ಮಲೆನಾಡಿನ ಜಾನಪದಕ್ಕೂ ಮತ್ತು ಮುಂಗಾರು ಮಳೆಯ ಉಬ್ಬೆ ಮೀನು ಶಿಖಾರಿಗೂ ಅವಿನಾಭಾವ ಸಂಬಂಧವಿದೆ. ಮೊದಲ ಮಳೆಗೆ ಹಳ್ಳಗಳು ತುಂಬಿದಾಗ ಇಡೀ ಊರೇ ಒಟ್ಟಾಗಿ ಸಾಂಪ್ರದಾಯಿಕ ಬಿದಿರಿನ ಜಾಲರಿ ಹಿಡಿದು ಹೊರಡುವುದು ನಮ್ಮ ಮಣ್ಣಿನ ಸೌಹಾರ್ದತೆಯ ಸಂಕೇತ. ಇದರ ಸುತ್ತ ನೂರಾರು ಜಾನಪದ ಹಾಡುಗಳು, ಒಗಟುಗಳು ಬೆಳೆದು ಬಂದಿವೆ. ಇದು ಬರೀ ಹವ್ಯಾಸವಲ್ಲ, ಪ್ರಕೃತಿಯ ಆಚರಣೆ ಎನ್ನುತ್ತಾರೆ ಕರ್ನಾಟಕ ಜಾನಪದ ಪರಿಷತ್ ಅಧ್ಯಕ್ಷ ರಜಿತ್ ಕೆಳಗೂರು. ಈ ಬಾರಿ ಮಳೆ ಕೊರತೆಯಿಂದ ಗದ್ದೆ, ತೊರೆಗಳಲ್ಲಿ ನೀರಿಲ್ಲದೆ ಮೀನುಗಳು ಸಾಯುತ್ತಿರುವುದು ನಮ್ಮ ಜೀವರಾಶಿಗೆ ಹಾಗೂ ಸಾಂಸ್ಕೃತಿಕ ಸೊಗಡಿಗೆ ಬಿದ್ದ ದೊಡ್ಡ ಪೆಟ್ಟು. ನಮ್ಮ ಹಿರಿಯರು ಮೀನುಗಳ ವಂಶಾಭಿವೃದ್ಧಿಗೆ ಧಕ್ಕೆಯಾಗದಂತೆ ಸಾಂಪ್ರದಾಯಿಕ ಬೇಟೆ ಆಡುತ್ತಿದ್ದರು. ಈಗ ಮಳೆ ಇಲ್ಲದೆ, ಅಪರೂಪದ ಮೀನಿನ ತಳಿಗಳು ನಾಶವಾಗುತ್ತಿರುವುದು ಆತಂಕದ ಸಂಗತಿ. ಹೀಗೆ ಮುಂದುವರಿದರೆ ಉಬ್ಬೆ ಶಿಖಾರಿ ಮುಂದಿನ ಪೀಳಿಗೆಗೆ ಕೇವಲ ಕಥೆಯಾಗಿ ಉಳಿಯಲಿದೆ.
