ಅಕ್ರಮ ಸಂಬಂಧ ಶಂಕಿಸಿ ವ್ಯಕ್ತಿಯ ಕೈ ತುಂಡು

ಬಾಳೆಹೊನ್ನೂರು: ಮಹಿಳೆಯೊಂದಿಗೆ ವ್ಯಕ್ತಿಯೊಬ್ಬ ಅಕ್ರಮ ಸಂಬಂಧ ಹೊಂದಿದ್ದಾನೆ ಎಂಬ ಶಂಕಿಸಿ ಬಾಳೆಹೊನ್ನೂರಲ್ಲಿ ವ್ಯಕ್ತಿಯೊಬ್ಬ ಕತ್ತಿಯಿಂದ ಹಲ್ಲೆ ಮಾಡಿ ಕೈಯನ್ನು ತುಂಡರಿಸಿದ್ದಾನೆ. ಕೊಪ್ಪ ತಾಲೂಕು ಅಡಿಗೆಬೈಲು ಗ್ರಾಮದ ಪೇಟೆಗದ್ದೆಯ ಅರುಣ್ (35) ಹಲ್ಲೆಗೊಳಗಾದ ವ್ಯಕ್ತಿ. ಚಿಕ್ಕಮಗಳೂರು ತಾಲೂಕಿನ ಹುಯಿಗೆರೆ ಗ್ರಾಮದ ಬ್ಯಾದ್ರಿ ಕಾಲನಿಯ ಶೇಷಗಿರಿ (40) ಹಲ್ಲೆ ನಡೆಸಿದ ಆರೋಪಿ.

ಆರೋಪಿ ಶೇಷಗಿರಿಯ ಅತ್ತೆ ಮಗಳನ್ನು ಪೇಟೆಗದ್ದೆಯ ವ್ಯಕ್ತಿಯೊಬ್ಬರಿಗೆ ಕಳೆದ ಕೆಲವು ವರ್ಷಗಳ ಹಿಂದೆ ಮದುವೆ ಮಾಡಿಕೊಟ್ಟಿದ್ದು, ಪತಿ, ಪತ್ನಿಯರಲ್ಲಿ ಸಾಂಸಾರಿಕ ಜೀವನ ಸರಿ ಬಾರದ ಹಿನ್ನೆಲೆಯಲ್ಲಿ ಇಬ್ಬರೂ ವಿಚ್ಛೇದನ ಪಡೆದುಕೊಂಡಿದ್ದರು. ನಂತರ ಆಕೆ ಪಟ್ಟಣದಲ್ಲಿ ಬಾಡಿಗೆ ಮನೆ ಮಾಡಿಕೊಂಡು ವಾಸವಾಗಿದ್ದು, ಆಕೆ ಮನೆಗೆ ಪೇಟೆಗದ್ದೆ ಅರುಣ್ ಬಂದು ಹೋಗುತ್ತಿದ್ದ. ಇವರಿಬ್ಬರಿಗೂ ಅಕ್ರಮ ಸಂಬಂಧವಿತ್ತು ಎನ್ನಲಾಗಿದೆ.

ಅತ್ತೆಯ ಮಗಳ ಮನೆಗೆ ಬೇರೊಬ್ಬ ವ್ಯಕ್ತಿ ಬಂದು ಹೋಗುವುದನ್ನು ಸಹಿಸದ ಶೇಷಗಿರಿ ಕಳೆದ ಹಲವು ದಿನಗಳಿಂದ ಅರುಣ್ ಜತೆಗೆ ಜಗಳ ನಡೆದಿದೆ. ಮಂಗಳವಾರ ರಾತ್ರಿ ಅರುಣ್ ಈಕೆ ಮನೆಗೆ ಬಂದು ವಾಪಾಸ್ ಹೋಗುತ್ತಿದ್ದ ವೇಳೆಯಲ್ಲಿ ಪಟ್ಟಣದ ಮಾರಿಗುಡಿ ರಸ್ತೆ ಬಳಿ ಅಡ್ಡಗಟ್ಟಿ ಕತ್ತಿಯಿಂದ ಹಲ್ಲೆ ನಡೆಸಿದ್ದಾನೆ. ಕತ್ತಿ ಬಲವಾಗಿ ಬೀಸಿದಾಗ ಅದರಿಂದ ತಪ್ಪಿಸಿಕೊಳ್ಳಲು ಕೈ ಅಡ್ಡ ಹಿಡಿದಾಗ ಅರುಣ್‌ನ ಕೈಯ ಹಸ್ತ ಸಂಪೂರ್ಣ ತುಂಡಾಗಿ ಬಿದ್ದಿದೆ.

ತೀವ್ರ ಹಲ್ಲೆಗೊಳಗಾದ ಗಾಯಾಳು ಅರುಣ್‌ಗೆ ಪಟ್ಟಣದ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಪ್ರಥಮ ಚಿಕಿತ್ಸೆ ನೀಡಿ ಹೆಚ್ಚಿನ ಚಿಕಿತ್ಸೆಗಾಗಿ ಮಂಗಳೂರು ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಆರೋಪಿ ಶೇಷಗಿರಿಯನ್ನು ಪೊಲೀಸರು ಬಂಧಿಸಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ. ಆರೋಪಿ ಶೇಷಗಿರಿ ವಿರುದ್ಧ ಈ ಹಿಂದೆಯೂ ಹಲವು ದೂರುಗಳು ಬಾಳೆಹೊನ್ನೂರು ಠಾಣೆಯಲ್ಲಿ ದಾಖಲಾಗಿದ್ದು, ರಾಜೀ ಪಂಚಾಯಿತಿ ಮೂಲಕ ಸಮಸ್ಯೆಗಳನ್ನು ಬಗೆಹರಿಸಿಕೊಂಡಿದ್ದ ಎನ್ನಲಾಗಿದೆ.