ಗೌರಿಬಿದನೂರು: ಮಳೆ ಕೊರತೆಯಿಂದ ಮೇವಿನ ಬೆಳೆ ಕಡಿಮೆಯಾಗಿದ್ದು, ಜಾನುವಾರುಗಳಿಗೆ ಮೇವಿನ ಕೊರತೆ ಉಂಟಾಗುವ ಸಾಧ್ಯತೆಯಿದೆ ಎಂದು ತಹಸೀಲ್ದಾರ್ ಕೆ.ಎಂ.ಅರವಿಂದ್ ತಿಳಿಸಿದರು.
ತಾಲೂಕು ಕಚೇರಿಯಲ್ಲಿ ಪಶುಸಂಗೋಪನಾ ಇಲಾಖೆಯಿಂದ ಹಮ್ಮಿಕೊಂಡಿರುವ ಮೇವಿನ ಬೀಜದ ಮಿನಿ ಕಿಟ್ ವಿತರಣಾ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿ, ರೈತರು ಜಮೀನಿನಲ್ಲಿ ಮೇವು ಬೆಳೆದು, ಜಾನುವಾರುಗಳಿಗೆ ಪೌಷ್ಟಿಕ ಮೇವು ಒದಗಿಸಬೇಕು. ಅವುಗಳ ರಕ್ಷಣೆಯೇ ರೈತರ ಆರ್ಥಿಕ ಸಬಲೀಕರಣ.
ಬೀಜದ ಕಿಟ್ನಲ್ಲಿ ಜೋಳ, ಮೆಕ್ಕೆಜೋಳ, ಹೆಸರು,ಅಲಸಂದೆ ಸೇರಿ ವಿವಿಧ ತಳಿಯ ಅಧಿಕ ಇಳುವರಿ ನೀಡುವ ಮೇವಿನ ಬೀಜಗಳಿವೆ. ಪ್ರತಿ ರೈತನಿಗೆ 2ರಿಂದ 3 ಕೆಜಿ ಬೀಜದ ಕಿಟ್ ನೀಡಲಾಗುತ್ತಿದೆ ಎಂದರು.
ತಾಲೂಕು ಪಶುಸಂಗೋಪನಾ ಇಲಾಖೆ ಸಹಾಯಕ ನಿರ್ದೇಶಕ ಡಾ.ಮಾರುತಿ ಮಾತನಾಡಿ, ತಾಲೂಕಿನ ಎಲ್ಲ ಹೋಬಳಿಗಳ ರೈತ ಸಂಪರ್ಕ ಕೇಂದ್ರ, ಪಶು ಆಸ್ಪತ್ರೆಗಳಲ್ಲಿ ಕಿಟ್ಗಳು ಲಭ್ಯವಿದ್ದು, ಆಸಕ್ತ ರೈತರು ಆಧಾರ್ ಕಾರ್ಡ್, ಪಹಣಿ ತಂದು ಪಡೆದುಕೊಳ್ಳಬಹುದು ಎಂದರು.
ನಿರೀಕ್ಷಕ ಖಾದರ್, ಜೈಪ್ರಕಾಶ್, ಅಮರ್ ನಾರಾಯಣ್, ಕೃಷಿ ಇಲಾಖೆ ಅಧಿಕಾರಿಗಳು, ಪಶು ವೈದ್ಯಾಧಿಕಾರಿಗಳು ಇದ್ದರು.
