ಚಾಮುಂಡೇಶ್ವರಿ, ಬಬ್ಬುಸ್ವಾಮಿ ದೈವಗಳ ನೇಮೋತ್ಸವ

 ಬಾಳೆಹೊನ್ನೂರು: ಸೀಗೋಡಿನಲ್ಲಿ ಚಾಮುಂಡೇಶ್ವರಿ, ಬಬ್ಬುಸ್ವಾಮಿ ಹಾಗೂ ಪರಿವಾರ ದೈವಗಳ ನೇಮೋತ್ಸವ ಶನಿವಾರ ಹಾಗೂ ಭಾನುವಾರ ವಿಜೃಂಭಣೆಯಿಂದ ನಡೆಯಿತು.

ಶನಿವಾರ ಕ್ಷೇತ್ರ ಶುದ್ಧಿ, ಕಂಬಿಗಾರ ದೇವರ ದರ್ಶನ, ಗಜಕಂಬ ಮುಹೂರ್ತ, ಕೊಡಿ ಚಪ್ಪರ ಆರೋಹಣ, ಭಂಡಾರ ಇಳಿಸುವುದು, ಬಬ್ಬುಸ್ವಾಮಿ, ಆದಿಶಕ್ತಿ ತನಿಮಾನಿಗ ದೈವಗಳ ನೇಮೋತ್ಸವ ನಡೆಯಿತು. 

ಭಾನುವಾರ ಚಾಮುಂಡೇಶ್ವರಿ ದೇವಿ, ರಾಹು ಜೋಡು ಗುಳಿಗ ದೈವಗಳ ನೇಮೋತ್ಸವ, ಧೂಮಾವತಿ (ಜುಮಾದಿ) ಹಾಗೂ ಬಂಟ ದೈವಗಳ ನೇಮೋತ್ಸವ, ಶ್ರೀಸ್ವಾಮಿ ಕೊರಗಜ್ಜ ದೈವಗಳ ನೇಮೋತ್ಸವ, ಹೇಳಿಕೆ ಕೇಳಿಕೆ ನಡೆಯಿತು. 

ದಕ್ಷಿಣ ಕನ್ನಡ ತಂಡದ ದರ್ಶನ ಪಾತ್ರಧಾರಿಗಳಿಂದ ಕಾಲಾವಧಿ ನೇಮೋತ್ಸವ ಹಾಗೂ ಧಾರ್ಮಿಕ ಕಾರ್ಯಕ್ರಮಗಳು ನಡೆದವು. ನೇಮೋತ್ಸವದಲ್ಲಿ ದೇವಸ್ಥಾನ ಸಮಿತಿಯ ಗುರಿಕಾರ ಪದ್ಮಯ್ಯ, ಅರ್ಚಕರಾದ ಸದಾಶಿವ, ಆನಂದ, ಅಧ್ಯಕ್ಷ ಶಿವಪ್ಪ, ಉಪಾಧ್ಯಕ್ಷ ಗಣೇಶ್, ಪ್ರಧಾನ ಕಾರ್ಯದರ್ಶಿ ಸಂಜಯ್, ಸಹ ಕಾರ್ಯದರ್ಶಿ ನಿತೇಶ್, ಕೋಶಾಧಿಕಾರಿ ಹರೀಶ್, ಸಹ ಕೋಶಾಧಿಕಾರಿ ಸಂತೋಷ್ ಮತ್ತಿತರರು ಭಾಗವಹಿಸಿದ್ದರು. 

ಧಾರ್ಮಿಕ ಕಾರ್ಯಕ್ರಮದಲ್ಲಿ ಸೀಗೋಡು, ಸಿಆರ್‌ಎಸ್, ಹೂವಿನಹಕ್ಲು, ಘಂಟೆನಾಯ್ಕ, ಅರಳಿಕೊಪ್ಪ, ಹಿರೇಗದ್ದೆ, ಹೇರೂರು, ಬಾಳೆಹೊನ್ನೂರಿನ ಸುತ್ತಮುತ್ತಲ ಭಕ್ತರು ಪಾಲ್ಗೊಂಡು ದೈವಗಳ ಸಿರಿಮುಡಿ ಗಂಧ ಪ್ರಸಾದ ಸ್ವೀಕರಿಸಿದರು.