70 ಅಡಿ ಜಾಗ ನಿಗದಿಗೆ ಖಾತೆದಾರರ ಆಕ್ಷೇಪ (road)

ಎನ್.ಆರ್.ಪುರ: ರಸ್ತೆ ಅಗಲೀಕರಣಕ್ಕಾಗಿ ಮನೆ ತೆರವು ಮಾಡಿಕೊಟ್ಟವರು ಹೊಸ ಕಟ್ಟಡ ನಿರ್ಮಾಣ ಮಾಡಲು ರಸ್ತೆಯಿಂದ 70 ಅಡಿ ದೂರ ಬಿಟ್ಟು ನಿರ್ಮಾಣ ಮಾಡುವ ಕಟ್ಟಡಕ್ಕೆ ಮಾತ್ರ ಪರವಾನಗಿ ನೀಡುವುದಾಗಿ ಪಪಂ ಅಧಿಕಾರಿಗಳ ಹೇಳಿಕೆಗೆ ಬುಧವಾರ ಖಾತೆದಾರರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. 

ಪಪಂನಲ್ಲಿ ನಡೆದ ಪಟ್ಟಣದ ಪ್ರಮುಖ ರಸ್ತೆ ಅಗಲೀಕರಣ ವ್ಯಾಪ್ತಿಗೆ ಬರುವ ಖಾತೆದಾರರ ಸಭೆಯಲ್ಲಿ ಚರ್ಚೆ ನಡೆಯಿತು.

ರಸ್ತೆ ಅಗಲೀಕರಣಕ್ಕಾಗಿ ಮನೆ ತೆರವು ಮಾಡಿಕೊಟ್ಟವರು ಹೊಸ ಕಟ್ಟಡ ನಿರ್ಮಾಣ ಮಾಡಲು ರಸ್ತೆಯಿಂದ 70 ಅಡಿ ದೂರ ಬಿಟ್ಟು ನಿರ್ಮಾಣ ಮಾಡುವ ಕಟ್ಟಡ ನಿರ್ಮಾಣಕ್ಕೆ ಮಾತ್ರ ಪರವಾನಗಿ ನೀಡಲಾಗುವುದೆಂದು ಪಪಂ ಅಧಿಕಾರಿಗಳು ಹೇಳುತ್ತಿದ್ದಾರೆ. ರಸ್ತೆ ಅಗಲೀಕರಣಕ್ಕೆ ಜಾಗ ತೆರವು ಮಾಡುವ ಮುನ್ನ ಕೇವಲ 30 ಅಡಿ ಬಿಟ್ಟರೆ ಸಾಕು ಎಂದು ಹೇಳಿ ಈಗ 70 ಅಡಿ ಎನ್ನುತ್ತಿರುವುದಕ್ಕೆ ಸಭೆಯಲ್ಲಿದ್ದ ಖಾತೆದಾರರೆಲ್ಲರೂ ವಿರೋಧ ವ್ಯಕ್ತಪಡಿಸಿದರು.

 ಖಾತೆದಾರ ಎಚ್.ಎನ್.ರವಿಶಂಕರ್ ಮಾತನಾಡಿ, ರಸ್ತೆ ಮಾರ್ಜಿನ್‌ನಿಂದ 70 ಅಡಿ ಜಾಗ ಬಿಟ್ಟು ಮನೆ ನಿರ್ಮಾಣ ಮಾಡಿ ಎಂದರೆ ಹೇಗೆ? ಕೆಲವರಿಗೆ 80ರಿಂದ 90 ಅಡಿ ಜಾಗವಿದೆ. 70 ಅಡಿ ಬಿಟ್ಟರೆ 10 ಅಡಿಯಲ್ಲಿ ಏನು ನಿರ್ಮಾಣ ಮಾಡಬೇಕು. ಬಡವರೆಲ್ಲರೂ ಬೀದಿ ಪಾಲಾಗುತ್ತಾರೆ ಎಂದರು.

ಸಿಗ್ಬತ್‌ವುಲ್ಲಾ ಮಾತನಾಡಿ, ನಮಗೆ ರಸ್ತೆ ಅಗಲೀಕರಣಕ್ಕೆ ವಿರೋಧವಿಲ್ಲ, ಆಕ್ಷೇಪಣೆಯೂ ಇಲ್ಲ. ಆದರೆ ಪ್ರವಾಸಿ ಮಂದಿರದ ಬಳಿ ಬಾಬಾ ಬುಡನ್‌ಗಿರಿ ಜಾಗವೆಂದು ಅಲ್ಲಿನ ವಾಸಿಗಳಿಗೆ ಖಾತೆಯೆ ಮಾಡಿಕೊಟ್ಟಿಲ್ಲ. ಹಿಂದೆ ಅವರಿಗೆ ಪಪಂಯಿಂದ ಎಲ್ಲ ಮೂಲ ಸೌಕರ್ಯ ನೀಡಲಾಗಿದೆ. ಈಗ ಖಾತೆ ಇಲ್ಲ, ಸದರಿ ಜಾಗಕ್ಕೆ ಹಕ್ಕಿಲ್ಲ ಎಂದು ಅವರಿಗೆ ಪರಿಹಾರ ನೀಡದಿದ್ದರೆ ಹೇಗೆ? ಅಧಿಕಾರಿಗಳು ಹಿಂದೆ ಮಾಡಿದ ತಪ್ಪಿಗೆ ಬಡವರು ನಿರ್ಗತಿಕರಾಗಬೇಕಾಗದ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದಕ್ಕೆ ಪರಿಹಾರ ಕಂಡುಕೊಡಬೇಕು ಎಂದು ಒತ್ತಾಯಿಸಿದರು.

ಎಸಿ ನಟೇಶ್ ಮಾತನಾಡಿ, ದೇಶಕ್ಕೆ ಒಂದೇ ಭೂಸ್ವಾಧೀನ ಕಾಯ್ದೆ ಇರುತ್ತದೆ. ಅದರಡಿಯಲ್ಲಿ ಎಲ್ಲವುದಕ್ಕೂ ಅವಕಾಶಗಳಿರುತ್ತವೆ. ನಾವು ಕರ್ತವ್ಯ ನಿರ್ವಹಿಸುತ್ತೇವೆ. ಖಾತೆದಾರರ ಜಾಗವನ್ನು ಸ್ವಾಧೀನಪಡಿಸಿಕೊಳ್ಳುವಾಗ ಮಾತ್ರ ಈ ಕಾಯ್ದೆಯಡಿ ಕಾರ್ಯನಿರ್ವಹಿಸುತ್ತೇವೆ. ಬೇರೆ ಜಾಗಗಳಿಗೆ ಅನ್ವಯಿಸುವುದಿಲ್ಲ. ಇನ್ನು 30 ಅಡಿ, 70 ಅಡಿ ಜಾಗ ಬಿಟ್ಟು ಕಟ್ಟಡ ನಿರ್ಮಾಣ ಮಾಡಬೇಕು ಎಂಬುವುದರ ಬಗ್ಗೆ ಪಪಂ ನಿರ್ಧರಿಸಬೇಕು ಎಂದು ಹೇಳಿದರು. 

ಪಪಂ ಅಧಿಕಾರಿ ವಿಜಯಕುಮಾರ್ ಮಾತನಾಡಿ, ಪಟ್ಟಣದಲ್ಲಿನ ಕೆಲವು ಖಾತೆದಾರರ ದಾಖಲೆಗಳ ಸಮಸ್ಯೆ ಹಾಗೂ ಕೆಲವು ತಾಂತ್ರಿಕ ದೋಷಗಳಿಂದಾಗಿ ಇ-ಸ್ವತ್ತು ವಿತರಣೆ ವಿಳಂಬವಾಗುತ್ತಿದೆ ಎಂದು ತಿಳಿಸಿದರು. ಸಭೆಯಲ್ಲಿ ಪಿಡಬ್ಲುೃಡಿ ಇಂಜಿನಿಯರ್ ದಿನೇಶ್, ಎಸಿ ಕಚೇರಿ ಸಿಬ್ಬಂದಿ ಹಾಗೂ ಖಾತೆದಾರರು ಇದ್ದರು.