ಹದ ಮಳೆಯಿಂದ ಈರುಳ್ಳಿ ಬಿತ್ತನೆಗೆ ಮುಂದಾದ ರೈತರು

ಬೀರೂರು: ಕೆಲವು ದಿನಗಳಿಂದ ಹೋಬಳಿಯಾದ್ಯಂತ ಸುರಿದ ಹದ ಮಳೆಯಿಂದಾಗಿ ರೈತರು ಸಂತಸಗೊಂಡಿದ್ದು ಈಗಾಗಲೇ ಭೂಮಿ ಸಿದ್ಧತೆ ಮಾಡಿಕೊಂಡಿರುವ ಹಲವು ಕೃಷಿಕರು ಈರುಳ್ಳಿ ಬಿತ್ತನೆಗೆ ಮುಂದಾಗಿದ್ದಾರೆ. ಇನ್ನು ಕೆಲವರು ಹೊಲ ಹಸನು ಮಾಡುವ ಕಾರ್ಯದಲ್ಲಿ ತೊಡಗಿದ್ದಾರೆ.

ಬೀರೂರಿನಲ್ಲಿ ಅಡಿಕೆ ರೈತರ ಪ್ರಮುಖ ವಾಣಿಜ್ಯ ಬೆಳೆಯಾಗಿದೆ. ಉಳಿದಂತೆ ರಾಗಿ, ಸೂರ್ಯಕಾಂತಿ, ಮೆಕ್ಕೆಜೋಳ, ಈರುಳ್ಳಿ, ಶೇಂಗಾ, ಆಲೂಗಡ್ಡೆ ಇನ್ನಿತರ ಬೆಳೆಗಳನ್ನು ರೈತರು ಬೆಳೆಯುತ್ತಾರೆ. ಸದ್ಯ ಕೃಷಿಗೆ ಪೂರಕ ವಾತಾವರಣ ಇರುವುದರಿಂದ ರೈತರು ತಮ್ಮ ಜಮೀನುಗಳತ್ತ ಮುಖ ಮಾಡಿದ್ದಾರೆ. 

ಮಾಗಿ ಉಳುಮೆ ನಂತರ ರೈತರು ಮಳೆಗಾಗಿ ಪ್ರಾರ್ಥಿಸುತ್ತಿದ್ದರು. ಭೂಮಿಯನ್ನು ಬಿತ್ತನೆಗೆ ಹದ ಮಾಡಿಕೊಂಡಿದ್ದರು. ಈಚೆಗೆ ಸುರಿದ ಮಳೆಯಿಂದಾಗಿ ಭೂಮಿ ಹದವಾಗಿದ್ದು ಈರುಳ್ಳಿ ಬೆಳೆಯುವ ರೈತರ ಮೊಗದಲ್ಲಿ ಮಂದಹಾಸ ಮೂಡಿದೆ. 

ಬೀರೂರು ಹೋಬಳಿಯಲ್ಲಿ ಬೀರೂರು ಕಾವಲು, ಹುಲ್ಲೇಹಳ್ಳಿ, ಯರೇಹಳ್ಳಿ, ದೋಗಿಹಳ್ಳಿ, ಹೊಸಳ್ಳಿ, ಮುದ್ದಾಪುರದ ಎರೆ, ಇಂಗ್ಲಾರನಹಳ್ಳಿ, ಚಿಕ್ಕಂಗಳ ಮುಂತಾದ ಕಡೆಗಳ 330ಕ್ಕೂ ಹೆಚ್ಚು ಹೆಕ್ಟೇರ್‌ಗಳಲ್ಲಿ ಈರುಳ್ಳಿ ಬೆಳೆಯಲಾಗುತ್ತಿತ್ತು. ಆದರೆ ಇತ್ತೀಚೆಗೆ ರೈತರು ವಾಣಿಜ್ಯ ಬೆಳೆಯಾದ ಅಡಿಕೆ ಕಡೆಗೆ ಮುಖ ಮಾಡಿರುವುದರಿಂದ ಈರುಳ್ಳಿ ಬೆಳೆಯುವ ಭೂಮಿಯಲ್ಲಿ ಸ್ವಲ್ಪಮಟ್ಟಿನ ಕುಸಿತವಾಗಿದೆ. ಉಳಿದಂತೆ ತಮ್ಮ ಸಾಂಪ್ರದಾಯಿಕ ಬೆಳೆಗಳ ಬಿತ್ತನೆಗೆ ಸಿದ್ಧತೆ ಮಾಡಿಕೊಂಡಿದ್ದಾರೆ.

ಎಕರೆ ಭೂಮಿಗೆ ಈರುಳ್ಳಿ ಬೀಜ 12 ಸೇರು ಅಗತ್ಯವಿದೆ. ಒಂದು ಸೇರಿಗೆ 400 ರೂ. ದರವಿದೆ. ಎತ್ತಿನ ಬೇಸಾಯ ಒಂದಕ್ಕೆ ರೂ. 2000ದಷ್ಟು ಹೆಚ್ಚಿಗೆ ಆಗಿದೆ. ರಾಸಾಯನಿಕ ಗೊಬ್ಬರ ಒಂದು ಚೀಲಕ್ಕೆ 2100 ರೂ. ಹಾಗೂ ಇನ್ನೂ ಕೂಲಿ ಕಾರ್ಮಿಕರು, ಊಟ, ತಿಂಡಿ ಸೇರಿದರೆ ಒಟ್ಟು ಬಿತ್ತನೆ ಕಾರ್ಯ ಮಾಡಬೇಕೆಂದರೆ ಎಕರೆ ಭೂಮಿಗೆ 20 ಸಾವಿರ ರೂ. ಆಗುತ್ತದೆ. 

ಹೋಬಳಿಯಲ್ಲಿ ರಾಗಿ 3200 ಹೆಕ್ಟೇರ್, ಮುಸುಕಿನ ಜೋಳ 1500 ಹೆಕ್ಟೇರ್, ಹೈ.ಜೋಳ 20, ಧಾನ್ಯಗಳು 50, ಏಕದಳ ಧಾನ್ಯಗಳಾದ ತೊಗರಿ 55, ಅಲಸಂದೆ 85, ಉದ್ದು 60, ಹೆಸರು 25, ಅವರೆ 40, ಹುರುಳಿ 100 ಹೆಕ್ಟೇರ್ ಮತ್ತು ದ್ವಿದಳ ಧಾನ್ಯಗಳಾದ ನೆಲಗಡಲೆ 100, ಎಳ್ಳು 150, ಸೂರ್ಯಕಾಂತಿ 350, ಹರಳು 40, ಹುಚ್ಚೆಳ್ಳು 30, ಸಾಸಿವೆ 10 ಹೆಕ್ಟೇರ್‌ಗಳಲ್ಲಿ ಬೆಳೆಯುವ ನಿರೀಕ್ಷೆ ಹೊಂದಲಾಗಿದೆ. ಕಾಲಕಾಲಕ್ಕೆ ತಕ್ಕಂತೆ ಮಳೆಯಾದಲ್ಲಿ ಬೆಳೆಯೂ ಕೈಸೇರುತ್ತದೆ.