ಚಳ್ಳಕೆರೆ: ತಾಲೂಕಿನ ಚಿಗತನಹಳ್ಳಿಯ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಯು ಮುಖ್ಯಶಿಕ್ಷಕರ ಕಾಳಜಿಯಿಂದಾಗಿ ಮಲೆನಾಡಿನ ಸೊಬಗಿನಂತೆ ಹಚ್ಚ ಹಸಿರಿನ ಗಿಡಮರಗಳ ನಡುವೆ ಸುಂದರವಾದ 'ಕನ್ನಡ ಭವನ'ವಾಗಿ ರೂಪುಗೊಂಡಿದ್ದು, ಕಣ್ಮನ ಸೆಳೆಯುತ್ತಿದೆ.
ಶಾಲೆ ಆವರಣ ಪ್ರವೇಶಿಸುತ್ತಲೇ ಗೋಡೆಗಳ ಮೇಲೆ ಬರೆದಿರುವ ಕನ್ನಡ ಕವಿಗಳ ನುಡಿಗಟ್ಟು, ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತರ ಭಾವಚಿತ್ರ ಹಾಗೂ ಕನ್ನಡದ ವರ್ಣಮಾಲೆ ಅಕ್ಷರಗಳು ಕಂಗೊಳಿಸುತ್ತಿವೆ. ಶಾಲೆ ಹಳೇ ಕೊಠಡಿಗಳಿಗೆ ಹಳದಿ ಮತ್ತು ಕೆಂಪು ಬಣ್ಣ ಲೇಪಿಸಿ ಸಂಪೂರ್ಣವಾಗಿ ಕನ್ನಡ ಭವನವಾಗಿ ಪರಿವರ್ತನೆ ಮಾಡಲಾಗಿದೆ.
ಮುಖ್ಯಶಿಕ್ಷಕ ಎಚ್. ರಂಗನಾಥ ಅವರು ಪ್ರಾಥಮಿಕ ಹಂತದಲ್ಲಿ ಮಕ್ಕಳಿಗೆ ಕನ್ನಡ ಭಾಷಾ ಜ್ಞಾನದ ಭದ್ರ ಬುನಾದಿ ಹಾಕುವ ಮಹದಾಸೆ ಮತ್ತು ಕನ್ನಡದ ಬಗೆಗಿನ ಪ್ರೀತಿಯಿಂದ ಶಾಲೆಗೆ ಈ ಹೊಸ ರೂಪ ನೀಡಿದ್ದಾರೆ. ಅವರ ಈ ಕಾಳಜಿಯಿಂದಾಗಿ ಸ್ಥಳೀಯ ಕ್ಲಸ್ಟರ್ ಮಟ್ಟದಲ್ಲೇ ಶಾಲೆ ಮಾದರಿಯಾಗಿದೆ ಎಂದು ಶಾಲಾ ಸಮಿತಿ ಮಾಜಿ ಅಧ್ಯಕ್ಷ ಪುರುಷೋತ್ತಮರೆಡ್ಡಿ ಶ್ಲಾಘಿಸಿದ್ದಾರೆ.
ಮೂಲಸೌಕರ್ಯ ಮತ್ತು ಪರಿಸರ
ಕಳೆದ 15-20 ವರ್ಷದಿಂದ ಬೆಳೆಸಿರುವ ಹುಣಸೆ, ತೆಂಗು, ಗುಲ್ಮೊಹರ್, ಬೇವು, ನುಗ್ಗೆ ಸೇರಿದಂತೆ 60ಕ್ಕೂ ಹೆಚ್ಚು ಮರಗಳು ಶಾಲಾ ಆವರಣಕ್ಕೆ ನೆರಳಾಗಿವೆ. ಶಾಲೆಯಲ್ಲಿ ಸುಸಜ್ಜಿತ ಎರಡು ಕಲಿಕಾ ಕೊಠಡಿಗಳು, ವಿಶೇಷ ಅಲಂಕೃತ ನಲಿ-ಕಲಿ ಕೊಠಡಿ, ಹೈಟೆಕ್ ಅಡುಗೆ ಕೋಣೆ, ಶೌಚಗೃಹ, ಮಳೆ ಕೊಯ್ಲು ಮತ್ತು ಶಾಲಾ ಕೈತೋಟವನ್ನು ವ್ಯವಸ್ಥೆ ಮಾಡಿಕೊಳ್ಳಲಾಗಿದೆ.
ಗಿಡಮರಗಳ ನಡುವೆ ದಾನಿಗಳ ನೆರವಿನಿಂದ ಮಹಾತ್ಮ ಗಾಂಧೀಜಿ ಪ್ರತಿಮೆ ಮತ್ತು ಗಣಪತಿ ಮಂಟಪವನ್ನೂ ನಿರ್ಮಿಸಲಾಗಿದೆ.
ಗುಣಾತ್ಮಕ ಶಿಕ್ಷಣಕ್ಕೆ ಒತ್ತು
ಪ್ರಸ್ತುತ 1ರಿಂದ 5ನೇ ತರಗತಿಯಲ್ಲಿ 20 ವಿದ್ಯಾರ್ಥಿಗಳು ಕಲಿಯುತ್ತಿದ್ದಾರೆ. ಮುಖ್ಯಶಿಕ್ಷಕ ರಂಗನಾಥ ಅವರು, "ಪ್ರಾಥಮಿಕ ಹಂತದಲ್ಲಿ ಮಕ್ಕಳಿಗೆ ವ್ಯಾಕರಣ ಸಹಿತ ಕನ್ನಡ ಭಾಷಾ ಜ್ಞಾನ ಕಲಿಸುವುದು ಮುಖ್ಯ. ಇದೇ ಶಾಲೆ ವಿದ್ಯಾರ್ಥಿನಿ ಸಿ.ಕೆ. ಅನುಷಾ ಕಳೆದ ಎಸ್ಎಸ್ಎಲ್ಸಿ ಪರೀಕ್ಷೆಯ ಕನ್ನಡ ವಿಷಯದಲ್ಲಿ 125ಕ್ಕೆ 125 ಅಂಕ ಪಡೆದು ಶಾಲೆಗೆ ಕೀರ್ತಿ ಹೆಚ್ಚಿಸಿದ್ದಾಳೆ" ಎಂದರು.
ಬೇಡಿಕೆಗಳು
ಶಾಲೆಗೆ ಮತ್ತೊಬ್ಬ ಶಿಕ್ಷಕರ ನೇಮಕ ಆಗಬೇಕು ಮತ್ತು ಶಾಲೆಯ ಒಂದು ಭಾಗದಲ್ಲಿ ತಡೆಗೋಡೆ ನಿರ್ಮಿಸಬೇಕು ಎಂದು ಶಾಲಾ ಸಮಿತಿ ಮಾಜಿ ಅಧ್ಯಕ್ಷ ಪುರುಷೋತ್ತಮರೆಡ್ಡಿ ಅವರು ಈ ವೇಳೆ ಒತ್ತಾಯಿಸಿದರು.
