲ್ಲಿ, ಒತ್ತುವರಿ ತೆರವುಗೊಳಿಸುವಂತೆ ಸೂಚಿಸಿ 12 ನಿವಾಸಿಗಳಿಗೆ ತರೀಕೆರೆಯ ಸಣ್ಣ ನೀರಾವರಿ ಮತ್ತು ಅಂತರ್ಜಲ ಅಭಿವದ್ಧಿ ಇಲಾಖೆ ಸಹಾಯಕ ಕಾರ್ಯಪಾಲಕ ಇಂಜಿನಿಯರ್ ನೋಟಿಸ್ ನೀಡಿದ್ದಾರೆ.

ಹೈಕೋರ್ಟ್ ರಿಟ್ ಅರ್ಜಿ ಹಿನ್ನೆಲೆಯಲ್ಲಿ ಬಿ.ಕಣಬೂರು ಗ್ರಾಮದ ಸರ್ವೇ ನಂ.138ರ ಸರ್ಕಾರಿ ಕೆರೆಯನ್ನು 2025ರ ಮೇ 2ರಂದು ಕಂದಾಯ ಹಾಗೂ ಸರ್ವೇ ಇಲಾಖೆ ಅಧಿಕಾರಿಗಳು ಜಂಟಿಯಾಗಿ ಸರ್ವೇ ನಡೆಸಿ ಪರಿಶೀಲಿಸಿ ಸ್ಥಳ ಮಹಜರು ನಡೆಸಿದ ವೇಳೆ ಅಕ್ರಮ ಒತ್ತುವರಿ ಕಂಡುಬಂದಿದೆ. ಈ ಹಿನ್ನೆಲೆಯಲ್ಲಿ 2026ರ ಜೂ.12ರೊಳಗೆ ಸ್ವಯಂ ಪ್ರೇರಿತವಾಗಿ ಒತ್ತುವರಿ ತೆರವುಗೊಳಿಸಬೇಕು. ಇಲ್ಲವಾದಲ್ಲಿ ಕರ್ನಾಟಕ ಭೂ ಕಂದಾಯ ಕಾಯ್ದೆ 1964 ಕಲಂ 192ರ ಅಡಿಯಲ್ಲಿ ಸರ್ಕಾರಿ ಸ್ವತ್ತಿನ ಅತಿಕ್ರಮಣ ಅಪರಾಧವೆಂದು ಪರಿಗಣಿಸಿ ಸಂಬಂಧಿತ ಇಲಾಖೆ ಅಧಿಕಾರಿಗಳು ಹಾಗೂ ಪೊಲೀಸ್ ಭದ್ರತೆಯೊಂದಿಗೆ ತೆರವು ಕಾರ್ಯಾಚರಣೆ ಕೈಗೊಳ್ಳಲಿದ್ದಾರೆ ಎಂದು ನೋಟಿಸ್‌ನಲ್ಲಿ ಎಚ್ಚರಿಕೆ ನೀಡಲಾಗಿದೆ.

ಸರ್ವೇ ನಂ.138ರಲ್ಲಿ ನೀರಾವರಿ ಕೆರೆ ಇದ್ದರೂ, ಸರ್ವೇ ನಂ.139ರ ನಿವಾಸಿಗಳಿಗೂ ಒತ್ತುವರಿ ತೆರವುಗೊಳಿಸುವಂತೆ ನೋಟಿಸ್ ನೀಡಲಾಗಿದೆ. ಪ್ರಭಾವಿಗಳ ಒತ್ತುವರಿ ಉಳಿಸಲು ಸಾಮಾನ್ಯ ಜನರ ಒತ್ತುವರಿಗೆ ತೆರವಿಗೆ ಅಧಿಕಾರಿಗಳು ಸರ್ವೇಯನ್ನು ತಪ್ಪಾಗಿ ಮಾಡಿ ಕಂದಾಯ ಜಾಗವನ್ನು ಕೆರೆ ಎಂದು ಬದಲಾಯಿಸಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ನೋಟಿಸ್‌ಅನ್ನು ಮರು ಪರಿಶೀಲಿಸುವಂತೆ ಶಾಸಕ ಟಿ.ಡಿ.ರಾಜೇಗೌಡ ಅವರಿಗೆ ಮನವಿ ಸಲ್ಲಿಸಲಾಗಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಸರ್ವೇ ನಂ.139ರಲ್ಲಿ 85 ಮಂದಿ ಪಹಣಿ ದಾಖಲೆ ಮತ್ತು ಹಕ್ಕುಪತ್ರ ಹೊಂದಿದ್ದು, ಇದೂವರೆಗೆ ಪಕ್ಕಾ ಪೋಡಿ ಆಗದಿರುವುದು ಸಮಸ್ಯೆಗೆ ಮೂಲ ಕಾರಣವಾಗಿದೆ ಎಂದು ಸ್ಥಳೀಯರು ದೂರಿದ್ದಾರೆ.

2008ರಲ್ಲಿ ಸ್ಥಳೀಯ ಮಾಹಿತಿ ಹಕ್ಕು ಕಾರ್ಯಕರ್ತರು ಎನ್.ಆರ್.ಪುರ ತಾಲೂಕು ಕಚೇರಿಗೆ ತಾಲೂಕಿನಲ್ಲಿ ಒತ್ತುವರಿ ಆಗಿರುವ ಸರ್ಕಾರಿ ಕೆರೆಗಳ ಕುರಿತು ಮಾಹಿತಿ ಕೇಳಿದಾಗ ಅಧಿಕಾರಿಗಳು ತಾಲೂಕಿನಲ್ಲಿ ಯಾವುದೇ ಸರ್ಕಾರಿ ಕೆರೆ ಒತ್ತುವರಿಯಾಗಿಲ್ಲ ಎಂದು ಮಾಹಿತಿ ನೀಡಿದ್ದರು. ಆದರೆ ಇದೀಗ ಕೆರೆ ಒತ್ತುವರಿಯಾಗಿದೆ ಎಂದು ತೆರವುಗೊಳಿಸಲು ಮುಂದಾಗಿರುವುದು ಅಂದು ನೀಡಿದ ಮಾಹಿತಿ ತಪ್ಪೇ ಅಥವಾ ಈಗ ನಡೆಸುತ್ತಿರುವ ತೆರವು ಪ್ರಕರಣ ತಪ್ಪೇ ಎಂಬ ಸಂಶಯ ಮೂಡಿಸಿದೆ ಎಂದು ಸ್ಥಳೀಯರು ಪ್ರಶ್ನಿಸಿದ್ದಾರೆ.