ಕೆಟ್ಟು ನಿಲ್ಲುವ ಬಸ್​ ಪ್ರಯಾಣ ಸರ್ಕಸ್​

ಎಲ್ಲೆಂದರಲ್ಲಿ ಕೆಟ್ಟು ನಿಲ್ಲುವ ಸಾರಿಗೆ ಬಸ್​, ಸಕಾಲಕ್ಕೆ ಶಾಲಾ&ಕಾಲೇಜು, ಕಚೇರಿ ತಲುಪಲಾಗದೆ ನಿತ್ಯ ನರಕ ಅನುಭವಿಸುತ್ತಿರುವ ಪ್ರಯಾಣಿಕರು.

ಇದು, ಬಾಗೇಪಲ್ಲಿ ತಾಲೂಕಿನ ಜನರು ನಿತ್ಯವೂ ಅನುಭವಿಸುತಿರುವ ಪಡಿಪಾಟಲು. ಬಾಗೇಪಲ್ಲಿ ಸಾರಿಗೆ ಸಂಸ್ಥೆ ಡಿಪೋದಲ್ಲಿ 11 ಹೊಸ ಅಶ್ವಮೇಧ ಬಸ್​ ಸೇರಿ ಒಟ್ಟು 108 ಬಸ್​ಗಳಿದ್ದು, ನಗರ, ಗ್ರಾಮೀ ಣ ಸೇರಿ ಒಟ್ಟು 102 ಮಾರ್ಗಗಳಿಗೆ ಸಾರಿಗೆ ಸಂಸ್ಥೆಯಿಂದ ಬಸ್​ ಸೌಲಭ್ಯ ಕಲ್ಪಿಸಿದೆ. ಆದರೆ, ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ ಇಲಾಖೆ ಅಧಿಕಾರಿಗಳ ವೈಲ್ಯದಿಂದ ಬಸ್​ಗಳ ಬಿಡಿ ಭಾಗ ಸರಬರಾಜಿಲ್ಲದೆ ದುರಸ್ತಿಗೆ ಬಂದಿರುವ ಬಸ್​ಗಳನ್ನು ಓಡಿಸುತ್ತಿರುವುದರಿಂದ ಎಲ್ಲೆಂದರಲ್ಲಿ ಬಸ್​ಗಳು ಕೆಟ್ಟು ನಿಲ್ಲುತ್ತಿವೆ. ಜತೆಗೆ ಮೆಕಾನಿಕ್​ಗಳ ಕೊರತೆಯೂ ಈ ಅವಸ್ಥೆಗೆ ಕಾರಣ ಎಂಬ ದೂರುಗಳಿವೆ.

ಸಂಚರಿಸುವ ವೇಳೆ ಬಸ್​ಗಳಿಗೆ ಬ್ರೇಕ್​, ಕ್ಲಚ್​ ಸಮಸ್ಯೆ, ಇಂಜಿನ್​ನಲ್ಲಿ ತಾಂತ್ರಿಕ ದೋಷ ಇತರ ಸಮಸ್ಯೆಗಳು ಕಂಡು ಬಂದಾಗ ಬಸ್​ ಚಾಲಕ, ನಿರ್ವಾಹಕ ಡಿಪೋ ವ್ಯವಸ್ಥಾಪಕರಿಗೆ ಕರೆ ಮಾಡಿ ಸಮಸ್ಯೆ ತಿಳಿಸಿದರೆ, ಬಸ್​ ನಿಂತರೆ ಮಾತ್ರ ಕರೆ ಮಾಡಿ ಮೆಕಾನಿಕ್​ಗಳು ಖಾಲಿಯಾಗಿ ಕುಳಿತಿಲ್ಲ, ನೀವೆ ಸ್ವಲ್ಪ ಅಡ್ಜೆಸ್ಟ್​ ಮಾಡಿಕೊಂಡು ಡಿಪೋಗೆ ಬಂದು ಬಿಡಿ ಎಂಬ ಉಡಾಫೆ ಉತ್ತರ ಸಿಗುತ್ತಿದೆ ಎಂದು ಬಹುತೇಕ ಚಾಲಕರು ಅಳಲು ತೋಡಿಕೊಳ್ಳುತ್ತಿದ್ದಾರೆ.

ಬಾಗೇಪಲ್ಲಿ ಡಿಪೋನಲ್ಲಿರುವ 108 ಬಸ್​ಗಳ ಪೈಕಿ ಶೇ.20 ಬಸ್​ಗಳು ಗುಜರಿಗೆ ಸೇರುವ ಹಳೇ ಬಸ್​ಗಳಾಗಿದ್ದು, ಪ್ರಯಾಣಿಕರನ್ನು ಸಾಗಿಸಲು ಯೋಗ್ಯವಲ್ಲದಂತಾಗಿವೆ. ಬಹುತೇಕ 15 ವರ್ಷ ಪೂರ್ಣಗೊಂಡಿರುವ ಹಳೇ ಬಸ್​ಗಳನ್ನೇ ಇಂದಿಗೂ ಗ್ರಾಮೀಣದ ಹಲವು ಮಾರ್ಗಗಳಿಗೆ ಕಳುಹಿಸುವ ಅನಿವಾರ್ಯತೆ ಇದೆ. ಸಮಸ್ಯೆಗಳ ಬಗ್ಗೆ ಚಾಲಕ, ನಿರ್ವಾಹಕ ಇಲಾಖೆ ಮೇಲಧಿಕಾರಿಗಳಿಗೆ ದೂರು ಸಲ್ಲಿಸುವಂತಿಲ್ಲ, ಒಂದು ವೇಳೆ ಧೈರ್ಯ ಮಾಡಿ ದೂರು ಸಲ್ಲಿಸಿದರೆ ಕಡ್ಡಾಯ ರಜೆ ನೀಡದೆ, ಸಿಬ್ಬಂದಿ ಕೊರತೆ ನೆಪ ಹೇಳಿ ಹೆಚ್ಚುವರಿ ಡ್ಯೂಟಿ ಮಾಡುವಂತೆ ನೋಟಿಸ್​ ನೀಡಿ ಚಾಲಕರಿಗೆ ಕಿರುಕುಳ ನೀಡುತ್ತಾರೆ.

ಬಾಗೇಪಲ್ಲಿ ಡಿಪೋ ಒಂದರಲ್ಲೇ ಮೆಕಾನಿಕ್​ಗಳ ಸಮಸ್ಯೆಗಳ ಇಲ್ಲ. ಜಿಲ್ಲೆಯ ಎಲ್ಲ ತಾಲೂಕು ಘಟಕಗಳಲ್ಲಿ ಸಮಸ್ಯೆ ಇದೆ. ಸಮಸ್ಯೆ ಪರಿಹಾರಕ್ಕೆ ಇಲಾಖೆಗೆ ಪತ್ರ ಬರೆಯಲಾಗಿದೆ. ಬಸ್​ನ ಬಿಡಿಭಾಗಗಳ ಸರಬರಾಜು ಸಮರ್ಪವಾಗಿಯೇ ಇದೆ. ಪಿಟ್​ನೆಸ್​ ಇಲ್ಲದ ಹಳೇ ಬಸ್​ಗಳನ್ನು ಇಲಾಖೆ ವಾಪಸ್​ ಪಡೆದುಕೊಳ್ಳುವ ಕಾರ್ಯ ಪ್ರಾರಂಭಿಸಿದೆ. ಬಾಗೇಪಲ್ಲಿ ಡಿಪೋದ ಸಮಸ್ಯೆ ಬಗ್ಗೆ ಮಾಹಿತಿ ಪಡೆದುಕೊಳ್ಳುವಂತೆ ಡಿವಿಜನಲ್​ ಮೆಕಾನಿಕಲ್​ ಇಂಜಿನಿಯರ್​ಗೆ ಸೂಚಿಸಿ ಸಮಸ್ಯೆಗಳ ಪರಿಹಾರಕ್ಕೆ ಮುಂದಾಗುತ್ತೇವೆ.