ಶಿಕಾಗೋ ಇಂಟರ್​ನ್ಯಾಷನಲ್​ ಟೆರ್ರೈನ್ ಬಿನಾಲೆಗೆ 'ಯಕ್ಷ'

ಅಂತಾರಾಷ್ಟ್ರೀಯ ಕಾರ್ಯಕ್ರಮದ ನಿಮಿತ್ತ ಹಾವಂಜೆಯ ಭಾಸ ಗ್ಯಾಲರಿ ಮತ್ತು ಸ್ಟುಡಿಯೋದಲ್ಲಿ ಯಕ್ಷ ಕಲಾಕೃತಿಯ ಪ್ರದರ್ಶನ ನಡೆಯುತ್ತಿದೆ. ಅಮೆರಿಕ, ಡೆನ್ಮಾರ್ಕ್​, ಜರ್ಮನಿ, ಗ್ರೀಸ್​, ಇಟಲಿ ಸೇರಿದಂತೆ ವಿಶ್ವದ 60ಕ್ಕೂ ಹೆಚ್ಚು ಕಡೆಗಳಲ್ಲಿ 80ಕ್ಕೂ ಅಧಿಕ ಸಮಕಾಲೀನ ಕಲಾಕೃತಿಗಳು ಪ್ರದರ್ಶನಗೊಳ್ಳುತ್ತಿದೆ. ಭಾರತದ 10 ಕಡೆಗಳಲ್ಲಿನ ಕಲಾಕೃತಿಗಳು ಈ ಪ್ರದರ್ಶನಕ್ಕೆ ಆಯ್ಕೆಯಾಗಿವೆ ಎಂದು ಭಾರತದ ಕಲಾಪ್ರದರ್ಶನದ ಸಂಯೋಜಕಿ ಭಾಗ್ಯ ಅಜಯಕುಮಾರ್​ ತಿಳಿಸಿದ್ದಾರೆ.

ಹಾವಂಜೆಯಲ್ಲಿ ಪ್ರದರ್ಶನಗೊಳ್ಳುತ್ತಿರುವ ಯಕ್ಷ ಕಲಾಕೃತಿಯು ಗ್ರಾಮೀಣ ಬದುಕನ್ನು ದರ್ಶಿಸುವ ಮಿಶ್ರ ಮಾಧ್ಯಮದ ಕಲೆಯಾಗಿದೆ. ಯಕ್ಷ ಕಲಾವಿದನೋರ್ವನ ಬದುಕನ್ನು ಬಿಂಬಿಸಲಿದೆ. ನಿಜ ಜೀವನದ ಯಕ್ಷನನ್ನು ಬಿಂಬಿಸಿದ ಈ ಕಲಾಕೃತಿಯು ಕಾವಿ ಕಲೆಯ ಸಾಂಪ್ರದಾಯಿಕ ಸೊಗಡನ್ನು ಉಳಿಸಿಕೊಂಡಿದೆ. ಗದ್ದೆಯ ಮಣ್ಣಿನ ಜತೆಗೆ ಕೆಮ್ಮಣ್ಣು, ಸುಣ್ಣ ಹಾಗೂ ಕೆಲವು ಛಾಯಾಚಿತ್ರಗಳನ್ನೂ ಬಳಸಿಕೊಂಡು ಅದಕ್ಕೊಂದು ಸಮಕಾಲೀನ ಚೌಕಟ್ಟು ನಿರ್ಮಿಸಲಾಗಿದೆ. ಹಳ್ಳಿಗರ ದೈನಂದಿನ ಬದುಕಿನ ಚಿತ್ರಣ ಮತ್ತು ಯಕ್ಷರಂಗದ ವಿಜೃಂಭಣೆಯ ಅಂಶಗಳನ್ನು ದಾಖಲಿಸುವುದು ಈ ಯಕ್ಷ ಕಲಾಕೃತಿಯ ವಿಶೇಷತೆಯಾಗಿದೆ ಎಂದು ಕಾವಿ ಕಲಾವಿದ ಡಾ. ಜನಾರ್ದನ ಹಾವಂಜೆ ಮಾಹಿತಿ ನೀಡಿದ್ದಾರೆ.