ದೇಶದಲ್ಲಿ ಜೀವಂತವಾಗಿದೆ ಜಾತಿ ಪದ್ಧತಿ

ಚಿಕ್ಕಮಗಳೂರು: ದೇಶದಲ್ಲಿ ಅಸಮಾನತೆ, ಅಸ್ಪೃಶ್ಯತೆ, ಜಾತಿಪದ್ಧತಿ ಜೀವಂತವಾಗಿ ಉಳಿದಿದೆ. ಸಾಮಾಜಿಕ ನ್ಯಾಯ, ಸಮಾನತೆ, ಸವಲತ್ತು ಹಾಗೂ ರಾಜಕೀಯ ಬೆಳವಣಿಗೆಗಾಗಿ ಸಮುದಾಯಕ್ಕೆ ಹೋರಾಟವೊಂದೇ ಮೂಲ ಅಸ್ತ್ರ ಎಂದು ಡಿಎಸ್‌ಎಸ್ ರಾಜ್ಯ ಸಂಚಾಲಕ ಟಿ.ಎನ್.ವೆಂಕಟೇಶ್ ಹೇಳಿದರು.

ನಗರದ ಸ್ಕೌಟ್ಸ್ ಭವನದಲ್ಲಿ ಬುಧವಾರ ದಲಿತ ಸಂಘರ್ಷ ಸಮಿತಿ ಜಿಲ್ಲಾ ಘಟಕದಿಂದ ಆಯೋಜಿಸಿದ್ದ ಸಮ ಸಮಾಜದ ಕಡೆ ನಮ್ಮ ನಡೆ ಎಂಬ ಜಿಲ್ಲಾ ಮಟ್ಟದ ವಿಚಾರ ಸಂಕಿರಣ ಮತ್ತು ನೂತನ ಪದಾಧಿಕಾರಿಗಳ ಪದಗ್ರಹಣ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಅಂಬೇಡ್ಕರ್ ತತ್ವ ಹಾಗೂ ಸಂವಿಧಾನ ಸಿದ್ಧಾಂತದಡಿ ರಾಜ್ಯದಲ್ಲಿ ಪ್ರೊ.ಬಿ.ಕೃಷ್ಣಪ್ಪ ಅವರು ಪರಿಶಿಷ್ಟರು, ಶೋಷಿತರು ಹಾಗೂ ದೌರ್ಜನ್ಯಕ್ಕೆ ಒಳಗಾದವರ ಬೆನ್ನೆಲುಬಾಗಿ ಹೋರಾಟವನ್ನು ರಾಜ್ಯಾದ್ಯಂತ ರೂಪಿಸಿದ ಪರಿಣಾಮ ಮಲಹೋರುವ ಹಾಗೂ ಮಹಿಳೆಯರ ಬೆತ್ತಲೆಸೇವೆ ಪದ್ಧತಿಗಳನ್ನು ಅಳಿಸಿ ಹಾಕುವಲ್ಲಿ ಯಶಸ್ವಿಯಾದರು ಎಂದು ಹೇಳಿದರು.

ಸಮಾಜದಲ್ಲಿ ಪುರೋಹಿತಶಾಹಿ ವ್ಯವಸ್ಥೆ ದಲಿತರನ್ನು ಹಾಳು ಮಾಡಿದ್ದವು. ಮಹಿಳೆಯರು ಸ್ವಾಭಿಮಾನದಿಂದ ಜೀವಿಸಲು, ಸ್ವಾತಂತ್ರವಾಗಿ ಬಾಳುಕಟ್ಟಿಕೊಳ್ಳಲು ಸಂವಿಧಾನದ ಗ್ರಂಥ ಮೂಲ ಆಸರೆಯಾಯಿತು. ಇಂದು ಮಂತ್ರಿ ಸ್ಥಾನಕ್ಕೆ ಪಟ್ಟುಹಿಡಿಯುವ ಶಾಸಕರಿದ್ದಾರೆ. ಆದರೆ ಅಂಬೇಡ್ಕರ್ ಮಹಿಳೆಯರ ಸಬಲೀಕರಣಕ್ಕಾಗಿ ದೇಶದ ಮಂತ್ರಿ ಸ್ಥಾನದಿಂದಲೇ ಹೊರಬಂದಿದ್ದರು ಎಂದು ಸ್ಮರಿಸಿದರು.

ದೇಶದಲ್ಲಿ ಕೆಲವು ರಾಜ್ಯ ಹಾಗೂ ಜಿಲ್ಲೆಗಳಲ್ಲಿ ಪರಿಶಿಷ್ಟರು ದೇವಾಲಯ ಪ್ರವೇಶ ನಿಷೇಧ ಪದ್ಧತಿ ಇಂದಿಗೂ ತಾಂಡವವಾಡುತ್ತಿದೆ. ಭಕ್ತಿಯಿಂದ ಪ್ರವೇಶಿದರೂ ದಂಡಿಸುವ ಪ್ರವೃತ್ತಿ ತೊಲಗಿಲ್ಲ. ಹೀಗಾಗಿ ಸರ್ಕಾರಗಳು ದೌರ್ಜನ್ಯ ನಿಯಂತ್ರಣ ಸಮಿತಿ ಕಾಯ್ದೆಗಳನ್ನು ಜಾರಿಗೊಳಿಸಿವೆ. ನಾಡಿನಲ್ಲಿ ಸಾರಾಯಿ ಬೇಡ, ವಸತಿ ಶಾಲೆ ಬೇಕೆಂಬ ಹೋರಾಟದಿಂದ ಅನೇಕ ಜಿಲ್ಲೆಗಳಲ್ಲಿ ವಸತಿ ಶಾಲೆ ಆರಂಭಗೊಂಡಿವೆ ಎಂದರು.

ದಲಿತರಿಗೆ ಶೇ. ೫೦ರಷ್ಟು ಭೂಮಿ ನೀಡಲು ಸರ್ಕಾರದ ಆದೇಶವಿದ್ದು, ಜಿಲ್ಲಾಧಿಕಾರಿಗಳು ಒಪ್ಪಿ ನೀಡಲು ಹೋರಾಟ ಮಾಡಬೇಕಾಯಿತು. ದೇಶದ ಕಟ್ಟಕಡೆಯ ವ್ಯಕ್ತಿಗೂ ಶೈಕ್ಷಣಿಕ, ಸಾಮಾಜಿಕ, ರಾಜಕೀಯ ಹಾಗೂ ಆರ್ಥಿಕ ಸಂಪನ್ಮೂಲ ಪಾಲುಗಾರಿಕೆ ಅತ್ಯವಶ್ಯಕ. ಆ ದಿಸೆಯಲ್ಲಿ ದಲಿತ ಬಂಧುಗಳು ಸ್ಥಳೀಯ ಮಟ್ಟದಲ್ಲಿ ಅನ್ಯಾಯಕ್ಕೆ ಒಳಗಾದರೆ ಧೈರ್ಯವಾಗಿ ಪ್ರಶ್ನಿಸುವ ಗುಣ ಬೆಳೆಸಿಕೊಳ್ಳಬೇಕು ಎಂದು ಕರೆ ನೀಡಿದರು.

ಡಿಎಸ್‌ಎಸ್ ರಾಜ್ಯ ಸಂಘಟನಾ ಸಂಚಾಲಕ ರಾಜಶೇಖರ್ ಚಾಪನೂರು ಮಾತನಾಡಿ, ರಾಜ್ಯದಲ್ಲಿ ಕಾಂಗ್ರೆಸ್ ಸರ್ಕಾರ ಪರಿಶಿಷ್ಟರಿಗೆ ಮೀಸರಿಸಿದ ಹಣವನ್ನು ಲೂಟಿ ಮಾಡುತ್ತಿದೆ. ನಾಡಿನ ಹಲವಾರು ದಲಿತ ಕಾಲನಿಗಳಲ್ಲಿ ರಸ್ತೆ, ಕುಡಿಯುವ ನೀರಿನ ವ್ಯವಸ್ಥೆಯಿಲ್ಲ. ರಾಜ್ಯವನ್ನಾಳುವ ಮೂರು ರಾಷ್ಟ್ರೀಯ ಪಕ್ಷಗಳು ಮುಖವಾಡ ಧರಿಸಿ ಒಂದಿಲ್ಲೊಂದು ರೀತಿ ಪರಿಶಿಷ್ಟರಿಗೆ ಸಮಸ್ಯೆವೊಡುತ್ತಿವೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಡಿಎಸ್‌ಎಸ್ ರಾಜ್ಯ ಸಂಘಟನಾ ಸಂಚಾಲಕ ಬಸವನಗುಡಿ ನಂಜಪ್ಪ ಪ್ರಾಸ್ತಾವಿಕವಾಗಿ ಮಾತನಾಡಿ, ಹೋರಾಟದ ಹೆಜ್ಜೆಗಳನ್ನು ಮೃದುಗೊಳಿಸದೇ ಸದೃಢವಾಗಿಡಬೇಕು. ಎಲ್ಲ ಪರಿಶಿಷ್ಟರು, ಅಲ್ಪಸಂಖ್ಯಾತರು ಮತ್ತು ಹಿಂದುಳಿದವರು ಹೋರಾಟ ಮನೋಭಾವ ಬೆಳೆಸಿಕೊಂಡು ಸಂಘಟನೆ ಜೊತೆ ಕೈಜೋಡಿಕೊಂಡಲ್ಲಿ ಜನ ಪ್ರತಿನಿಧಿಗಳು, ಅಧಿಕಾರಿಗಳು ಸ್ಥಳಕ್ಕಾಗಮಿಸಿ ಸಮಸ್ಯೆ ಆಲಿಸುತ್ತಾರೆ ಎಂದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಡಿಎಸ್‌ಎಸ್ ಜಿಲ್ಲಾ ಸಂಚಾಲಕ ಭೀಮಯ್ಯ, ದೇಶ ಹಾಗೂ ರಾಜ್ಯವನ್ನು ಆಳುವ ಪಕ್ಷಗಳ ಹತ್ತಿರ ಸವಲತ್ತನ್ನು ಪಡೆಯಲು ಹೋರಾಟವೇ ಮೂಲಧಾರ. ಈ ಹೋರಾಟದ ಹಾದಿಯಲ್ಲಿ ಪ್ರೊ.ಕೃಷ್ಣಪ್ಪ ಅವರು ಯಶಸ್ವಿಯಾಗದಿದ್ದಲ್ಲಿ ನಾಡಿನ ಪರಿಶಿಷ್ಟರು, ಹಿಂದುಳಿದ ಜನರ ಬದುಕು ಮೂರಾಬಟ್ಟೆಯಾಗುತ್ತಿತ್ತು ಎಂದು ತಿಳಿಸಿದರು.

ಇದೇ ವೇಳೆ ಡಿಎಸ್‌ಎಸ್ ನೂತನ ಪದಾಧಿಕಾರಿಗಳಿಗೆ ಗುರುತಿನ ಚೀಟಿ ವಿತರಿಸಲಾಯಿತು. ಡಿಎಸ್‌ಎಸ್ ರಾಜ್ಯ ಮಹಿಳಾ ಸಂಘಟನಾ ಸಂಚಾಲಕರಾದ ವಿಜಯಲಕ್ಷ್ಮೀ, ಶೀಲಾ ರಾಜು, ಮೈ ಸೂರು ವಿಭಾಗೀಯ ಸಂಚಾಲಕ ಜಗದೀಶ್, ದೌರ್ಜನ್ಯ ನಿಯಂತ್ರಣ ಸಮಿತಿ ಸದಸ್ಯ ರಮೇಶ್, ಮುಖಂಡರಾದ ರೇಣುಕಾ, ನಸೀರಾಬಾನು, ಜಗದೀಶ್, ಬಸವರಾಜ್, ಶಿವಕುಮಾರ್, ಸವಿತಾ, ಮಾಗಡಿ ಮಂಜುನಾಥ್, ಮೀನಾಕ್ಷಿ, ಶಿವರಾಜ್, ಗಣೇಶ್, ರಂಗಯ್ಯ ಮತ್ತಿತರರಿದ್ದರು.