ಕಳಸದಲ್ಲಿ ಮುಂದುವರಿದ ತಹಸೀಲ್ದಾರ್‌ಗಳ ಮ್ಯೂಸಿಕಲ್ ಚೇರ್

ಕಳಸ: ಮೂಡಿಗೆರೆಯಿಂದ ಸಾಕಷ್ಟು ದೂರದಲ್ಲಿರುವ ಕಳಸ ತಾಲೂಕು ಕೇಂದ್ರವಾಗಬೇಕು ಎಂಬ ಹಲವು ದಿನಗಳ ಕಳಸ ಜನತೆಯ ಕನಸು 2022ರಲ್ಲಿ ಕಳಸದಲ್ಲಿ ತಾಲೂಕು ಕಚೇರಿ ಆರಂಭವಾದ ನಂತರ ನನಸಾಯಿತು.

ತಾಲೂಕು ಕಚೇರಿ ಆರಂಭದಿಂದ ಸಾರ್ವಜನಿಕರಲ್ಲಿ ಹೊಸದೊಂದು ಆಶಾಭಾವನೆ ಮೂಡಿತ್ತು. ಇನ್ನು ಮುಂದೆ ಮೂಡಿಗೆರೆ ತಾಲೂಕಿಗೆ ಅಲೆದಾಡುವುದು ತಪ್ಪುತ್ತದೆ. ವರ್ಷಗಟ್ಟಲೆ ನೆನಗುದಿಗೆ ಬಿದ್ದಿರುವ ಕಂದಾಯ ಕೆಲಸಗಳು, ಆಡಳಿತಾತ್ಮಕ ಪ್ರಕ್ರಿಯೆಗಳು ಇನ್ನು ಮುಂದೆ ಸ್ಥಳೀಯವಾಗಿಯೇ ವೇಗವಾಗಿ ನಡೆಯಲಿವೆ ಎಂದು ಜನಸಾಮಾನ್ಯರು ನಂಬಿದ್ದರು. ಆದರೆ, ತಾಲೂಕು ಕಚೇರಿ ಆರಂಭವಾಗಿ ಕೇವಲ ನಾಲ್ಕು ವರ್ಷಗಳಲ್ಲಿ ನಡೆದ ಹತ್ತಾರು ತಹಸೀಲ್ದಾರ್‌ಗಳ ಮ್ಯೂಸಿಕಲ್ ಚೇರ್‌ಆಟ ತಾಲೂಕಿನ ಅಭಿವೃದ್ಧಿಯನ್ನು ನುಂಗಿ ಹಾಕಿದೆ.

ಇದೀಗ ಕಳಸ ತಾಲೂಕು ಕಚೇರಿಗೆ ನಾಲ್ಕು ವರ್ಷದಲ್ಲಿ 15ನೇ ತಹಸೀಲ್ದಾರ್ ಆಗಿ ಮಂಜುನಾಥ್ ನೇಮಕವಾಗಿದ್ದಾರೆ. ಅಂದರೆ ಸರಾಸರಿ ಲೆಕ್ಕ ಹಾಕಿದರೂ ಒಬ್ಬ ತಹಸೀಲ್ದಾರ್ ಇಲ್ಲಿ ಕನಿಷ್ಠ 3-4 ತಿಂಗಳೂ ಪೂರೈಸುತ್ತಿಲ್ಲ. ಕೇವಲ ನಾಮಕಾವಸ್ಥೆಗೆ ಎಂಬಂತಿರುವ ಈ ತಾಲೂಕು ಕಚೇರಿಯಿಂದಾಗಿ ಇತ್ತ ಸಿಬ್ಬಂದಿಗೂ ನೆಮ್ಮದಿಯಿಲ್ಲ, ಅತ್ತ ಸಾರ್ವಜನಿಕರಿಗೂ ಯಾವುದೇ ಪ್ರಯೋಜನವಾಗುತ್ತಿಲ್ಲ.

ತಾಲೂಕಿನ ಮುಖ್ಯಸ್ಥರಾಗಿ ಬರುವ ಹೊಸ ತಹಸೀಲ್ದಾರ್‌ಗೆ ಕಚೇರಿಯ ಆಡಳಿತಾತ್ಮಕ ಮತ್ತು ಆರ್ಥಿಕ ವಹಿವಾಟುಗಳನ್ನು ನಡೆಸಲು ಡಿಜಿಟಲ್ ಸಿಗ್ನೇಚರ್ ಪಡೆಯುವುದು ಕಡ್ಡಾಯವಾಗಿರುತ್ತದೆ. ಈ ತಾಂತ್ರಿಕ ಪ್ರಕ್ರಿಯೆ ಪೂರ್ಣಗೊಂಡು ಹೊಸ ಕಾರ್ಡ್ ಕೈಸೇರಲು ಕನಿಷ್ಠ ಎರಡು ತಿಂಗಳು ಬೇಕಾಗುತ್ತದೆ. ದುರಂತದ ಸಂಗತಿ ಎಂದರೆ ಹೊಸ ತಹಸೀಲ್ದಾರ್‌ಗೆ ಆಡಳಿತ ನಡೆಸಲು ಡಿಜಿಟಲ್ ಕಾರ್ಡ್ ಬರುವಷ್ಟರಲ್ಲಿ, ಸರ್ಕಾರ ಅವರನ್ನು ವರ್ಗಾವಣೆ ಮಾಡಿ ಮತ್ತೊಬ್ಬರನ್ನು ನೇಮಕಮಾಡಿರುತ್ತದೆ.

ಇದರಿಂದ ತಾಲೂಕು ಕಚೇರಿ ಆರ್ಥಿಕ ವಹಿವಾಟುಗಳು ಸಂಪೂರ್ಣ ಸ್ಥಗಿತಗೊಂಡಿವೆ. ಕಳೆದ ಕೆಲವು ತಿಂಗಳುಗಳಿಂದ ಕಚೇರಿಯಲ್ಲಿ ಕಾರ್ಯನಿರ್ವಹಿಸುವ ಕೆಳಹಂತದ ಸಿಬ್ಬಂದಿ ಹಾಗೂ ಗುತ್ತಿಗೆ ನೌಕರರಿಗೆ ಸಕಾಲಕ್ಕೆ ಸಂಬಳ ನೀಡಲು ಸಾಧ್ಯವಾಗುತ್ತಿಲ್ಲ. ಸಂಬಳವಿಲ್ಲದೆ ಕಚೇರಿ ಸಿಬ್ಬಂದಿ ಸಂಕಷ್ಟದಲ್ಲಿದ್ದರೆ, ಇತ್ತ ಸಾರ್ವಜನಿಕರ ಫೈಲ್‌ಗಳು ಧೂಳು ಹಿಡಿಯುತ್ತಿವೆ. ಕೇವಲ ದಿನ ದೂಡಲು ಬರುವ ಅಧಿಕಾರಿಗಳಿಂದಾಗಿ ಕಚೇರಿ ಘನತೆಯೇ ಮಣ್ಣುಪಾಲಾಗುತ್ತಿದೆ.

ಮಲೆನಾಡು ಭಾಗವಾದ ಕಳಸದಲ್ಲಿ ಅತಿವೃಷ್ಟಿ, ಭೂಕುಸಿತ, ಕಾಡು ಪ್ರಾಣಿಗಳ ಹಾವಳಿ ಹಾಗೂ ರಸ್ತೆ ಸೇತುವೆಗಳಂತಹ ಗಂಭೀರ ಸಮಸ್ಯೆಗಳಿವೆ. ಇಲ್ಲಿಗೆ ಬರುವ ಅಧಿಕಾರಿಗಳಿಗೆ ಕಳಸದ ಭೌಗೋಳಿಕತೆ ಮತ್ತು ಸ್ಥಳೀಯ ಸಮಸ್ಯೆಗಳನ್ನು ಅರ್ಥ ಮಾಡಿಕೊಳ್ಳಲು ಕನಿಷ್ಠ 3ರಿಂದ 4 ತಿಂಗಳು ಬೇಕು. ಆದರೆ ಸಮಸ್ಯೆ ಅರ್ಥ ಮಾಡಿಕೊಳ್ಳುವಷ್ಟರಲ್ಲೇ ವರ್ಗಾವಣೆಯಾಗುತ್ತಿರುವುದರಿಂದ ಜನಪ್ರತಿನಿಧಿಗಳ ಮತ್ತು ಸಾರ್ವಜನಿಕರ ಅಹವಾಲುಗಳನ್ನು ಆಲಿಸುವವರೇ ಇಲ್ಲದಂತಾಗಿದೆ.