ಕಸದ ಗೂಡಾದ ಮೂಡಿಗೆರೆ ರಾಷ್ಟ್ರೀಯ ಹೆದ್ದಾರಿ 173

ಮೂಡಿಗೆರೆ: ಪಟ್ಟಣ ಸೇರಿದಂತೆ ಗ್ರಾಮೀಣ ಭಾಗದ ರಾಷ್ಟ್ರೀಯ ಹೆದ್ದಾರಿ ಬದಿಯಲ್ಲಿ ಕಸದ ರಾಶಿಯೇ ಸಂಗ್ರಹವಾಗಿದ್ದು, ಹೆದ್ದಾರಿಯಲ್ಲಿ ಸಾಗುವವರು ದುರ್ವಾಸನೆಯಿಂದ ಮೂಗು ಮುಚ್ಚಿಕೊಂಡು ಹೋಗಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಇದರಿಂದ ಸಾಂಕ್ರಾಮಿಕ ರೋಗ ಹರಡುವ ಆತಂಕ ಹೆಚ್ಚಾಗಿದೆ.

ರಾಷ್ಟ್ರೀಯ ಹೆದ್ದಾರಿ 173ರಲ್ಲಿ ಬಿಳಗುಳ ಗ್ರಾಮದ ಸಿದ್ಧಾರ್ಥ ವನದ ಸಮೀಪ, ರಾಷ್ಟ್ರೀಯ ಹೆದ್ದಾರಿ 73ರಲ್ಲಿ ಮುದ್ರೆಮುನೆ ನಿರ್ಜನ ಪ್ರದೇಶ, ಹ್ಯಾಂಡ್‌ಪೋಸ್ಟ್, ಬಿದರಹಳ್ಳಿ ಸಾರಿಗೆ ಬಸ್ ಘಟಕದ ಎದುರು, ಗೆಂಡೆಹಳ್ಳಿ ರಸ್ತೆ ಬದಿ, ಪಟ್ಟಣದ ಕೆ.ಎಂ.ರಸ್ತೆಯ ಮಾಂಸದ ಅಂಗಡಿ ಎದುರಿನ ಪ್ರದೇಶ ಕಸ ಸುರಿಯುವ ತಾಣಗಳಾಗಿವೆ. ಈ ಸ್ಥಳಗಳಿಗೆ ಸ್ಥಳೀಯರು ಮಾತ್ರವಲ್ಲದೇ ಅಕ್ಕಪಕ್ಕದ ಗ್ರಾಮದವರು, ದಾರಿ ಹೋಕರು, ಪ್ರವಾಸಿಗರೂ ಕಸ ಸುರಿದು ಹೋಗುತ್ತಾರೆ.

ಕೋಳಿ ಅಂಗಡಿ ತ್ಯಾಜ್ಯ, ಕತ್ತರಿಸಿದ ಕೂದಲು, ಮನೆಗಳ ಕಸ, ಹೋಟೆಲ್, ಅಂಗಡಿಗಳ ಕಸವನ್ನು ಮುದ್ರೆಮನೆ ನಿರ್ಜನ ಪ್ರದೇಶ, ಹ್ಯಾಂಡ್‌ಪೋಸ್ಟ್, ಬಿದರಹಳ್ಳಿ ಬಸ್‌ಘಟಕದ ಎದುರು ಬಿಳಗುಳದ ಸಿದ್ಧಾರ್ಥವನ, ಗೆಂಡೆಹಳ್ಳಿ ರಸ್ತೆ ಮತ್ತು ಪಟ್ಟಣದ ವಿವಿಧ ಬಡಾವಣೆಗಳಲ್ಲಿ ತಂದು ಸುರಿಯುತ್ತಾರೆ. ಇದರಿಂದ ಹೆದ್ದಾರಿ ಬದಿ ಕಸ ರಾಶಿಯೇ ನಿರ್ಮಾಣವಾಗಿದೆ. ಸಾರ್ವಜನಿಕರು ಈ ರಸ್ತೆಯಲ್ಲಿ ಓಡಾಡುವಾಗ ಮೂಗು ಮುಚ್ಚಿಕೊಂಡು ಸಾಗಬೇಕಾದ ದುಸ್ಥಿತಿ ಉಂಟಾಗಿದೆ. ಇಷ್ಟಾದರೂ ಗ್ರಾಪಂ ಮತ್ತು ಪಪಂ ಆಡಳಿತ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡು ಹಿಡಿಯಲು ಮುಂದಾಗದಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಪಟ್ಟಣದಲ್ಲಿ ನಾಲ್ಕೈದು ವಾಹನಗಳಲ್ಲಿ ಮನೆ, ವಾಣಿಜ್ಯ ಮಳಿಗೆಗಳಿಂದ ಪ್ರತಿದಿನ ಕಸ ಸಂಗ್ರಹಿಸಿ ಕೊಂಡೊಯ್ಯಲಾಗುತ್ತದೆ. ಪೌರಕಾರ್ಮಿಕರು ಪ್ರತಿದಿನ ಬೆಳಗ್ಗೆ ಎಲ್ಲ ಬೀದಿಗಳನ್ನು ಗುಡಿಸಿ ಸ್ವಚ್ಛಗೊಳಿಸುತ್ತಾರೆ. ಆದರೂ ಮನೆ ಮತ್ತು ವಾಣಿಜ್ಯ ಮಳಿಗೆಗಳಲ್ಲಿ ಸಂಗ್ರಹವಾಗುವ ಕಸ, ತ್ಯಾಜ್ಯವನ್ನು ಬಸ್‌ನಿಲ್ದಾಣದ ಆವರಣ, ತತ್ಕೊಳ ರಸ್ತೆಯ ಅಂಬೇಡ್ಕರ್ ಭವನದ ಎದುರು, ಬಿಎಸ್‌ಎನ್‌ಎಲ್ ಕಚೇರಿ, ಗಂಗನಮಕ್ಕಿ ತಿರುವು, ಕೆ.ಎಂ.ರಸ್ತೆಯ ಮಾಂಸದಂಗಡಿ ಎದುರು ಮತ್ತಿತರ ಕಡೆ ಕೆಲವರು ಎಸೆದು ಹೋಗುತ್ತಾರೆ. ಇದನ್ನು ಪ್ರತಿದಿನ ಬೆಳಗ್ಗೆ ಪೌರಕಾರ್ಮಿಕರು ಸ್ವಚ್ಛಗೊಳಿಸಿದ ಕೆಲವೇ ಹೊತ್ತಿನಲ್ಲಿ ಮತ್ತೆ ಕಸ ತಂದು ಸುರಿಯಲು ಆರಂಭಿಸುತ್ತಾರೆ. ಕಸ, ತ್ಯಾಜ್ಯದ ರಾಶಿಯಿಂದ ಸಾಂಕ್ರಾಮಿಕ ರೋಗ ಹರಡುವ ಸಾಧ್ಯತೆಯೂ ಹೆಚ್ಚಾಗಿದೆ.

ಹೆಸಗಲ್, ಹಳೇಮೂಡಿಗೆರೆ, ಬಿದರಹಳ್ಳಿ, ಚಿನ್ನಿಗ, ದಾರದಹಳ್ಳಿ ಗ್ರಾಪಂಗಳಲ್ಲಿ ಪ್ರತಿದಿನ ಕಸವಿಲೇ ವಾಹನ ಮನೆ ಬಾಗಿಲಿಗೆ ತೆರಳಿದರೂ ಕಸವನ್ನು ಮಾತ್ರ ರಾಷ್ಟ್ರೀಯ ಹೆದ್ದಾರಿ ಬದಿಯಲ್ಲಿ ಕೆಲವರು ತಂದು ಸುರಿಯುವ ಚಾಳಿ ಬಿಟ್ಟಿಲ್ಲ. ಹೆದ್ದಾರಿ ಬದಿಯಲ್ಲಿ ಸುರಿಯುವ ಕಸ, ಸತ್ತ ಪ್ರಾಣಿಗಳ ಕಳೇಬರ ಸಂಗ್ರವಾಗಿ ದೊಡ್ಡ ಪ್ರಮಾಣದ ರಾಶಿ ಬಿದ್ದಿರುತ್ತದೆ. ಅದನ್ನು ಗ್ರಾಪಂಗಳು ವಿಲೇವಾರಿ ಮಾಡಲು ಹರಸಾಹಸ ಪಡಬೇಕಾಗಿದೆ. ಗ್ರಾಪಂಗಳಲ್ಲಿ ಕಸವಿಲೇ ವಾಹನವಿದೆ. ಪೌರಕಾರ್ಮಿಕರಿಲ್ಲ. ಹಾಗಾಗಿ ಹೆದ್ದಾರಿ ಬದಿ ರಾಶಿ ಬಿದ್ದ ಕಸವನ್ನು ತೆರವುಗೊಳಿಸಲು ಗ್ರಾಪಂಗಳಿಗೆ ಕಷ್ಟವಾಗಿದೆ.