ಬೀದಿ ನಾಯಿ ನಿಯಂತ್ರಣಕ್ಕೆ ಕಸರತ್ತು

ಪ್ರತ್ಯೇಕ ಸ್ಥಳದಲ್ಲಿ ಆಶ್ರಯ, ಪಾಲನೆಗೆ ದತ್ತು ನೀಡುವುದು ಸೇರಿ ವಿವಿಧ ಪರಿಹಾರ ಕ್ರಮಗಳ ಮೂಲಕ ಬೀದಿನಾಯಿಗಳ ಹಾವಳಿ ನಿಯಂತ್ರಿಸಲು ಸ್ಥಳಿಯ ಆಡಳಿತ ಸಂಸ್ಥೆಗಳು ಕಸರತ್ತು ನಡೆಸುತ್ತಿವೆ.

ವ್ಯಾಪಕವಾಗಿ ನಾಯಿ ಕಡಿತ, ರೇಬಿಸ್​ ಕಾಯಿಲೆಯಿಂದ ಜನರ ಸಾವು ಪ್ರಕರಣ ಹೆಚ್ಚಳವಾಗಿರುವ ದೂರಿನ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್​ ಪರಿಹಾರಾತ್ಮಕ ಕ್ರಮ ಸೂಚಿಸಿದೆ. ಅದರಂತೆ ಸ್ಥಳಿಯ ಆಡಳಿತ ಸಂಸ್ಥೆಗಳು ಅನುಷ್ಠಾನಕ್ಕೆ ಒತ್ತು ನೀಡಿವೆ. ಎಲ್ಲರ ಸಹಕಾರ ಪಡೆಯಲು ಕಸರತ್ತು ಪ್ರಾರಂಭಿಸಿವೆ. ಆದರೆ, ಪ್ರಾರಂಭದಲ್ಲಿ ದುಬಾರಿ ನಿರ್ವಹಣೆಯ ಲೆಕ್ಕಾಚಾರದಲ್ಲಿ ಸಮರ್ಪಕವಾಗಿ ಸ್ಪಂದನೆ ಸಿಕ್ಕಿಲ್ಲ. ಜಿಲ್ಲೆಯಲ್ಲಿ ವಾರ್ಷಿಕ ನಾಯಿ ಕಡಿತದ 10 ಸಾವಿರ ಪ್ರಕರಣ ವರದಿಯಾಗುತ್ತಿವೆ. ದಿನದಿಂದ ದಿನಕ್ಕೆ ನಾಯಿಗಳ ಪ್ರಮಾಣ ಹೆಚ್ಚಳವಾಗಿದೆ. ಒಂದು ಬಡಾವಣೆಯಲ್ಲಿ 30ರಿಂದ 40 ನಾಯಿಗಳಿದ್ದು, ಹಲವೆಡೆ ಮರಿಗಳ ಹಿಂಡು ಕಾಣಿಸಿಕೊಳ್ಳುತ್ತಿರುತ್ತದೆ.

ಸಾರ್ವಜನಿಕ ಸ್ಥಳಗಳಲ್ಲಿನ ಬೀದಿನಾಯಿಗಳಿಗೆ ಸ್ಥಳಿಯ ಆಡಳಿತ ಸಂಸ್ಥೆಗಳು ಒಂದೆಡೆ ಆಶ್ರಯ ಕಲ್ಪಿಸುವ ವ್ಯವಸ್ಥೆ ಕೈಗೊಳ್ಳುತ್ತಿವೆ. ಖಾಸಗಿ, ಸರ್ಕಾರಿ ಶಿಕ್ಷಣ ಸಂಸ್ಥೆ, ಆಸ್ಪತ್ರೆ, ಕ್ರೀಡಾಂಗಣ, ಬಸ್​ ನಿಲ್ದಾಣ, ರೈಲ್ವೆ ನಿಲ್ದಾಣ ಆವರಣಗಳಲ್ಲಿ ವಾಸವಿರುವ ಬೀದಿ ನಾಯಿ ಹಿಡಿದು, ಸ್ಥಳಿಯ ಆಡಳಿತ ಸಂಸ್ಥೆಗಳಿಂದ ನಿರ್ಮಿಸಿರುವ ಶೆಲ್ಟರ್​ಗಳಿಗೆ ಸ್ಥಳಾಂತರಿಸಲಾಗುತ್ತದೆ. ಇದಕ್ಕೆ ನಾಯಿಗಳನ್ನು ನಿಯಮಾನುಸಾರ ಸುರಕ್ಷತಾ ಕ್ರಮಗಳೊಂದಿಗೆ ಹಿಡಿಯಲು ಟೆಂಡರ್​ ಆಹ್ವಾನಿಸಿದ್ದು ಸಂಘ&ಸಂಸ್ಥೆಗಳಿಂದ ಪ್ರಸ್ತಾವನೆ ಸ್ವೀಕರಿಸಲಾಗುತ್ತದೆ.

ಪ್ರಸ್ತುತ ಪರಿಹಾರಾತ್ಮಕ ಕ್ರಮ ಆದೇಶಕ್ಕೆ ಸೀಮಿತವಾಗಿವೆ. ಇದರ ನಡುವೆ ನಾಯಿಗಳ ಹಾವಳಿಗೆ ಜನ ಹೈರಾಣರಾಗಿದ್ದಾರೆ. ವಾಸ್ತವವಾಗಿ ಸಮಸ್ಯೆಗಳು ಪರಿಹಾರ ಕಾಣುತ್ತಿಲ್ಲ ಎಂಬ ಅಳಲು ತೋಡಿಕೊಳ್ಳಲಾಗುತ್ತಿದೆ.ಒಂದು ವಾರದಲ್ಲಿ 15 ನಾಯಿ ಕಡಿತ ಪ್ರಕರಣ ವರದಿಯಾಗಿವೆ. ಸರ್ಕಾರಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆದರೆ ಮಾತ್ರ ಲೆಕ್ಕ ಸಿಗುತ್ತಿವೆ. ಖಾಸಗಿ ಆಸ್ಪತ್ರೆಗಳಲ್ಲಿನ ಪ್ರಕರಣಗಳು ದಾಖಲಾಗುತ್ತಿಲ್ಲ. ಇನ್ನು ಈಗಲೂ ಗಲ್ಲಿ ಗಲ್ಲಿಯಲ್ಲಿ ನಾಯಿಗಳ ಹಿಂಡಿನ ನಡುವೆ ಆತಂಕದಲ್ಲಿಯೇ ಓಡಾಡಬೇಕಾದ ಪರಿಸ್ಥಿತಿ ಇದೆ. ಅಪರಿಚಿತರು, ವೃದ್ಧರು, ಮಹಿಳೆಯರು ಕಂಡು ಬರುತ್ತಿದ್ದಂತೆ ಶ್ವಾನಗಳು ದಾಳಿ ಮಾಡುತ್ತಿವೆ. ಇದ್ದಕ್ಕಿದ್ದಂತೆ ವಾಹನ ಅಟ್ಟಾಡಿಸಿಕೊಂಡು ಬರುತ್ತಿವೆ.

ಸಾರ್ವಜನಿಕ ಸ್ಥಳಗಳಲ್ಲಿನ ಬೀದಿನಾಯಿಗಳ ಸರ್ವೇ ಮೂಲಕ ಪತ್ತೆ ಮಾಡಿ, ಸಂಘ&ಸಂಸ್ಥೆಗಳು, ಸಮಾಜ ಸೇವಕರು, ದಾನಿಗಳು ಸೇರಿ ಹಲವರಿಗೆ ದತ್ತು ನೀಡುವ ಯೋಜನೆ ರೂಪಿಸಲಾಗಿದೆ. ಆಯಾ ವ್ಯಾಪ್ತಿಯ ಸ್ಥಿತಿಗತಿ ಪರಿಗಣಿಸಿ ನಿರ್ವಹಣೆ ವೆಚ್ಚ ಪಡೆದುಕೊಂಡು ಒಂದೆಡೆ ನಾಯಿಗಳ ಪಾಲನೆ ಮಾಡಲಾಗುತ್ತದೆ. ಸಂಬಂಧಪಟ್ಟವರು ಬಯಸಿದ್ದಲ್ಲಿ ಮನೆಗೆ ತೆಗೆದುಕೊಂಡು ಹೋಗಬಹುದು.

ನಗರ, ಪಟ್ಟಣ ಪ್ರದೇಶ ವ್ಯಾಪ್ತಿಯ ನಾಯಿಗಳ ನಿರ್ವಹಣೆ, ಸಾರ್ವಜನಿಕರ ದೂರು, ಸಮಸ್ಯೆ, ನಿಯಮ ಉಲ್ಲಂಘನೆಯ ಅಹವಾಲು ಸ್ವೀಕರಿಸಲು ಸಹಾಯವಾಣಿ ಕೇಂದ್ರ ಪ್ರಾರಂಭಿಸಲಾಗಿದೆ. ಇಲ್ಲಿಯವರೆಗೂ ಬೀದಿನಾಯಿಗಳ ಹಾವಳಿ ಕಡೆಗಣಿಸಿದ್ದು ದಾಳಿ, ಕಡಿತದ ಪ್ರಕರಣಗಳ ಬಗ್ಗೆ ಜನರು ದೂರು ಸಲ್ಲಿಸಿದಾಗ ಅಸಹಾಯಕತೆಯ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿತ್ತು. ಆದರೆ, ಈಗ ನ್ಯಾಯಾಲಯದ ಕಟ್ಟುನಿಟ್ಟಿನ ಸೂಚನೆ ಹಿನ್ನೆಲೆ ಸ್ಥಳಿಯ ಆಡಳಿತ ಸಂಸ್ಥೆ ಪರಿಹಾರಾತ್ಮಕ ಕ್ರಮ ಕೈಗೊಳ್ಳುತ್ತಿವೆ. ಅದರಂತೆ ಸಹಾಯವಾಣಿ ಕೇಂದ್ರದ ಮೂಲಕ ಅಹವಾಲು ಆಲಿಸಿ, ಸಮಸ್ಯೆ ಬಗೆಹರಿಸಲು ಮುಂದಾಗಿವೆ.

ಸುಪ್ರೀಂ ಕೋರ್ಟ್​ ಆದೇಶದಂತೆ ಸಾರ್ವಜನಿಕ ಸ್ಥಳಗಳಲ್ಲಿನ ಬೀದಿನಾಯಿಗಳ ಸ್ಥಳಾಂತರ, ಒಂದೆಡೆ ಆಶ್ರಯ, ದತ್ತು ವ್ಯವಸ್ಥೆ, ಸಹಾಯವಾಣಿ ಕೇಂದ್ರ ಪ್ರಾರಂಭದ ಪರಿಹಾರಾತ್ಮಕ ಕ್ರಮ ಕೈಗೊಳ್ಳಲಾಗುತ್ತಿದೆ.

| ಮನ್ಸೂರು ಆಲಿ

ಪೌರಾಯುಕ್ತ, ಚಿಕ್ಕಬಳ್ಳಾಪುರ ನಗರಸಭೆ