ಶಾಸನವು ನಾಲ್ಕು ಅಡಿ ಎತ್ತರವಿದ್ದು ಮೂರು ಪಟ್ಟಿಕೆಗಳಲ್ಲಿರುವ ಈ ವೀರಗಲ್ಲಿನ ಮೊದಲ ಹಂತದಲ್ಲಿ ವೀರಾವೇಶದಿಂದ ಹೋರಾಡುತ್ತಿರುವ ವೀರ, ಎರಡನೆ ಹಂತದಲ್ಲಿ ವೀರನಿಗೆ ಅಪ್ಸರೆಯರೊಂದಿಗೆ ವೀರಸ್ವರ್ಗ ಪ್ರಾಪ್ತವಾಗುವಿಕೆ ಹಾಗೂ ಮೇಲಿನ ಹಂತದಲ್ಲಿ ವೀರನಿಗೆ ದೈವತ್ವ ಪ್ರಾಪ್ತಿಯಾಗಿರುವ ಶಿಲ್ಪದ ಕೆತ್ತನೆಗಳಿವೆ. ನಡುವಿನ ಎರಡು ಪಟ್ಟಿಕೆಗಳಲ್ಲಿ ಹಾಗೂ ಬಲಭಾಗದ ಅಂಚಿನಲ್ಲಿ ಬರವಣಿಗೆ ಇದ್ದು ಅಲ್ಲಲ್ಲಿ ಕೆಲವು ಅಕ್ಷರಗಳು ಸವೆದು ಹೋಗಿವೆ.
ಶಾಸನದ ಮೊದಲನೆಯ ಪಟ್ಟಿಯಲ್ಲಿ ಸ್ವಸ್ತಿ ಶ್ರೀ ಮನು ಮಹಾಮಂಡಳೇಶ್ವರ ತ್ರಿಬುವನ ಮಲ್ಲ ಚಾಳುಕ್ಯ ಚಕ್ರವರ್ತಿ ಭುಜಬಲ ವೀರಗಂಗ ಪ್ರತಾಪ ಹೊಯ್ಸಳ ವಿಜಯನಾರಸಿಂಹ ದೇವರು ರಾಜ್ಯಂಗೈಯುತ್ತಲಿರೆ ಎಂಬ ವಿವರಗಳಿವೆ. ಎರಡನೆಯ ಪಟ್ಟಿಯಲ್ಲಿ ಇರುವ ಕೆಲವು ಅಕ್ಷರಗಳು ಸವೆದು ಹೋಗಿರುವುದರಿಂದ ಸ್ಪಷ್ಟವಾಗಿ ಏನನ್ನೂ ಹೇಳಲಾಗುವುದಿಲ್ಲ. ಬಲಭಾಗದ ಅಂಚಿನಲ್ಲಿ ಕಳ್ಳರ ಕೂಡೆ ಕಾದಿ ಬಿದ್ದು ಸುರಲೋಕ ಪ್ರಾಪ್ತಿ ಆದ ಎಂದಿದೆ.
ಮೃತ ವೀರನ ಹೆಸರು ಹಾಗೂ ಆಳ್ವಿಕೆ ಮಾಡುತ್ತಿದ್ದ ರಾಜಧಾನಿಯ ಹೆಸರುಗಳು ಸ್ಪಷ್ಟವಾಗಿಲ್ಲ. ಶಾಸನದಲ್ಲಿ ಹೊಯ್ಸಳರ ಬಿರುದುಗಳ ಜೊತೆಯಲ್ಲಿ ಚಾಲುಕ್ಯ ಚಕ್ರವರ್ತಿ ಎಂಬುದು ವಿಶೇಷವಾಗಿದೆ.
