ಹೆಚ್ಚಿದ ಭ್ರಷ್ಟಾಚಾರ, ಇಲಾಖೆ ಇಲಾಖೆಯಲ್ಲೂ ಮಂಥ್ಲಿ ಹಣ ವಸೂಲಿ

ಚಿಕ್ಕಬಳ್ಳಾಪುರ: ಕಾಂಗ್ರೆಸ್‌ ಸರ್ಕಾರವು ಸ್ವಲಾಭದಾಯಕ ಯೋಜನೆಗಳ ಜಾರಿಗೆಗೆ ಸೀಮಿತವಾಗಿದೆ ಎಂದು ಸಂಸದ ಡಾ ಕೆ.ಸುಧಾಕರ್‌ ಆರೋಪಿಸಿದ್ದಾರೆ.

ಚಿಕ್ಕಬಳ್ಳಾಪುರ ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿ, ರಾಜ್ಯದಲ್ಲಿ ಆಡಳಿತ ವ್ಯವಸ್ಥೆಯು ಹದಗೆಟ್ಟಿದೆ. ನಾಯಕರು ಜನರ ಬದಲಿಗೆ ಸ್ವಲಾಭದಾಯಕ ಯೋಜನೆಗಳ ಜಾರಿಗೆಗೆ ಆದ್ಯತೆ ನೀಡುತ್ತಿದ್ದಾರೆ. ಅನುದಾನದ ಕೊರತೆ ಹಿನ್ನೆಲೆಯಲ್ಲಿ ಅಭಿವೃದ್ಧಿ ಕೆಲಸಗಳು ನಡೆಯುತ್ತಿಲ್ಲ ಎಂದು ಆರೋಪಿಸಿದ್ದಾರೆ.

ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲಿ ಪ್ರತಿಯೊಂದು ಇಲಾಖೆಗಳಲ್ಲೂ ಕಮೀಷನ್‌ ದಂಧೆ ನಡೆಯುತ್ತಿದೆ. ತಿಂಗಳಿಗೆ ಇಷ್ಟು ಹಣ ಕೊಡಬೇಕೆಂಬುದಾಗಿ ಹೇಳಿ, ಕಿರುಕುಳ ನೀಡಲಾಗುತ್ತಿದೆ. ಅಕ್ರಮ ಮರಳು ಸಾಗಾಣಿಕೆ ಮರು ಪ್ರಾರಂಭವಾಗಿದೆ. ಅಂತಾರಾಜ್ಯ ಮಟ್ಟದ ದರೋಡೆಕೋರ ಭಾಗಿಯ ಕಳ್ಳತನ ಪ್ರಕರಣಗಳು ವರದಿಯಾಗುತ್ತಿವೆ. ಆಡಳಿತ ಯಂತ್ರಾಂಗದಲ್ಲಿ ಹಿಡಿತವಿಲ್ಲ. ಲಂಚ ಕೊಡಬೇಕಾಗಿರುವ ಪರಿಸ್ಥಿತಿಯಲ್ಲಿ ಅನೇಕ ಅಧಿಕಾರಿಗಳು ಅಸಹಾಯಕತೆಯಲ್ಲಿದ್ದು ಸ್ಥಳೀಯ ಜನಪ್ರತಿನಿಧಿಗಳು ಜಿಲ್ಲೆಯಲ್ಲಿನ ಅನಪೇಕ್ಷಿತ ವಿದ್ಯಮಾನಗಳು, ಅವ್ಯವಹಾರಗಳ ಬಗ್ಗೆ ತಲೆ ಕೆಡಿಸಿಕೊಳ್ಳುತ್ತಿಲ್ಲ. ಭ್ರಷ್ಟತೆಯಿಂದ ಪ್ರಶ್ನಿಸಲು ಹೋಗುತ್ತಿಲ್ಲ ಎಂದು ಸಂಸದರು ಆರೋಪಿಸಿದ್ದಾರೆ.