ಚಿಕ್ಕಬಳ್ಳಾಪುರ: ಸ್ನೇಹದ ಅತಿಯಾದ ವಿಶ್ವಾಸವು ಚುನಾವಣೆಯಲ್ಲಿ ಕಾಂಗ್ರೆಸ್ ಗೆ ಕೈ ಕೊಟ್ಟರೆ, ಎದುರಾಳಿಗಳ ಅಡ್ಡಿ, ಮಾತಿನ ಜಟಾಪಟಿಯ ನಡುವೆಯೂ ಖುದ್ದು ಸದಸ್ಯರ ಬೆಂಗಾವಲಿಗೆ ನಿಂತು ಸಂಸದ ಡಾ ಕೆ.ಸುಧಾಕರ್ ನೇತೃತ್ವದಲ್ಲಿ ಬಿಜೆಪಿ ವಿಜಯದ ಸಂಭ್ರಮ ಕಂಡಿತು.
ಇಲ್ಲಿನ ನಗರಸಭಾ ಅಧ್ಯಕ್ಷ ಮತ್ತು ಉಪಾಧ್ಯಕ್ಷ ಚುನಾವಣೆಯಲ್ಲಿ ಕಾಂಗ್ರೆಸ್ ಸ್ವಪಕ್ಷೀಯ 16 ಸದಸ್ಯರು, ಶಾಸಕ, ಇಬ್ಬರು ವಿಧಾನಪರಿಷತ್ ಸದಸ್ಯರು ಸೇರಿದಂತೆ 19 ಮತಗಳನ್ನು ಹೊಂದಿತ್ತು. ಇದರ ನಡುವೆ ನಾಲ್ವರು ಸದಸ್ಯರು ಎದುರಾಳಿ ಬಣದಲ್ಲಿ ಸೇರಿಕೊಂಡರೂ ಸ್ನೇಹ, ಪ್ರಮಾಣಕ್ಕೆ ಕಟ್ಟು ಬಿದ್ದು ಮತದಾನದ ಸಂದರ್ಭದ ಕೊನೆ ಕ್ಷಣದಲ್ಲಿ ಬಿಜೆಪಿ ಕೆಲ ಸದಸ್ಯರನ್ನು ಸೆಳದುಕೊಂಡು ಅವರು ಬೆಂಬಲಿಸಲಿದ್ದಾರೆ ಎಂಬ ಅತಿಯಾದ ಆತ್ಮವಿಶ್ವಾಸದಲ್ಲಿತ್ತು. ಆದರೆ, ಅದೇ ಕೈ ಕೊಟ್ಟಿತ್ತು. ಸ್ಪಷ್ಟ ಬಹುಮತದ ನಡುವೆಯೂ ಮುಖಭಂಗ ಅನುಭವಿಸಿತು.
