ಪ್ರತ್ಯೇಕ ರೈತ ಸಂಘಟನೆ ಘೋಷಣೆಗೆ ನಿರ್ಧಾರ

ಚಿಕ್ಕಮಗಳೂರು: ಕರ್ನಾಟಕ ರಾಜ್ಯ ರೈತ ಸಂಘದ ರಾಜ್ಯಾಧ್ಯಕ್ಷ ಬಡಗಲಪುರ ನಾಗೇಂದ್ರ ಅವರು ರೈತ ಸಂಘದಲ್ಲಿ ಸಕ್ರೀಯರಾಗಿದ್ದ ಮೂವರನ್ನು ಉಚ್ಛಾಟಿಸಿದ್ದು,ನಾವೂ ಕೂಡ ಇಂದಿನಿಂದಲೇ ಅವರ ಬಣದಲ್ಲಿ ಕಡ್ಡಾಯಗೊಳಿಸಿರುವ ಚಿನ್ಹೆ ಇರುವ ಶಾಲನ್ನು ತಿರಸ್ಕರಿಸಿ ರೈತ ಪರ ಚಳವಳಿಯಿರುವ ಪ್ರತ್ಯೇಕಬಣದಲ್ಲಿ ಗುರುತಿಸಿಕೊಳ್ಳಲಿದ್ದೇವೆ ಎಂದು ರೈತಸಂಘದಿಂದ ಉಚ್ಛಾಟಿತರಾಗಿರುವ ವೈ.ಸಿ.ಸುನೀಲ್‌ಕುಮಾರ್ ತಿಳಿಸಿದರು.

ಇಂದಿನಿಂದಲೇ ಅವರ ಚಿನ್ಹೆ ಇರುವ ಶಾಲನ್ನು ತಿರಸ್ಕರಿಸಿ ಸಾದಾ ಶಾಲನ್ನು ಧರಿಸುತ್ತೇವೆ. ನಮಗೆ ಆಗಿರುವ ಅನ್ಯಾಯದ ಬಗ್ಗೆ ಸರ್ವ ಸದಸ್ಯರಲ್ಲಿ ಚರ್ಚಿಸಲಾಗಿದೆ. ಎಲ್ಲರ ಅಭಿಪ್ರಾಯ ಸಂಗ್ರಹಿಸಲಾಗಿದೆ. ರಾಜ್ಯದಲ್ಲಿ ರೈತ ಪರ ಚಳವಳಿ ಮಾಡುವ ಅನೇಕ ಬಣಗಳಿದ್ದಾವೆ. ರಾಜ್ಯಾಧ್ಯಕ್ಷರಿದ್ದಾರೆ. ಅಂತಹ ಬಣಕ್ಕೆ ಬೆಂಬಲಿಸುತ್ತೇವೆ. ನೀತಿ ಇಲ್ಲದ ನಾಗೇಂದ್ರ ಬಣದಿಂದ ಹೊರಬರುತ್ತಿದ್ದೇವೆ. ಪ್ರತ್ಯೇಕ ಸಂಘಟಿತರಾಗಿ ರೈತರ ಹಿತ ಕಾಪಾಡುತ್ತೇವೆ. ಈ ಬಗ್ಗೆ ಸಧ್ಯದಲ್ಲೇ ರೈತ ಮುಖಂಡ ಕೆ.ಕೆ.ಕೃಷ್ಣೇಗೌಡ ನೇತೃತ್ವದಲ್ಲಿ ಜಿಲ್ಲಾಸಮಿತಿ ಮತ್ತು ತಾಲೂಕು ಸಮಿತಿ ಪಟ್ಟಿ ಬಿಡುಗಡೆ ಮಾಡಲಾಗುವುದು ಎಂದು ಹೇಳಿದರು.
ಸುದ್ದಿಗೋಷ್ಠಿಯಲ್ಲಿ ಮುಖಂಡರಾದ ಕೆ.ಕೆ.ಕೃಷ್ಣೇಗೌಡ, ಪರ್ವತೇಗೌಡ, ಡಿ.ರಾಮೇಗೌಡ ಮತ್ತಿತರರು ಉಪಸ್ಥಿತರಿದ್ದರು.