ನೃತ್ಯಕಲೆ ಕೇವಲ ಮನೋರಂಜನೆಗೆ ಸೀಮಿತವಾಗಿಲ್ಲ

ಶೃಂಗೇರಿ: ನಾಟ್ಯ ಕಲೆಯನ್ನು ಮುಚ್ಚಿಡಬಾರದು. ಕಲೆಯನ್ನು ಪ್ರತಿಭೆ ಮೂಲಕ ಆನಾವರಣಗೊಳಿಸಿದಾಗ ಗುರಿ ಮುಟ್ಟಲು ಸಾಧ್ಯ. ಪೌರಣಿಕ ಇತಿಹಾಸ ಹೊಂದಿರುವ ನೃತ್ಯಕಲೆ ಸಂಸ್ಕೃತಿಯ ಪ್ರಮುಖ ಭಾಗವಾಗಿದ್ದು, ಸಮಾಜಕ್ಕೆ ತನ್ನದೇ ಆದ ಕೊಡುಗೆ ನೀಡಿರುವ ನೃತ್ಯ ಮನರಂಜನೆಗೆ ಸೀಮಿತವಾಗಿಲ್ಲ ಎಂದು ಮೂಡುಬಿದಿರೆ ಎಕ್ಸ್‌ಲೆಂಟ್ ಪಿಯು ಕಾಲೇಜಿನ ಮುಖ್ಯಸ್ಥ ಯುವರಾಜ್ ಜೈನ್ ಹೇಳಿದರು.

ಶೃಂಗೇರಿಯ ಜೆಸಿಬಿಎಂ ಕಾಲೇಜಿನ ಸಭಾಂಗಣದಲ್ಲಿ ನಾಟ್ಯ ಲಲಿತಾ ಕಲಾ ಟ್ರಸ್ಟ್ ಮತ್ತು ನಾಟ್ಯ ವೈಭವ ನೃತ್ಯ ಅಕಾಡೆಮಿಯ 2026ನೇ ಸಾಲಿನ ವಾರ್ಷಿಕೋತ್ಸವದ ಅಂಗವಾಗಿ ಅಭಿನಯ ಲಹರಿ ನೃತ್ಯೋತ್ಸಮ್ ಮತ್ತು ಶಾಸೀಯ ನೃತ್ಯ ವಿಭಾಗದ ವರ್ಣಮ್‌ನ ರಾಜ್ಯಮಟ್ಟದ ನೃತ್ಯ ಸ್ಪರ್ಧೆ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ನಮ್ಮೊಳಗಿನ ಕಲೆಯ ಪ್ರಜ್ಞೆ ತೋರಿಸಲು ಸಂಸ್ಕೃತಿ ಪೂರಕವಾಗಿದೆ. ಮನಸ್ಸನ್ನು ನಿಯಂತ್ರಿಸುವ, ಆತ್ಮವಿಶ್ವಾಸ ವೃದ್ಧಿಸುವ, ವೈಶಾಲ್ಯ ಮನೋಭಾವ ಪರಿಮೂಡಿಸುವ ಮತ್ತು ಸಾಂಸ್ಕೃತಿಕ ನೆಲೆಗಟ್ಟಿನ ಅಸ್ತಿತ್ವ ಉಳಿಸುವ ನೃತ್ಯದ ವಿವಿಧ ಪ್ರಕಾರಗಳು ಸಮಾಜಕ್ಕೆ ನೀಡಿದ ಕೊಡುಗೆ ಅನನ್ಯ. ಮಾನವನು ಸಮಾಜಕ್ಕೆ ವಿಮುಖವಾಗಿ ನಡೆದರೆ ಧಾರ್ಮಿಕ ಮೌಲ್ಯಗಳು ಕಡಿಮೆಯಾಗುತ್ತದೆ. ಸಾಹಿತ್ಯ ಮತ್ತು ಸಂಸ್ಕೃತಿಯಿಂದ ಧಾರ್ಮಿಕ ದೃಷ್ಟಿ ಉಳಿಯಲು ಸಾಧ್ಯ. ಕಲಾವಿದನ ಅಭಿವ್ಯಕ್ತಿಯನ್ನು ತೋರಿಸುವುದು ನೃತ್ಯ. ಆದರಿಂದ ವಿದ್ಯಾರ್ಥಿಗಳು ಸಾಧನೆ ಮಾಡಬೇಕು. ಬಡವನಾಗಿ ಹುಟ್ಟುವುದು ತಪ್ಪಲ್ಲ, ಬಡವನಾಗಿ ಸಾಯುವುದು ತಪ್ಪು ಎಂದರು.

ಆದಿಚುಂಚನಗಿರಿಯ ಬಿಜಿಎಸ್ ಪಿಯು ಕಾಲೇಜಿನ ಪ್ರಾಚಾರ್ಯ ಕೆ.ಸಿ ನಾಗೇಶ್ ಮಾತನಾಡಿ, ಮೊಬೈಲ್ ಬಳಕೆ ಮಕ್ಕಳ ಸಾಧನೆಯ ಚಟುವಟಿಕೆಗೆಗೆ ಅಡ್ಡಿಯಾಗಿದೆ. ಜನಸಾಮಾನ್ಯರು ಪ್ರಸ್ತುತ ಚಲನಚಿತ್ರಕ್ಕೆ ಮತ್ತು ಧಾರವಾಹಿಗೆ ಮಹತ್ವ ನೀಡುತ್ತಿದ್ದಾರೆ. ನೃತ್ಯ ಕೇವಲ ಕಲೆಗೆ ಸೀಮಿತವಾಗಿಲ್ಲ. ಮನುಷ್ಯನ ಭವಿಷ್ಯ ಮತ್ತು ಆರೋಗ್ಯ ವೃದ್ಧಿಸುತ್ತದೆ. ಬದಲಾವಣೆಯ ಪ್ರಯತ್ನ ಜನಸಾಮಾನ್ಯರಿಂದ ಪ್ರಾರಂಭವಾಗಬೇಕು ಆಗ ಮಾತ್ರ ನಾಟ್ಯ ಕಲೆಯಂತಹ ಕಲಾ ಪ್ರಕಾರಗಳ ನೆಲೆಗಟ್ಟು ಭದ್ರವಾಗುತ್ತದೆ ಎಂದರು.

ಕ್ಷೇತ್ರ ರೈತ ಸಂಘದ ಗೌರವ ಅಧ್ಯಕ್ಷ ಶೆಟ್ಟಿಗದ್ದೆ ರಾಮಸ್ವಾಮಿ ಮಾತನಾಡಿ, ಕಲಾವಿದರು ಮತ್ತು ಕ್ರೀಡಾಪಟುಗಳಿಂದ ಮಾತ್ರ ಸುಭದ್ರ ಭಾರತ ಕಟ್ಟಲು ಸಾಧ್ಯ. ಕಲಾವಿದರು, ಕ್ರೀಡಾಪಟು ಘಾತುಕ ವಿಷಯಗಳಿಂದ ದೂರವಿದ್ದು ಸಾಧನೆ ಮಾಡಿರುತ್ತಾರೆ. ಸಾಹಿತ್ಯ, ಸಾಂಸ್ಕೃತಿಕ ಕಲೆಗಳು ಮನುಕುಲದ ಮನೋವಿಕಾಸಕ್ಕೆ ಇರುವ ಅಪರೂಪದ ಹಾದಿ. ನಮ್ಮೊಳಗಿನ ಅಂತರಂಗದ ಸಾಮರ್ಥ್ಯಕ್ಕೆ ಕಲಾಪ್ರಕಾರಗಳು ನೀಡಿದ ಕೊಡುಗೆ ಅಮೂಲ್ಯ ಎಂದರು.

ಸ್ಪರ್ಶ ಅವರಿಗೆ ವಿದುಷಿ ಕಮಲ ಭಟ್ ಪ್ರಶಸ್ತಿ ನೀಡಲಾಯಿತು. ಜೆಸಿಬಿಎಂ ಕಾಲೇಜಿನ ಪ್ರಾಚಾರ್ಯ ಎಂ.ಸ್ವಾಮಿ, ಆರತಿ ಕೃಷ್ಣ ಫೌಂಡೇಷನ್‌ನ ನಿರ್ದೇಶಕ ಬೇಗಾನೆ ಕೌಶಿಕ್, ಅಕಾಡೆಮಿ ಮುಖ್ಯಸ್ಥೆ ಸುನೀತಾ ನವೀನ್‌ಗೌಡ, ಕಲಾವಿದರಾದ ಯಶವಂತ್, ಅಮಿತ್, ಅಕಾಡೆಮಿ ಪದಾಧಿಕಾರಿಗಳಾದ ನವೀನ್ ಗೌಡ, ಚಂದ್ರಶೇಖರ್ ಮೆಣಸೆ, ಮೋಹನ್ ಬೋಳೂರು, ವಿ.ಎಸ್.ಆಶೋಕ್, ಆಶೀಶ್ ದೇವಾಡಿಗ, ಉಮಾ ಚಂದ್ರಶೇಖರ್ ಇದ್ದರು.