ಕಡೂರು ಸ್ನಾತಕೊತ್ತರ ಕೇಂದ್ರದ ಅಭಿವೃದ್ಧಿಗೆ ಗ್ರಹಣ

ಕಡೂರು: ಜಿಲ್ಲೆಯ ಬಯಲು ಭಾಗದ ಸ್ನಾತಕೋತ್ತರ ಪದವಿಗೆ ಕಲಿಕೆಗೆ ಪ್ರಮುಖ ಕೇಂದ್ರವಾದ ಕಡೂರಿನ ಸ್ನಾತಕೊತ್ತರ ಅಧ್ಯಯನ ಕೇಂದ್ರದಲ್ಲಿ ಮೂಲ ಸೌಕರ್ಯಗಳ ಕೊರತೆಯಿಂದ ವಿದ್ಯಾರ್ಥಿಗಳ ದಾಖಲಾತಿ ಪ್ರಮಾಣ ಕ್ಷೀಣಿಸುತ್ತಿದೆ.

ಮಾಜಿ ಶಾಸಕ ಕೆ.ಎಂ.ಕೃಷ್ಣಮೂರ್ತಿ ಅವರ ದೂರದೃಷ್ಟಿಯಿಂದ ಕುವೆಂಪು ವಿಶ್ವವಿದ್ಯಾಲಯದಿಂದ ತಾಲೂಕಿಗೆ ಒಂದು ಸ್ನಾತಕೊತ್ತರ ಕೇಂದ್ರ ಮಂಜೂರು ಮಾಡಿಸಿದ್ದರು. 2007ರಲ್ಲಿ ಪ್ರಾರಂಭವಾದ ಕೇಂದ್ರದಲ್ಲಿ ಎಂಬಿಎ,ಎಂಬಿಇ, ಎಂಕಾಂ, ಎಂಎಸ್ಸಿ ಪಿಸಿ, ಎಂಎಸ್ಸಿ ಜಿಸಿ ಹಾಗೂ ಪಿಎಚ್‌ಡಿ ಸಂಶೋಧನೆಯ ವಿಭಾಗಗಳು ಆರಂಭಗೊಂಡಿದ್ದವು. ನಂತರ ಸ್ಥಳೀಯ, ಇತರೆ ಜಿಲ್ಲೆಗಳ ಹಾಗೂ ವಿದೇಶಿ ಸೇರಿ ಶೈಕ್ಷಣಿಕ ವರ್ಷದಲ್ಲಿ 260 ವಿದ್ಯಾರ್ಥಿಗಳಿಗೆ ಇಲ್ಲಿನ ಕೇಂದ್ರವು ಉನ್ನತ ವ್ಯಾಸಂಗಕ್ಕೆ ಆಸರೆಯಾಗಿತ್ತು.

ಶಂಕರಘಟ್ಟದ ಕುವೆಂಪು ವಿಶ್ವವಿದ್ಯಾಲಯದ ಪ್ರಧಾನ ಆಡಳಿತಾಧಿಕಾರಿ (ಕುಲಪತಿ ಮತ್ತು ಕುಲಸಚಿವರು) ಸ್ನಾತಕೋತ್ತರ ಕೇಂದ್ರದ ಅಭಿವೃದ್ಧಿಗೆ ನಿರಾಸಕ್ತಿ ವಹಿಸಿದ್ದರಿಂದ ವಿದ್ಯಾರ್ಥಿಗಳ ಸಂಖ್ಯೆ ಇಳಿಯಾಗಿ ಸ್ನಾತಕೋತ್ತರ ಕೇಂದ್ರವನ್ನು ಬೇರೆಡೆಗೆ ವರ್ಗಾವಣೆ ಮಾಡುವ ಲಕ್ಷಣಗಳು ಗೋಚರಿಸುತ್ತಿವೆ. ಇದರಿಂದ ಪ್ರಸ್ತುತ ವ್ಯಾಸಂಗ ನಡೆಸುತ್ತಿರುವ ಎಂಎಸ್ಸಿ ಪಿಸಿ, ಎಂಎಸ್ಸಿ ಜಿಸಿ, ಎಂಕಾಂ ಹಾಗೂ ಸಂಶೋಧಅಾ ವಿಭಾಗವು ಸೇರಿದಂತೆ 60 ವಿದ್ಯಾರ್ಥಿಗಳು ಹಾಗೂ ಅರೆಕಾಲಿಕವಾಗಿ ಕಾರ್ಯನಿರ್ವಹಿಸುತ್ತಿರುವ ಸಿಬ್ಬಂದಿಗಳು ಆತಂಕದಲ್ಲಿ ದಿನಕಳೆಯುತ್ತಿದ್ದಾರೆ.

ಮೂಲ ಸೌಕರ್ಯ ಕೊರತೆಯಿಂದ ವರ್ಷದಿಂದ ವರ್ಷಕ್ಕೆ ವಿದ್ಯಾರ್ಥಿಗಳ ದಾಖಲಾತಿ ಕುಸಿಯುತ್ತಿದೆ. ಮುಖ್ಯವಾಗಿ ಬಸ್‌ಗಳ ನಿಲುಗಡೆ ಕೊರತೆ, ಇತರೆ ವಿಭಾಗಗಳು ಪ್ರಾರಂಭವಾಗದಿರುವುದು ಹಾಗೂ ಎಂಬಿಎ, ಎಂಬಿಇ, ಎಂಎ ವಿಭಾಗಗಳನ್ನು ಮುಚ್ಚಿರುವುದು ಹಾಗೂ ಎನ್‌ಇಪಿ ನಿಯಮ ಅಳವಡಿಕೆಯಿಂದ ದಾಖಲಾತಿ ಇಳಿಮುಖವಾಗಿದೆ.

ಜಿಲ್ಲೆಯಲ್ಲಿ ಭೌಗೋಳಿಕವಾಗಿ ಹೆಚ್ಚು ವಿಸ್ತೀರ್ಣ ಹೊಂದಿರುವ ಕಡೂರು ತಾಲೂಕಿಗೆ ಶೈಕ್ಷಣಿಕವಾಗಿ ಬೆಳವಣಿಗೆ ಹೊಂದಲು ಸಾಕಷ್ಟು ಅವಕಾಶಗಳಿವೆ. ಜಿಲ್ಲೆಗೊಂದು ವಿಶ್ವವಿದ್ಯಾಲಯ ಎಂಬ ನಿಯಮದಡಿ ಕಡೂರಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸ್ನಾತಕೋತ್ತರ ಕೇಂದ್ರದಲ್ಲಿಯೇ ಪ್ರತ್ಯೇಕ ವಿಶ್ವವಿದ್ಯಾಲಯ ಸ್ಥಾಪನೆಗೊಂಡರೆ ಉನ್ನತ ವ್ಯಾಸಂಗ ಬಯಸುವ ವಿದ್ಯಾರ್ಥಿಗಳಿಗೂ ಸೇರಿದಂತೆ ವಿದ್ಯಾವಂತರಿಗೂ ಉದ್ಯೋಗದ ಅವಕಾಶ ಲಭಿಸಲಿದೆ. ಈಗಾಗಲೇ ಜಿಲ್ಲೆಯಲ್ಲಿ ಮೆಡಿಕಲ್ ಕಾಲೇಜು ಆರಂಭಗೊಂಡಿರುವುದು ಮಲೆನಾಡಿಗೆ ಆದ್ಯತೆ ನೀಡಲಾಗಿದೆ. ಅದರಂತೆ ಬಯಲು ಭಾಗದಲ್ಲಿ ವಿಶಾಲವಾದ ಜಾಗ ಲಭ್ಯವಿರುವುದರಿಂದ ಸುತ್ತಮುತ್ತಲಿನ ಜಿಲ್ಲೆಗಳ ಸಂಪರ್ಕ ಕೊಂಡಿಯಾಗಿರುವ ಸ್ನಾತಕೋತ್ತರ ಕೇಂದ್ರದಲ್ಲಿಯೇ ಪ್ರತ್ಯೇಕ ವಿಶ್ವವಿದ್ಯಾಲಯ ಮಂಜೂರಾತಿ ನೀಡಿದರೆ ಶೈಕ್ಷಣಿಕವಾಗಿ ತಾಲೂಕು ಅಭಿವೃದ್ಧಿಯಾಗಲು ಸಾಧ್ಯವಾಗಲಿದೆ.

ಇಲ್ಲಿನ ಸ್ನಾತಕೋತ್ತರ ಕೇಂದ್ರ ಬೆಂಗಳೂರು-ಹೊನ್ನಾವರದ ರಾಷ್ಟ್ರೀಯ ಹೆದ್ದಾರಿಗೆ ಅಣತಿಯಲ್ಲಿರುವುದರಿಂದ ವೇಗದ ಅಭಿವೃದ್ಧಿಗೆ ಸಾರಿಗೆ ಸಂಪರ್ಕಕ್ಕೆ ಹೆಚ್ಚಿನ ಒತ್ತುನೀಡಬೇಕು, ಸುಮಾರು 60 ಎಕರೆ ವಿಸ್ತೀರ್ಣ ಹೊಂದಿರುವ ಕೇಂದ್ರದಲ್ಲಿ ನೂತನ ಪ್ರತ್ಯೇಕ ವಿಶ್ವವಿದ್ಯಾಲಯ ಪರಿವರ್ತಿಸಲು ಜಾಗದ ಸಮಸ್ಯೆ ಉದ್ಭವಿಸುವುದಿಲ್ಲ. ಜಿಲ್ಲೆಗೊಂದು ವಿಶ್ವವಿದ್ಯಾಲಯ ಎಂಬ ನಿಯಮದಡಿ ಮೂಂಜೂರು ಮಾಡಬಹುದು ನೂತನ ವಿಶ್ವವಿದ್ಯಾಲಯ ಮಂಜೂರಾದರೆ, ಸರ್ಕಾರದ ವಿವಿಧ ಇಲಾಖೆಯಡಿ ವಿದ್ಯಾರ್ಥಿಗಳಿಗೆ ವಸತಿ ನಿಲಯಗಳನ್ನು ಸ್ಥಾಪಿಸಬಹುದು. ಹೊಸ ವಿಭಾಗಗಳು ಪ್ರಾರಂಭವಾದರೆ ವಿದ್ಯಾರ್ಥಿಗಳ ಸಂಖ್ಯೆಯೂ ಹೆಚ್ಚಾಗಲಿದೆ. ಈ ಭಾಗದ ವಿದ್ಯಾರ್ಥಿಗಳಿಗೂ ಅನುಕೂಲವಾಗಲದೆ ಎನ್ನುವುದು ಶಿಕ್ಷಣ ತಜ್ಞರ ಅಭಿಪ್ರಾಯ.