ಶೃಂಗೇರಿಯಲ್ಲಿ ಪಟಾಕಿ ಸಿಡಿಸಿ ಕಾಂಗ್ರೆಸ್ ಕಾರ್ಯಕರ್ತರ ಸಂಭ್ರಮಾಚರಣೆ

ಶೃಂಗೇರಿ: ಟಿ.ಡಿ.ರಾಜೇಗೌಡರು ಶೃಂಗೇರಿ ಕ್ಷೇತ್ರದ ಶಾಸಕರಾಗಿ ಮುಂದುವರಿಯಲು ಸುಪ್ರೀಂ ಕೋರ್ಟ್ ಆದೇಶ ನೀಡಿದ ಹಿನ್ನೆಲೆಯಲ್ಲಿ ಬೇಗಾನೆ ರಾಮಯ್ಯ ವೃತ್ತದಲ್ಲಿ ಕಾಂಗ್ರೆಸ್ ಕಾರ್ಯಕರ್ತರು ಪಟಾಕಿ ಸಿಡಿಸಿ ಸಂಭ್ರಮಿಸಿದರು.

ಕಾಂಗ್ರೆಸ್ ಮುಖಂಡ ಎಂ.ಎಚ್.ನಟರಾಜ್ ಮಾತನಾಡಿ, 2023ರ ಮತಎಣಿಕೆ ಸಂದರ್ಭದಲ್ಲಿ ಬಿಜೆಪಿ, ಕಾಂಗ್ರೆಸ್, ಜೆಡಿಎಸ್ ಮತ್ತು ಪಕ್ಷೇತರ ಒಟ್ಟು 12 ಅಭ್ಯರ್ಥಿಗಳ ಏಜೆಂಟರ್‌ಗಳ ಸಮ್ಮುಖದಲ್ಲಿ 569 ಅಂಚೆ ಮತಗಳು ಸಿಂಧು ಎಂದು ಚುನಾವಣಾಧಿಕಾರಿ ಎಣಿಕೆ ಮಾಡಿ ಟಿ.ಡಿ.ರಾಜೇಗೌಡರು 201ಮತಗಳಿಂದ ಜಯಗಳಿಸಿದ್ದಾರೆ ಎಂದು ಘೋಷಿಸಿದ್ದರು. ಎಣಿಕೆ ಮಾಡುವಾಗ ವೀಡಿಯೋ ಚಿತ್ರೀಕರಣ ಸಹ ಮಾಡಲಾಗಿತ್ತು. ಆಗ ಸಿಂಧು ಆಗಿದ್ದ ಮತ, ಈಗ ಅಸಿಂಧು ಆಗಿರುವುದು ಹೇಗೆ.

ಪ್ರಸ್ತುತ ಟಿ.ಡಿ.ರಾಜೇಗೌಡರನ್ನು ಶಾಸಕರಾಗಿ ಮುಂದುವರಿಯಲು ಸುಪ್ರೀಂ ಕೋರ್ಟ್ ಆದೇಶ ನೀಡಿರುವುದು ಸತ್ಯಕ್ಕೆ, ಸಂವಿಧಾನಕ್ಕೆ ಮತ್ತು ಜನಸಾಮಾನ್ಯರಿಗೆ ಸಿಕ್ಕ ಜಯವಾಗಿದೆ. ಮರು ಮತಎಣಿಕೆಗೆ ಸ್ಟ್ರಾಂಗ್ ರೂಂ ತೆರೆದಾಗ ಹಲವು ಮತಪೆಟ್ಟಿಗೆಗಳಿದ್ದ ಒಂಭತ್ತು ಟ್ರಂಕ್‌ಗಳಲ್ಲಿ ಕೆಲವು ಟ್ರಂಕ್‌ಗಳಿಗೆ ಬೀಗ ಇರಲಿಲ್ಲ, ಸೀಲ್ ಹಾಕಿರಲಿಲ್ಲ. 279 ತಿರಸ್ಕೃತ ಮತಗಳಲ್ಲಿ 12 ಮತಗಳು ಎಲ್ಲಿ ಕಾಣೆಯಾಗಿದೆ ಎಂದು ಚುನಾವಣಾ ಆಯೋಗ ಉತ್ತರಿಸಬೇಕು. ಒಟ್ಟು ಚಲಾವಣೆಯಾದ 1811 ಅಂಚೆ ಮತಗಳಲ್ಲಿ 279 ಮತಗಳು ತಿರಸ್ಕೃವಾಗಿತ್ತು. ಸಿಂಧುವಾಗಿದ್ದ ಅಂಚೆ ಮತಗಳು 3 ವರ್ಷದ ನಂತರ ಮರು ಎಣಿಕೆ ಸಂದರ್ಭದಲ್ಲಿ ಟಿ.ಡಿ ರಾಜೇಗೌಡರ 255 ಮತಗಳು ಮಾತ್ರ ಅಸಿಂಧುವಾಗಿದ್ದ ಬಗ್ಗೆ ಕೂಡಲೇ ತನಿಖೆ ನಡೆಸಿ ತಪ್ಪಿತಸ್ಥರಿಗೆ ಶಿಕ್ಷೆಯಾಗಬೇಕು ಎಂದು ಒತ್ತಾಯಿಸಿದರು.

ಕಾಂಗ್ರೆಸ್ ಮುಖಂಡರಾದ ಭಾಸ್ಕರ್ ನಾಯ್ಕ, ರಾಜೇಶ್, ತಿಮ್ಮಪ್ಪ ಸಂಪೆಕೊಳಲು, ರಾಘವೇಂದ್ರ, ಅವಿನಾಶ್, ಶಶಾಂಕ್ ಮತ್ತು ಕಾರ್ಯಕರ್ತರು ಇದ್ದರು.