ಬುಟ್ಟಿ ತಯಾರಿಸಿ ಬದುಕು ಕಟ್ಟಿಕೊಂಡ ಹಂತೂರಿನ ಮಹಿಳೆ

ಮೂಡಿಗೆರೆ: ಕೂಲಿ ಕೆಲಸ ಮಾಡುತ್ತಿದ್ದ ಮಹಿಳೆಯೊಬ್ಬರು ಸರ್ಕಾರ ಜಾರಿಗೊಳಿಸಿದ ಸಂಜೀವಿನಿ ಒಕ್ಕೂಟದ ನೆರವಿನಲ್ಲಿ ಸ್ವಾವಲಂಬಿ ಬದುಕು ಕಟ್ಟಿಕೊಂಡಿದ್ದಾರೆ. ಹಂತೂರು ಗ್ರಾಮದ ಸಂಧ್ಯಾ ಇಂತಹ ಸಾಧಕಿ. ಇವರು ತಯಾರಿಸಿದ ಬುಟ್ಟಿ, ಕಾಫಿ ಪುಡಿ ಮತ್ತಿತರ ವಸ್ತುಗಳು ರಾಜ್ಯದ ವಿವಿಧ ಭಾಗಗಳಲ್ಲಿ ಪ್ರಸಿದ್ಧಿ ಪಡೆದಿವೆ.

ಸಂಧ್ಯಾ ಹಂತೂರು ಗ್ರಾಮದ ಪ್ರೀತಿ ಸ್ತ್ರೀಶಕ್ತಿ ಸಂಘದ ಸದಸ್ಯೆ. ರಾಜ್ಯದ ವಿವಿಧ ಭಾಗಗಳಲ್ಲಿ ನಡೆಯುವ ಕಾರ್ಯಕ್ರಮ, ಸಮಾವೇಶ ಮುಂತಾದ ಕಡೆ ಮಳಿಗೆ ತೆರೆದು ಬುಟ್ಟಿ, ಕಾಫಿ ಪುಡಿ ಮುಂತಾದ ವಸ್ತುಗಳನ್ನು ಮಾರಾಟ ಮಾಡುತ್ತಾರೆ. ಇತ್ತೀಚೆಗೆ ಮಂಗಳೂರಿನಲ್ಲಿ ನಡೆದ ಸರಸ್ ಮೇಳದಲ್ಲಿ ಉತ್ಪನ್ನಗಳನ್ನು ಮಾರಾಟ ಮಾಡುವ ಮೂಲಕ ಹೆಚ್ಚಿನ ಆದಾಯ ಗಳಿಸಿದ್ದಾರೆ.

ದೇವಾಲಯಕ್ಕೆ ನಾನು ಹಣ್ಣುಕಾಯಿ ತೆಗೆದುಕೊಂಡು ಹೋಗಿದ್ದಾಗ ಬುಟ್ಟಿಯನ್ನು ಗಮನಿಸಿದ ಕೆಲವರು ನಮಗೂ ಬುಟ್ಟಿ ತಯಾರಿಸಿ ಕೊಡುವಂತೆ ಕೇಳಿಕೊಂಡರು. ಅಂದಿನಿಂದ ಬುಟ್ಟಿ ತಯಾರಿಕೆಯಲ್ಲಿ ತೊಡಗಿಕೊಂಡಿದ್ದೇನೆ. ವಿವಿಧ ಕಡೆ ನಡೆಯುವ ಕಾರ್ಯಕ್ರಮಗಳಲ್ಲಿ ಮಳಿಗೆ ಹಾಕಿ ಬುಟ್ಟಿ ಮಾರಾಟ ಮಾಡುತ್ತಿದ್ದೇನೆ. ಭಾರಿ ಬೇಡಿಕೆ ಇದೆ. ಬುಟ್ಟಿ ಮಾತ್ರ ಮಾರಾಟಕ್ಕೆ ತೆಗೆದುಕೊಂಡು ಹೋಗುವುದರ ಬದಲು, ಕಾಫಿ ಮತ್ತಿತರ ಸ್ಥಳೀಯ ಉತ್ಪನ್ನಗಳನ್ನು ತೆಗೆದುಕೊಂಡು ಹೋಗುತ್ತಿದ್ದೇನೆ. ಇದರಿಂದ ಇನ್ನಷ್ಟು ವ್ಯಾಪಾರ ನಡೆಸಲು ಅನುಕೂಲವಾಗಿದೆ. ಈ ಕಾರ್ಯಕ್ಕೆ ಪ್ರೀತಿ ಸ್ತ್ರೀಶಕ್ತಿ ಸಂಘ, ತಾಲೂಕು ಪಂಚಾಯಿತಿ ಮತ್ತು ಸಂಜೀವಿನಿ ಒಕ್ಕೂಟದ ಪದಾಧಿಕಾರಿ ಶಾಲಿನಿ ಇವರೆಲ್ಲರ ಬೆಂಬಲ ನೆರವಾಗಿದೆ ಎಂದು ಸಂಧ್ಯಾ ಹೇಳಿದ್ದಾರೆ.