ಕಾಮಗಾರಿ ಆಮೆಗತಿ ಪ್ರಯಾಣಿಕರಿಗೆ ಜೀತಿ

ಒಂದು ವರ್ಷ ಕಳೆದರೂ ಪೂರ್ಣಗೊಳ್ಳದ ಬಾಗೇಪಲ್ಲಿ-ಚೇಳೂರು ಮಾರ್ಗದ ರಾಜ್ಯ ಹೆದ್ದಾರಿ ಕಾಮಗಾರಿಯಿಂದ ನಿತ್ಯನರಕ ಅನುಭವಿಸುತ್ತಿರುವ ಚಾಲಕರ ಗೋಳು ಕೇಳುವವರೇ ಇಲ್ಲಂತಾಗಿದೆ.

ಬಾಗೇಪಲ್ಲಿ&ಚೇಳೂರು ಮಾರ್ಗದ 7.5 ಕಿಮೀ ಉದ್ದದ ರಾಜ್ಯ ಹೆದ್ದಾರಿ ಕಾಮಗಾರಿಗೆ ಲೋಕೋಪಯೋಗಿ ಇಲಾಖೆಯಿಂದ 19.70 ಕೋಟಿ ರೂ.ಅನುದಾನ ಬಿಡುಗಡೆಗೊಂಡಿದ್ದು, 2024ನೇ ಅಕ್ಟೋಬರ್​ ತಿಂಗಳಲ್ಲಿ ಶಾಸಕ ಎಸ್​.ಎನ್​.ಸುಬ್ಬಾರೆಡ್ಡಿ ರಸ್ತೆ ಕಾಮಗಾರಿಗೆ ಪೂಜೆ ನೇರವೇರಿಸಿದ್ದಾರೆ. ಅದೇ ತಿಂಗಳ 10 ರಂದು ಬೆಂಗಳೂರು ಮೂಲದ ಖಾಸಗಿ ಸಂಸ್ಥೆ ಕಾಮಗಾರಿ ಪ್ರಾರಂಭಿಸಿದೆ. ಕೆಲಸ ಪೂರ್ಣಗೊಳಿಸಲು ಗುತ್ತಿಗೆದಾರನಿಗೆ ಲೋಕೋಪಯೋಗಿ ಇಲಾಖೆ 11 ತಿಂಗಳ ಗಡವು ನೀಡಿದ್ದು, 2025ರ ಸೆಪ್ಟೆಂಬರ್​ 9ಕ್ಕೆ ಕಾಮಗಾರಿ ಪೂರ್ಣಗೊಳ್ಳಬೇಕಾಗಿತ್ತು, ಆದರೆ, ನಿಗದಿತ ಅವಧಿಯೊಳಗೆ ಪೂರ್ಣಗೊಳಿಸಿಲ್ಲ.

ಅಪಘಾತದ ಹಾಟ್​ಸ್ಪಾಟ್​

2024 ಅಕ್ಟೋಬರ್​ ತಿಂಗಳನಲ್ಲಿ ಪ್ರಾರಂಭವಾದ ಕಾಮಗಾರಿಗೆ ವರ್ಷ ಪೂರ್ತಿ ಆಗಿದ್ದು, ಕಾಮಗಾರಿ ಪ್ರಗತಿ ಹಂತದಲ್ಲಿರುವ ರಸ್ತೆಯಲ್ಲಿ ಸಂಚರಿಸುವ ವೇಳೆ ಹಲವು ಅಪಘಾತಗಳು ಸಂಭವಿಸಿದ್ದು, ವಿವಿಧ ಪ್ರತ್ಯೇಕ ಅಪಘಾತಗಳಲ್ಲಿ ನಾಲ್ವರು ಮೃತಪಟ್ಟಿದ್ದು, 25ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ಆದರೂ ಇಲಾಖೆ ಅಧಿಕಾರಿಗಳು, ಗುತ್ತಿಗೆದಾರರು ಎಚ್ಚೆತ್ತುಕೊಂಡಿಲ್ಲ ಎಂದು ಸ್ಥಳಿಯರು ಬೇಸರ ವ್ಯಕ್ತಪಡಿಸಿದ್ದಾರೆ.

ತೇಪೆ ರಸ್ತೆಯಂತೆ ಕಾಣಿಸುತ್ತಿರುವ ಹೆದ್ದಾರಿ ಕಾಮಗಾರಿ

ಸುಮಾರು 7.5 ಕಿಮೀ ರಸ್ತೆಗೆ 19.70 ಕೋಟಿ ರೂ. ಅನುದಾನ ನೀಡಲಾಗಿದ್ದು, 1 ಕಿಮೀ ರಸ್ತೆಗೆ ಸರ್ಕಾರ ಸರಾಸರಿ 2.5 ಕೋಟಿ ರೂ.ವೆಚ್ಚ ಖರ್ಚು ಮಾಡುತ್ತಿದ್ದರೂ ರಾಜ್ಯ ಹೆದ್ದಾರಿ ಕಾಮಗಾರಿ ಮಂದಗತಿಯಿಂದ ಸಾಗುತ್ತಿರುವುದರ ಜತೆಗೆ ರಸ್ತೆಗೆ ಹಾಕಿರುವ ಟಾರ್​ ವಿವಿಧ ಬಣ್ಣಗಳಿಂದ ಕೂಡಿದ್ದು, ಟಾರ್​(ಡಾಂಬರು) ವರ್ಷಪೂರ್ತಿ ಹಾಕಿರುವುದರಿಂದ 50ಕ್ಕೂ ಹೆಚ್ಚು ತೇಪೆಗಳು ಕಾಣಿಸುತ್ತಿದ್ದು, ಹಳೇ ರಸ್ತೆಗೆ ಹೊಸದಾಗಿ ತೇಪೆಗಳು ಹಾಕಿದಂತೆ ಕಾಣಿಸುತ್ತಿದೆ.