ಚಾರಣಪ್ರಿಯರ ಸ್ವರ್ಗ, ಗಗನಚುಂಬಿ ಶಿಖರಗಳ ನಾಡು ಮೂಡಿಗೆರೆ

ಮೂಡಿಗೆರೆ: ಹಚ್ಚ ಹಸಿರನ್ನು ಮೈದುಂಬಿಕೊಂಡಿರುವ ಮಂಜು ಮುಸುಕಿದ ಪರ್ವತ ಶ್ರೇಣಿ, ಕಣ್ಣು ಹಾಯಿಸಿದಷ್ಟೂ ದೂರ ಕಾಣುವ ಕಾಫಿ ತೋಟಗಳು, ಗಗನಚುಂಬಿ ಗಿರಿ ಶ್ರೇಣಿಗಳು ಮೂಡಿಗೆರೆ ತಾಲೂಕನ್ನು ಭೂ ಲೋಕದ ಸ್ವರ್ಗವನ್ನಾಗಿಸಿವೆ.

ಹೌದು. ಚಿಕ್ಕಮಗಳೂರು ಜಿಲ್ಲೆಯಲ್ಲಿಯೇ ಅತಿ ಹೆಚ್ಚು ಸುಂದರ ಪ್ರಾಕೃತಿಕ ತಾಣಗಳು ಮೂಡಿಗೆರೆ ತಾಲೂಕಿನಲ್ಲಿಯೇ ಇರುವುದು ವಿಶೇಷ. ಇದೇ ಕಾರಣದಿಂದಾಗಿಯೇ ಪ್ರತಿದಿನವೂ ಸಾವಿರಾರು ಪ್ರವಾಸಿಗರು ಇಲ್ಲಿಗೆ ಆಗಮಿಸಿ ಪ್ರಕೃತಿ ಸೌಂದರ್ಯ ಕಣ್ತುಂಬಿಕೊಳ್ಳುತ್ತಾರೆ. ಅದರಲ್ಲಿಯೂ ಚಾರಣಪ್ರಿಯರಿಗಂತು ಮೂಡಿಗೆರೆ ಅಚ್ಚುಮೆಚ್ಚಿನ ತಾಣ ಎನ್ನುವುದರಲ್ಲಿ ಅನುಮಾನವೇ ಇಲ್ಲ.

ಮೂಡಿಗೆರೆ ಎನ್ನುತ್ತಿದ್ದಂತೆ ಪ್ರವಾಸಿಗರಿಗೆ ಮೊದಲು ನೆನಪಾಗುವುದೇ ಎತ್ತಿನಭುಜ. ಅದರಲ್ಲಿಯೂ ಚಾರಣಿಗರು ಹಾಗೂ ಪ್ರಕೃತಿ ಪ್ರಿಯರಿಗೆ ಇದು ಅಚ್ಚುಮೆಚ್ಚಿನ ತಾಣ. ಇಲ್ಲಿನ ಕಣಿವೆಗಳು ಹಾಗೂ ಕಾಡುಗಳ ರಮಣೀಯ ನೋಟ ಪ್ರವಾಸಿಗರಿಗೆ ಮುದ ನೀಡುತ್ತದೆ. ಮೂಡಿಗೆರೆ ತಾಲೂಕಿನ ಸುಶೀಲ ಗ್ರಾಮದಲ್ಲಿರುವ ಮೂಲ ಶಿಬಿರದಿಂದ ಕನಿಷ್ಠ ನಾಲ್ಕು ಗಂಟೆ ಚಾರಣ ಮಾಡಿದರೆ ಎತ್ತಿನಭುಜದ ತುತ್ತ ತುದಿಗೆ ಏರಲು ಸಾಧ್ಯವಾಗುತ್ತದೆ. ಶಿಖರವನ್ನು ಏರಿದ ಬಳಿಕ ಆಯಾಸವೆಲ್ಲವೂ ಕಣ್ಮರೆಯಾಗಿ ಮನಸ್ಸು ಆಹ್ಲಾದಕರವಾಗುತ್ತದೆ. ಆದರೆ ಎತ್ತಿನಭುಜ ಅರಣ್ಯ ಇಲಾಖೆ ವ್ಯಾಪ್ತಿಗೆ ಬರುವುದರಿಂದಾಗಿ ಅಲ್ಲಿ ಯಾವುದೇ ಮೂಲಸೌಕರ್ಯ ಒದಗಿಸಲು ಸಾಧ್ಯವಾಗಿಲ್ಲ. ಜತೆಗೆ ಚಾರಣದ ಮೂಲಕವೇ ಶಿಖರವನ್ನು ಏರ ಬೇಕಾಗಿರುವುದು ಇಲ್ಲಿನ ವಿಶೇಷ.

ಇನ್ನು ತಾಲೂಕಿನ ಅತಿ ಎತ್ತರದ ಶಿಖರಗಳಲ್ಲಿ ದೇವರ ಮನೆ ಬೆಟ್ಟವೂ ಒಂದಾಗಿದೆ. ಇಲ್ಲಿನ ಪಶ್ಚಿಮ ಘಟ್ಟ ಶ್ರೇಣಿ ಮತ್ತು ಅರೇಬಿಯನ್ ಸಮುದ್ರದ ವಿಹಂಗಮ ನೋಟ ಪ್ರವಾಸಿಗರಿಗೆ ಮುದ ನೀಡುತ್ತದೆ. ಇಲ್ಲಿನ ಅಪರೂಪದ ಆರ್ಕಿಡ್‌ಗಳು, ಚಿಟ್ಟೆಗಳು, ಹಚ್ಚಹಸಿರಿನ ಸಸ್ಯ ರಾಶಿ ಇಲ್ಲಿಗೆ ಆಗಮಿಸುವ ಪ್ರವಾಸಿಗರಿಗೆ ಹೊಸ ಅನುಭವ ನೀಡುತ್ತವೆ. ದೇವರ ಮನೆ ಬೆಟ್ಟಕ್ಕೆ ಚಾರಣವನ್ನು ಮಾಡಬಹುದು ಅಥವಾ ಅಂಕುಡೊಂಕದ ರಸ್ತೆಗಳ ಮೂಲಕ ಜೀಪ್ ಸವಾರಿಯನ್ನು ಮಾಡಿ ಆನಂದ ಪಡಬಹುದಾಗಿದೆ.

ಐತಿಹಾಸಿಕ ಕೋಟೆ

ಬಲ್ಲಾಳರಾಯನ ದುರ್ಗ ಕರ್ನಾಟಕದ ಅತ್ಯಂತ ಹಳೆಯ ಐತಿಹಾಸಿಕ ಕೋಟೆಯಾಗಿದೆ. 12ನೇ ಶತಮಾನದ ಹೊಯ್ಸಳರ ಕಾಲದಲ್ಲಿ ಈ ಕೋಟೆ ನಿರ್ಮಾಣಗೊಂಡಿದ್ದು ನಂತರ ಇದನ್ನು ಕೆಳದಿ ಅರಸರು ವಶಪಡಿಸಿಕೊಂಡಿದ್ದರು. ಇನ್ನೊಂದು ವಿಶೇಷವೆಂದರೆ 1509 ಮೀಟರ್ ಎತ್ತರದಲ್ಲಿ ಬೆಟ್ಟದ ಮೇಲೆ ಈ ಕೋಟೆ ನಿರ್ಮಾಣ ಮಾಡಲಾಗಿದೆ. ಕೋಟೆಯಲ್ಲಿ ನಿಂತು ಕಣ್ಣು ಹಾಯಿಸಿದಾಗ ಸುತ್ತಮುತ್ತಲೂ ಹಚ್ಚ ಹಸಿರಿನ ಬೆಟ್ಟಗಳು, ಕಣಿವೆಗಳ ವಿಹಂಗಮ ನೋಟ ನೋಡುಗರನ್ನು ಮಂತ್ರಮುಗ್ಧಗೊಳಿಸುತ್ತವೆ. ಆದರೆ ಶಿಥಿಲಾವಸ್ಥೆಯಲ್ಲಿರುವ ಕೋಟೆ ಪ್ರವಾಸಿಗರಿಗೆ ಒಂದಷ್ಟು ಬೇಸರ ಮೂಡಿಸುವುದಂತೂ ಸತ್ಯ.

ಚಿಕ್ಕಮಗಳೂರು ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಯ ಸಂಪರ್ಕಕೊಂಡಿಯಾಗಿರುವ ಕೊಟ್ಟಿಗೆಹಾರ ಸದಾ ಮಂಜು ಮುಸುಕಿದ ವಾತಾವರಣದಿಂದಾಗಿ ಪ್ರವಾಸಿಗರನ್ನು ತನ್ನತ್ತ ಕೈಬೀಸಿ ಕರೆಯುತ್ತದೆ. ಅದರಲ್ಲೂ ಚಳಿಗಾಲದ ಅವಧಿಯಲ್ಲಂತೂ ಮುಂದೇನಿದೆ ಎಂದು ಕಾಣಿಸದಷ್ಟು ದಟ್ಟವಾಗಿ ಮಂಜು ಆವರಿಸಿ ಊರಿನ ಸೌಂದರ್ಯವನ್ನು ಇನ್ನಷ್ಟು ಇಮ್ಮಡಿಗೊಳಿಸುತ್ತದೆ. ಇಲ್ಲಿಂದ ಮುಂದೆ ಸಾಗಿದರೆ ಚಾರ್ಮಾಡಿ ಘಾಟಿಯೂ ಪ್ರವಾಸಿಗರ ನೆಚ್ಚಿನ ತಾಣವಾಗಿದೆ. ಮಳೆಗಾಲದಲ್ಲಂತೂ ಹೆಜ್ಜೆಗೊಂದು ಜಲಪಾತಗಳು ರಸ್ತೆಗೆ ಧುಮ್ಮಿಕ್ಕುತ್ತಿರುತ್ತವೆ. ಈ ಜಲಪಾತಗಳನ್ನು ಕಣ್ತುಂಬಿಕೊಳ್ಳುತ್ತ ಪ್ರಯಾಣಿಸುವುದು ಒಂದು ವಿನೂತನ ಅನುಭವವನ್ನು ನೀಡುತ್ತದೆ. ಹೀಗಾಗಿಯೇ ಮಳೆಗಾಲದಲ್ಲಿ ಇಲ್ಲಿ ಪ್ರವಾಸಿಗರ ಸಂಖ್ಯೆ ಹೆಚ್ಚಾಗಿ ಟ್ರಾಫಿಕ್ ಜಾಮ್ ಸಹಜ ಎನ್ನುವಂತಾಗುತ್ತದೆ.

ಮೂಡಿಗೆರೆ ತಾಲೂಕು ಮುಗಿಲೆತ್ತರದ ಶಿಖರಗಳು, ಪ್ರವಾಸಿ ತಾಣಗಳು ಮಾತ್ರವಲ್ಲದೆ ಹಲವು ಧಾರ್ಮಿಕ ಕ್ಷೇತ್ರಗಳಿಗೂ ಪ್ರಸಿದ್ಧಿಪಡೆದಿದೆ. ಬೆಟ್ಟದ ಭೈರವೇಶ್ವರ ದೇವಾಲಯ, ದೇವವೃಂದ ಶ್ರೀ ಪ್ರಸನ್ನ ರಾಮೇಶ್ವರ ದೇವಸ್ಥಾನ, ವಸಂತಿಕ ದೇವಾಲಯಗಳು ಭಕ್ತರ ನೆಮ್ಮದಿಯ ಕೇಂದ್ರಗಳಾಗಿರುವುದು ವಿಶೇಷ. ಬೆಟ್ಟದ ಶ್ರೀ ಭೈರವೇಶ್ವರ ದೇವಸ್ಥಾನ 600 ವರ್ಷಗಳಿಗೂ ಹಳೆಯದು ಎನ್ನಲಾಗುತ್ತದೆ. ಇಲ್ಲಿನ ಕಲ್ಲಿನ ಕೆತ್ತನೆಗಳು ಮತ್ತು ಶಿಲ್ಪಕಲೆ ವಿಶಿಷ್ಟ ವಾಸ್ತುಶಿಲ್ಪವನ್ನು ಹೊಂದಿವೆ. ಇಲ್ಲಿಯೂ ಹಚ್ಚ ಹಸಿರಿನ ಬೆಟ್ಟ ಗುಡ್ಡಗಳ ಆಹ್ಲಾದಕರ ವಾತಾವರಣವನ್ನು ಕಣ್ತುಂಬಿಕೊಳ್ಳಬಹುದಾಗಿದೆ. ದೇವವೃಂದದ ಶ್ರೀ ಪ್ರಸನ್ನ ರಾಮೇಶ್ವರ ದೇವಾಲಯ 12ನೇ ಶತಮಾನಕ್ಕೂ ಹಿಂದಿನದು. ಇಲ್ಲಿ ಪುರಾಣದ ವಿವಿಧ ದೃಶ್ಯಗಳನ್ನು ಚಿತ್ರಿಸುವ ಸಂಕೀರ್ಣವಾದ ಕೆತ್ತನೆಗಳು ಮತ್ತು ಶಿಲ್ಪ ಕಲೆಗಳು ಭಕ್ತರಿಗೆ ಮುದ ನೀಡುತ್ತವೆ. ಇಲ್ಲಿರುವ ಶಿವ ದೇವಾಲಯ ಭಕ್ತರ ನೆಚ್ಚಿನ ಯಾತ್ರಾಸ್ಥಳವಾಗಿದೆ. ತಾಲೂಕಿನ ಅಂಗಡಿ ಎಂಬ ಹಳ್ಳಿಯಲ್ಲಿರುವ ವಸಂತಿಕ ದೇವಾಲಯ 10ನೇ ಶತಮಾನದಷ್ಟು ಹಿಂದಿನದು ಎನ್ನುವುದು ವಿಶೇಷ. ಇಲ್ಲಿರುವ ಶಿವನ ದೇವಾಲಯದಲ್ಲಿ ಹೊಯ್ಸಳರ ಕಾಲದ ಕಲಾತ್ಮಕತೆಯ ಶ್ರೇಷ್ಠತೆಯ ಕೆತ್ತನೆಗಳು ಮನಸೂರೆಗೊಳ್ಳುತ್ತವೆ.

ಕೊಟ್ಟಿಗೆಹಾರದ ಕೆ.ಪಿ.ಪೂರ್ಣಚಂದ್ರ ತೇಜಸ್ವಿ ಪ್ರತಿಷ್ಠಾನವು ತೇಜಸ್ವಿ ಅವರ ಚಿಂತನೆ, ಬರಹ, ಬದುಕಿನ ಸಾಕಾರಗೊಳಿಸುವ ಕಾರ್ಯನಿರ್ವಹಿಸುತ್ತಿದೆ. ವಸ್ತು ಸಂಗ್ರಹಾಲಯ, ಕೀಟ ಸಂಗ್ರಹಾಲಯ, ಚಿಟ್ಟೆ ಉದ್ಯಾನ, ಗಾಜಿನ ಓದಿನ ಮನೆ ಮತ್ತು ಆರ್ಕಿಡ್ ಲೋಕ ಇಲ್ಲಿನ ಪ್ರಮುಖ ಆಕರ್ಷಣೆ. ಕೀಟ ಸಂಗ್ರಹಾಲಯದಲ್ಲಿ ಕಾಣ ಸಿಗುವ ಕೀಟಗಳು ಕೀಟಜಗತ್ತಿನ ವಿಸ್ಮಯವನ್ನು ತೆರೆದಿಡುತ್ತವೆ. ಮಲೆನಾಡಿನ ಜನಜೀವನ ಸಂಸ್ಕೃತಿಯನ್ನು ಪ್ರತಿಬಿಂಬಿಸುವ ವಸ್ತುಗಳ ಸಂಗ್ರಹವಿದ್ದು ಇದರ ಜತೆಗೆ ತೇಜಸ್ವಿ ಅವರ ಆಸಕ್ತಿಯ ಕ್ಷೇತ್ರಗಳಿಗೆ ಸಂಬಂಧಿಸಿದ ವಸ್ತುಗಳಾದ ಕ್ಯಾಮರಾ, ಟೈಪ್‌ರೈಟರ್ ಮುಂತಾದ ವಸ್ತುಗಳನ್ನು ನೋಡಬಹುದಾಗಿದೆ. ಇದರ ಜತೆಗೆ ಅಪರೂಪದ ನಾಣ್ಯಗಳು, ಆಯುಧಗಳು ಕಾಣಸಿಗುತ್ತವೆ. ಚಿಟ್ಟೆ ಉದ್ಯಾನದಲ್ಲಿ ಚಿಟ್ಟೆಗಳಿಗೆ ಸಂಬಂಧಿಸಿದ ಸಸ್ಯಗಳನ್ನು ಹಾಕಲಾಗಿದ್ದು ತೇಜಸ್ವಿ ಪ್ರತಿಷ್ಠಾನದಲ್ಲಿ ಸಾಮಾನ್ಯವಾಗಿ ಕಂಡುಬರುವ ಚಿಟ್ಟೆಗಳ ಮಾಹಿತಿಯನ್ನು ಉದ್ಯಾನದಲ್ಲಿ ಕಾಣಬಹುದು. ಆರ್ಕಿಡ್ ಲೋಕದಲ್ಲಿ ಆರ್ಕಿಡ್‌ಗಳ ಮಹತ್ವ, ಸಂರಕ್ಷಣೆ ಮತ್ತು ವೈವಿಧ್ಯತೆಯನ್ನು ಕುರಿತ ಮಾಹಿತಿಗಳಿದ್ದು ಬಗೆಬಗೆಯ ಆರ್ಕಿಡ್‌ಗಳನ್ನು ನೋಡಬಹುದಾಗಿದೆ. ಗಾಜಿನ ಓದಿನ ಮನೆಯಲ್ಲಿ ಸುತ್ತ ಕಣ್ಣು ಹಾಯಿಸಿದಷ್ಟೂ ಪ್ರಕೃತಿ ಸೌಂದರ್ಯವನ್ನು ವೀಕ್ಷಿಸುವಂತೆ ಗಾಜಿನ ಗೋಡೆಗಳನ್ನು ನಿರ್ಮಿಸಲಾಗಿದ್ದು ಪ್ರಶಾಂತ ಪರಿಸರದಲ್ಲಿ ಪುಸ್ತಕಗಳನ್ನು ಓದಬಹುದಾಗಿದೆ. ತೇಜಸ್ವಿ ಅವರ ಪುಸ್ತಕಗಳು, ತೇಜಸ್ವಿ ಅವರ ಆಸಕ್ತಿಯ ಕ್ಷೇತ್ರಗಳಾದ ಪರಿಸರ, ಜೀವಜಗತ್ತು, ಬಾಹ್ಯಾಕಾಶ, ಚಿತ್ರಕಲೆ, ಪಕ್ಷಿಲೋಕ ಮುಂತಾದವುಗಳ ಕುರಿತ ಕೃತಿಗಳು ಓದಲು ಸಿಗುತ್ತವೆ. ತೇಜಸ್ವಿ ಪ್ರತಿಷ್ಠಾನದಲ್ಲಿ ತೇಜಸ್ವಿ ಅವರ ಪುಸ್ತಕಗಳು ರಿಯಾಯಿತಿ ದರದಲ್ಲಿ ದೊರಕುತ್ತವೆ. ನಾಟಕ, ವಿಚಾರ ಸಂಕಿರಣ, ಸಂವಾದ, ಚಿತ್ರಕಲಾ ಶಿಬಿರ, ಚಾರಣ ಮುಂತಾದ ಕಾರ್ಯಕ್ರಮಗಳು ನಿರಂತರವಾಗಿ ನಡೆಯುತ್ತಿರುತ್ತವೆ.