ಕೆಬಿಎಲ್ ಸುರಕ್ಷೆ ವಿಮೆ ಪರಿಹಾರ ವಿತರಣೆ

ಬಣಕಲ್: ಬೈಕ್ ಅಪಘಾತದಲ್ಲಿ ಮೃತಪಟ್ಟ ಕೂವೆ ಗ್ರಾಮದ ಫ್ರಾನ್ಸಿಸ್ ಕ್ಸೇವಿಯರ್ ಮೋನಿಸ್ ಅವರ ಕುಟುಂಬಕ್ಕೆ ಕರ್ಣಾಟಕ ಬ್ಯಾಂಕ್( ಕೆಬಿಎಲ್) ಸುರಕ್ಷಾ ವಿಮೆ ಯೋಜನೆಯಡಿ 10 ಲಕ್ಷ ರೂ. ಪರಿಹಾರದ ಚೆಕ್ ವಿತರಿಸಲಾಯಿತು.

ಕೆಲ ತಿಂಗಳ ಹಿಂದೆ ಗಬ್ಗಲ್‌ನಲ್ಲಿ ಸಂಭವಿಸಿದ ಬೈಕ್ ಅಪಘಾತದಲ್ಲಿ ಫ್ರಾನ್ಸಿಸ್ ಕ್ಸೇವಿಯರ್ ಮೋನಿಸ್ ಮೃತಪಟ್ಟಿದ್ದರು. ಇವರು  ಕರ್ಣಾಟಕ ಬ್ಯಾಂಕ್‌ನ ನಿಡುವಾಳೆ ಶಾಖೆಯಲ್ಲಿ ಉಳಿತಾಯ ಖಾತೆ ಹೊಂದಿದ್ದಲ್ಲದೆ, ಬ್ಯಾಂಕ್‌ನ ವಾರ್ಷಿಕ 369 ರೂ. ಪ್ರೀಮಿಯಂನ ಕೆಬಿಎಲ್ ಸುರಕ್ಷಾ ವಿಮೆ ಯೋಜನೆಗೆ ನೋಂದಾಯಿಸಿಕೊಂಡಿದ್ದರು.

ಅಪಘಾತದ ಬಳಿಕ ಮೃತರ ಕುಟುಂಬಕ್ಕೆ ಆರ್ಥಿಕ ಸಂಕಷ್ಟ ಎದುರಾದ ಸಂದರ್ಭದಲ್ಲಿ ನಿಡುವಾಳೆ ಶಾಖೆ ಅಧಿಕಾರಿಗಳು ಅಗತ್ಯ ದಾಖಲೆಗಳನ್ನು ಸಂಗ್ರಹಿಸಿ, ಯೂನಿವರ್ಸಲ್ ಸೋಂಪೋ ಜನರಲ್ ಇನ್ಶೂರೆನ್ಸ್ ಕಂಪನಿಯೊಂದಿಗೆ ಸಮನ್ವಯ ಸಾಧಿಸಿ ವಿಮೆ ಪ್ರಕ್ರಿಯೆಯನ್ನು ತ್ವರಿತವಾಗಿ ಪೂರ್ಣಗೊಳಿಸಿದರು. ವಿಮೆ ಯೋಜನೆಯ ನಾಮಿನಿಯಾಗಿರುವ ಮೃತರ ಪುತ್ರ ಲಾಯ್ಡ ಮೋನಿಸ್ ಅವರಿಗೆ 10 ಲಕ್ಷ ರೂ. ಮೊತ್ತದ ಚೆಕ್ ಅನ್ನು ಚಿಕ್ಕಮಗಳೂರು ಕ್ಲಸ್ಟರ್ ವ್ಯವಸ್ಥಾಪಕ ಸುಜಿತ್‌ಕುಮಾರ್ ವಿತರಿಸಿದರು.

ಕರ್ಣಾಟಕ ಬ್ಯಾಂಕ್ ನಿಡುವಾಳೆ ಶಾಖಾ ವ್ಯವಸ್ಥಾಪಕ ಪ್ರದ್ಯುಮ್ನ ವಿ. ರಾವ್, ಉಪ ವ್ಯವಸ್ಥಾಪಕ ಪಣಿಕಿರಣ್, ಕೃಷಿ ಅಧಿಕಾರಿ ಸಚಿನ್, ಸಿಬ್ಬಂದಿ ವಿಶ್ವನಾಥ್, ಡಿಂಪ್ಲಿನ್ ಡಿಮೆಲ್ಲೋ, ಸುಪ್ರೀತ್, ಸುಬ್ರಹ್ಮಣ್ಯ, ಯೂನಿವರ್ಸಲ್ ಸೋಂಪೋ ಜನರಲ್ ಇನ್ಶೂರೆನ್ಸ್ ಕಂಪನಿ ವಲಯ ಮ್ಯಾನೇಜರ್ ಸೋಮಪ್ರಸಾದ್ ಹಾಗೂ ಕಂಪನಿ ಪ್ರತಿನಿಧಿ ನಿಶ್ಚಿತ್ ಇದ್ದರು.