ಅತಿಯಾದ ಉಳುಮೆಯಿಂದ ಬೇರುಗಳಿಗೆ ಹಾನಿ

ಕಡೂರು: ಪದೇಪದೆ ಉಳುಮೆ ಮಾಡುವುದರಿಂದ ಭೂಮಿ ಫಲವತ್ತತೆ ಕಳೆದುಕೊಳ್ಳುವುದರ ಜತೆಗೆ ತೋಟಗಳಲ್ಲಿ ರೋಗಗಳು ಉಲ್ಬಣಿಸುತ್ತವೆ ಎಂದು ತೋಟಗಾರಿಕಾ ಇಲಾಖೆ ಜಿಲ್ಲಾ ಜಂಟಿ ನಿರ್ದೇಶಕಿ ಡಾ. ಮಂಗಳಾ ತಿಳಿಸಿದರು.

ಕೆ.ಬಸವನಹಳ್ಳಿ ರೈತ ಬಿ.ಎಂ.ಲಿಂಗದೇವರು ಅವರ ತೋಟದಲ್ಲಿ ತೋಟಗಾರಿಕೆ ಇಲಾಖೆಯಿಂದ ಹಮ್ಮಿಕೊಂಡಿದ್ದ ತೆಂಗಿನ ಕಪ್ಪುತಲೆ ಹುಳು ಬಾಧೆ ನಿಯಂತ್ರಣ ಮತ್ತು ಕ್ಷೇತ್ರ ಮಟ್ಟದ ರೈತ ತರಬೇತಿ ಕಾರ್ಯಕ್ರಮದಲ್ಲಿ ಮಾತನಾಡಿ, ಅತಿಯಾಗಿ ಉಳುಮೆ ಮಾಡುವುದರಿಂದ ಬೇರುಗಳು ತುಂಡಾಗಿ ಮರಗಳು ಸಾರವನ್ನು ಹೀರಿಕೊಳ್ಳುವ ಶಕ್ತಿ ಕಳೆದುಕೊಳ್ಳುತ್ತವೆ. ಇದರಿಂದ ತೋಟಗಳಲ್ಲಿ ಇಳುವರಿ ಕಡಿಮೆಯಾಗುತ್ತದೆ ಎಂದರು.

ರಾಸಾಯನಿಕ ಗೊಬ್ಬರಗಳ ಬಳಕೆ ಕಡಿಮೆ ಮಾಡಿ ಸಾವಯವ ಕೃಷಿಗೆ ಹೆಚ್ಚಿನ ಒತ್ತು ನೀಡಬೇಕು. ಹಸಿರೆಲೆ ಗೊಬ್ಬರ ತಯಾರಿಸಿ  ತೋಟದ ಫಲವತ್ತತೆ ಕಾಪಾಡಿಕೊಳ್ಳಬೇಕು. ಹಂದಿ, ನವಿಲು ಮತ್ತಿತರ ಕಾಡುಪ್ರಾಣಿಗಳು ಬೆಳೆಗಳನ್ನು ನಾಶ ಮಾಡುತ್ತಿರುವುದರಿಂದ ರೈತರು ನಷ್ಟ ಅನುಭವಿಸುತ್ತಿರುವ ಬಗ್ಗೆ ಇಲಾಖೆಯ ಹಿರಿಯ ಅಧಿಕಾರಿಗಳ ಮೂಲಕ ಸರ್ಕಾರದ ಗಮನಕ್ಕೆ ತರಲು ಪ್ರಯತ್ನಿಸಲಾಗುವುದು ಎಂದರು.

ತೋಟಗಾರಿಕೆ ಇಲಾಖೆ ಹಿರಿಯ ಸಹಾಯಕ ನಿರ್ದೇಶಕ ಎಚ್.ಕೆ.ಜಯದೇವ್ ಮಾತನಾಡಿ, ತೆಂಗು ಮತ್ತು ಅಡಿಕೆ ಬೆಳೆಗಳ ಮಧ್ಯೆ ಅಂತರ ಬೆಳೆಗಳನ್ನು ಬೆಳೆಯಲು ಅವಕಾಶವಿದೆ. ಆದರೆ ಅಂತರ ಬೆಳೆಗಳ ಆಯ್ಕೆ ವೈಜ್ಞಾನಿಕವಾಗಿರಬೇಕು. ಕಡೂರು ತಾಲೂಕು ಹಲವಾರು ಬೆಳೆಗಳನ್ನು ಬೆಳೆಯಲು ಉತ್ತಮ ವಾತಾವರಣ ಹೊಂದಿದೆ. ಆದರೆ ನೀರಿನ ಕೊರತೆಯಿರುವುದರಿಂದ ರೈತರು ಕಡಿಮೆ ನೀರು ಬಳಸಿ ಬೆಳಗಳನ್ನು ಬೆಳೆಯಬೇಕು. ಕಾಲುವೆಗಳ ಮೂಲಕ ನೀರು ಹಾಯಿಸಬಾರದು. ಕಪ್ಪುತಲೆ ಹುಳುಗಳನ್ನು ಜೈವಿಕವಾಗಿ ನಿಯಂತ್ರಿಸಲು ಸಾಧ್ಯವಿರುವುದರಿಂದ ರಾಸಾಯನಿಕ ಬಳಸಬಾರದು. ಜೇನು ಕೃಷಿಯತ್ತ ಕೂಡ ರೈತರು ಹೆಚ್ಚಿನ ಆಸಕ್ತಿ ಹೊಂದಬೇಕು ಎಂದು ತಿಳಿಸಿದರು.

ಅಣ್ಣೀಗೆರೆ ಉದಯಕುಮಾರ್ ಮಾತನಾಡಿ, ತೋಟಗಳಲ್ಲಿ ಹೂಗಳು ಕಾಯಿಗಟ್ಟುತ್ತಿಲ್ಲ. ಇದಕ್ಕೆ ಸರಿಯಾಗಿ ಪರಾಗಸ್ಪರ್ಶ ನಡೆಯದಿರುವುದು ಕಾರಣವಿರಬಹುದು. ಈ ಹಿನ್ನೆಲೆಯಲ್ಲಿ ತೋಟಗಾರಿಕೆ ಇಲಾಖೆಯಿಂದ ರೈತರಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ಜೇನು ಪೆಟ್ಟಿಗೆಗಳನ್ನು ವಿತರಿಸಿಬೇಕು. ಕಡೂರು ತಾಲೂಕು ಭೌಗೋಳಿಕವಾಗಿ ದೊಡ್ಡದಾಗಿರುವುದರಿಂದ ಬೇರೆ ತಾಲೂಕಿಗಿಂತ ಹೆಚ್ಚಿನ ಸೌಲಭ್ಯಗಳು ಕಡೂರು ತಾಲೂಕಿಗೆ ದೊರೆಯಬೇಕು ಎಂದರು.