ಎಂ.ಪಿ.ವೆಂಕಟೇಶ್ ಮದ್ದೂರು
ಬರೋಬರಿ ನಾಲ್ಕು ವರ್ಷದ ಬಳಿಕ ತಾಲೂಕಿನ ಆತಗೂರು ಹೋಬಳಿಯ ಚಿಕ್ಕಂಕನಹಳ್ಳಿಯ ಶ್ರೀ ನಂದಿ ಬಸವೇಶ್ವರಸ್ವಾಮಿಯ ವೈಭವ ಮರುಕಳಿಸಿದೆ. ರಾಜ್ಯದ ಹಲವು ಜಿಲ್ಲೆಗಳಿಂದ ಅಸಂಖ್ಯಾತ ಭಕ್ತರು ದಾಂಗುಡಿ ಇಡುತ್ತಿದ್ದಾರೆ. ಮತ್ತೊಂದೆಡೆ ಕ್ಷೇತ್ರದ ತುಂಬೆಲ್ಲ ರಾಸುಗಳೇ ತುಂಬಿಕೊಂಡಿವೆ.
ನಂದಿ ಬಸವೇಶ್ವರ ಜಾತ್ರೆ ನೂರಾರು ವರ್ಷದ ಇತಿಹಾಸ ಹೊಂದಿದೆ. ಗ್ರಾಮದ ಹೊರಗಿನ ಕಾನನ ನಡುವೆ ಇರುವ ದೇವಸ್ಥಾನದ ಸುತ್ತಲೂ ನಡೆಯುವ ಜಾತ್ರೆಗೆ ಹಲವು ಜಿಲ್ಲೆಗಳಿಂದ ರಾಸುಗಳು ಬರುತ್ತಿದ್ದವು. ಆದರೆ ಕೋವಿಡ್ ಹಾಗೂ ಚರ್ಮಗಂಟು ರೋಗದಿಂದ ನಾಲ್ಕು ವರ್ಷ ಜಾತ್ರೆ ನಿಂತಿತ್ತು. ಇದರಿಂದಾಗಿ ಚಿಕ್ಕಂಕನಹಳ್ಳಿ ಸೇರಿದಂತೆ ಅಕ್ಕಪಕ್ಕದ ಗ್ರಾಮಸ್ಥರಲ್ಲಿ ಆತಂಕವಿತ್ತು. ಆದರೆ ಈ ವರ್ಷ ಮತ್ತೆ ಜಾತ್ರೆ ಕಳೆಗಟ್ಟಿದೆ.
ಕಣ್ಣಾಯಿಸಿದಲೆಲ್ಲ ರಾಸುಗಳು: ಈ ಜಾತ್ರೆಯಲ್ಲಿ ರಾಸುಗಳೇ ಪ್ರಮುಖವಾಗಿವೆ. ರಾಸುಗಳನ್ನು ಖರೀದಿಸಲು ಹಾಗೂ ಮಾರಾಟ ಮಾಡಲು ರೈತರು ಆಗಮಿಸುತ್ತಾರೆ. ಕನಿಷ್ಟ ಒಂದೂವರೆ ಲಕ್ಷ ರೂನಿಂದ ಹಿಡಿದು ಮೂರು ಲಕ್ಷ ರೂ, ಅದಕ್ಕೂ ಹೆಚ್ಚಿನ ದರದ ರಾಸುಗಳ ಮಾರಾಟ ನಡೆಯುತ್ತಿದೆ. ಈ ಬಾರಿ ಐದು ಸಾವಿರಕ್ಕೂ ಹೆಚ್ಚು ರಾಸುಗಳು ಆಗಮಿಸಿವೆ. ಹಿಂದೆಲ್ಲ ಜಾತ್ರೆ ಸಮಯದಲ್ಲಿ ನಾಲೆಯಲ್ಲಿ ನೀರು ಹರಿಯುತ್ತಿತ್ತು. ಆದರೆ ಈ ಬಾರಿ ನೀರಿಲ್ಲದಿರುವುದು ಬೇಸರಕ್ಕೆ ಕಾರಣವಾಗಿದೆ. ಇನ್ನು ಪ್ರತಿ ಬಾರಿ ಉತ್ತಮ ರಾಸುಗಳಿಗೆ ಪ್ರಶಸ್ತಿ ನೀಡಲಾಗುತ್ತಿತ್ತು. ಈ ಸಲವೂ ಪ್ರಶಸ್ತಿ ನೀಡುವ ಘೋಷಣೆ ಮಾಡಿದ್ದರೂ, ಅದಕ್ಕೆ ಸಂಬಂಧಿಸಿದ ಯಾವುದೇ ಪ್ರಕ್ರಿಯೆ ನಡೆಯುತ್ತಿಲ್ಲ ಎನ್ನುವ ಅನುಮಾನ ರೈತರನ್ನು ಕಾಡುತ್ತಿದೆ.
ಜಾತ್ರೆಯಲ್ಲಿ ವ್ಯಾಪಾರ ವಹಿವಾಟು ಜೋರಾಗಿದೆ. ನಾಲ್ಕು ವರ್ಷದ ಬಳಿಕ ನಡೆಯುತ್ತಿರುವುದರಿಂದ ಪ್ರತಿನಿತ್ಯ ಸಾವಿರಾರೂ ಜನರು ಆಗಮಿಸುತ್ತಿದ್ದಾರೆ. ಇದರಿಂದಾಗಿ ಭರ್ಜರಿ ವ್ಯಾಪಾರ ನಡೆಯುತ್ತಿದೆ. ಮಕ್ಕಳ ಆಟದ ಸಾಮಗ್ರಿ, ಐಸ್ ಕ್ರೀಂ ಮಾರಾಟ, ಹೋಟೆಲ್ಗಳನ್ನು ತೆರೆಯಲಾಗಿದೆ. ಇದಲ್ಲದೆ ಕಡ್ಲೆಪುರಿ, ಪೂಜಾ ಸಾಮಗ್ರಿಗಳ ವ್ಯಾಪಾರವೂ ಜೋರಾಗಿದ್ದು, ಜಾತ್ರೆ ಮತ್ತೆ ಕಳೆಗಟ್ಟಿರುವುದಕ್ಕೆ ವ್ಯಾಪಾರಿಗಳು ಸಂತಸದಲ್ಲಿದ್ದಾರೆ.
ಜ.17ರಿಂದ ಜಾತ್ರಾ ಮಹೋತ್ಸವ ನಡೆಯುತ್ತಿದೆ. 20ರಂದು ಚಿತ್ರ ಮಂಟಪೋತ್ಸವ, 21ರಂದು ಮಹಾಉತ್ಸವ, 22ರಂದು ಹುಲಿವಾಹನೋತ್ಸವ, 23ರಂದು ಚಂದ್ರಮಂಡಲೋತ್ಸವ, 25ರಂದು ಅಶ್ವವಾಹನೋತ್ಸವ, 26ರಂದು ತೆಪ್ಪೋತ್ಸವ, 27ರಂದು ವೃಷಭೋತ್ಸವ, 28ರಂದು ವಸಂತೋತ್ಸವ ಮತ್ತು ಮಹಾಮಂಗಳಾರತಿ, ರಥಸಪ್ತಮಿ ಪೂಜೆ ಇರಲಿದೆ.
