ರಕ್ಷಣೆ ಕೊಟ್ಟರೆ ಮಾತ್ರ ಶಾಲೆಗೆ ಮಕ್ಕಳು ಹಾಜರು

ಎನ್.ಆರ್.ಪುರ: ಬೈರಾಪುರ, ಚೌಡಿಕಟ್ಟೆ ಗ್ರಾಮದ ಕಾಡು ದಾರಿಯಲ್ಲಿ ಚಿರತೆ ಕಂಡು ಬಂದಿದೆ. ಮಕ್ಕಳಿಗೆ ರಕ್ಷಣೆ ನೀಡಿದರೆ ಮಾತ್ರ ಶಾಲೆಗೆ ಕಳುಹಿಸುತ್ತೇವೆ ಎಂದು ಗ್ರಾಮಸ್ಥರು ಬಿಇಒ ಶಬಾನಾ ಅಂಜುಮ್ ಅವರಿಗೆ ತಿಳಿಸಿದರು. 

ಚಿರತೆ ಕಂಡುಬಂದ ಹಿನ್ನೆಲೆಯಲ್ಲಿ ಪಾಲಕರು ಶಾಲೆಯಿಂದ ಮಕ್ಕಳನ್ನು ಕರೆದುಕೊಂಡು ಹೋದ ಹಿನ್ನೆಲೆಯಲ್ಲಿ ಬಿಇಒ ಶಬಾನಾ ಅಂಜುಮ್ ಶುಕ್ರವಾರ ಬೆಳಗ್ಗೆ ಗ್ರಾಮಕ್ಕೆ ಭೇಟಿ ನೀಡಿದಾಗ ಮಾತುಕತೆ ನಡೆಸಿದರು.

ಕಾಡು ಪ್ರಾಣಿಗಳು ಬಾರದಂತೆ ಅರಣ್ಯ ಇಲಾಖೆಯಿಂದ ಟ್ರಂಚ್ ನಿರ್ಮಿಸಿದ್ದಾರೆ. ಈ ಭಾಗದಲ್ಲಿ ಕಚ್ಚಾ ರಸ್ತೆಯನ್ನಾದರೂ ಮಾಡಿಕೊಟ್ಟು, ಟ್ರಂಚ್ ಸಮೀಪ ಬೇಲಿ ಹಾಕಿಕೊಟ್ಟರೆ ಮಕ್ಕಳು ಓಡಾಡಬಹುದು. ಆನೆಗಳ ಹಾವಳಿ ಹೆಚ್ಚಾಗಿತ್ತು. ಆ ಸಂದರ್ಭದಲ್ಲಿ ಅರಣ್ಯ ಇಲಾಖೆ ವಾಚರ್, ಗಾರ್ಡ್ ಮಕ್ಕಳು ಶಾಲೆ ತಲುಪುವವರೆಗೂ ಜತೆಗೆ ಹೋಗಿ ಬರುತ್ತಿದ್ದರು. ಈ ವ್ಯವಸ್ಥೆಯನ್ನಾದರೂ ಮಾಡಿಕೊಡಿ. ಮರಾಠಿ ಕ್ಯಾಂಪಿನ 18 ಮಕ್ಕಳು ಬೈರಾಪುರ ಅಂಗನವಾಡಿ ಕೇಂದ್ರಕ್ಕೆ ಬರುತ್ತಾರೆ. ಚೌಡಿಕಟ್ಟೆಯಲ್ಲಿಯೇ ಅಂಗನವಾಡಿ ತೆರೆದರೆ ಪಾಲಕರು ನೆಮ್ಮದಿಯ ನಿಟ್ಟುಸಿರುಬಿಡುತ್ತಾರೆ. ಕಂದಾಯ ಇಲಾಖೆ, ಅರಣ್ಯ ಇಲಾಖೆಯ ಸಹಕಾರ ಅತ್ಯಗತ್ಯವಾಗಿದೆ ಎಂದರು. 

ಬಿಇಒ ಶಬಾನಾ ಅಂಜುಮ್ ಮಾತನಾಡಿ, ನನ್ನ ಅಧಿಕಾರ ವ್ಯಾಪ್ತಿಯಲ್ಲಿ ಕ್ರಮ ಕೈಗೊಳ್ಳುತ್ತೇನೆ. ಶಾಲೆಗೆ ಯಾವುದೇ ಮಕ್ಕಳು ಬಂದಿಲ್ಲ. ಮಕ್ಕಳ ಒಂದು ದಿನದ ಶಿಕ್ಷಣ ವ್ಯರ್ಥವಾಗಿದೆ. ಮೊದಲು ಮಕ್ಕಳ ರಕ್ಷಣೆ ಮುಖ್ಯವಾಗಿದೆ. ಡಿಎಫ್‌ಒ ಹಾಗೂ ವನ್ಯಜೀವಿ ವಿಭಾಗಕ್ಕೆ ಮನವಿಪತ್ರ ಸಲ್ಲಿಸಿದ್ದೇನೆ. ಶಾಸಕರಿಗೂ ಮನವಿ ಸಲ್ಲಿಸಲಾಗುವುದು ಎಂದು ಭರವಸೆ ನೀಡಿದರು.