ಎ.ಅಪ್ಪಾಜಿಗೌಡ, ಮುಳಬಾಗಿಲು
ಚೆಲುನಾಯಕನಹಳ್ಳಿ ಸರ್ಕಾರಿ ಕನ್ನಡ ಕಿರಿಯ ಪ್ರಾಥಮಿಕ ಶಾಲೆ ಶಿಥಿಲಾವಸ್ಥೆ ತಲುಪಿದ್ದು, ವಿದ್ಯಾರ್ಥಿಗಳು ಜೀವಭಯದಲ್ಲೇ ವ್ಯಾಸಂಗ ಮಾಡುವಂತಾಗಿದೆ. ಚೆಲುನಾಯಕನಹಳ್ಳಿ ಸರ್ಕಾರಿ ಕನ್ನಡ ಕಿರಿಯ ಪ್ರಾಥಮಿಕ ಶಾಲೆಯಲ್ಲಿ 1ರಿಂದ 5ನೇ ತರಗತಿ ಸೇರಿ ಒಟ್ಟು 14 ಮಕ್ಕಳು ವ್ಯಾಸಂಗ ಮಾಡುತ್ತಿದ್ದು, ಇಬ್ಬರು ಶಿಕ್ಷಕರು ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.
ಶಾಲೆಯಲ್ಲಿ ಒಂದೇ ಕೊಠಡಿ ಇದ್ದು, ಒಬ್ಬರು ಶಾಲೆಯ ಒಳಗಡೆ ತರಗತಿ ತೆಗೆದುಕೊಂಡರೆ, ಇನ್ನೊಬ್ಬರು ಶಾಲೆಯ ವರಾಂಡದಲ್ಲಿ ನೆಲದ ಮೇಲೆ ಕುಳಿತು ಪಾಠ ಮಾಡಬೇಕಾದ ಅನಿವಾರ್ಯತೆ ಇದೆ.
ಇರುವ ಒಂದು ಕೊಠಡಿಯೂ ಶಿಥಿಲಗೊಂಡಿದ್ದು, ಕಟ್ಟಡದ ಗೋಡೆ ಸೇರಿ ಮೇಲ್ಛಾವಣಿ ಕಿತ್ತುಬಿಳುತ್ತಿದೆ. ಮಕ್ಕಳು ಶಾಲೆಯಿಂದ ಮನೆಗೆ ಬಂದಾಗ ಅವರ ತಲೆಯಲ್ಲಿ ಸಿಮೆಂಟ್ ಧೂಳಿರುವುದೂ ಕಂಡು ಬರುತ್ತಿದೆ.
ಮಳೆಯಾದರಂತೂ ನೀರೆಲ್ಲ ಶಾಲೆ ಒಳಗೆ ನುಗುತ್ತದೆ. ಅಂದು ವಿದ್ಯಾರ್ಥಿಗಳಿಗೆ ರಜೆ. ಶಾಲೆ ಸುತ್ತಲೂ ನೀರು ನಿಲ್ಲುವುದರಿಂದ ದುರ್ನಾತದಲ್ಲೇ ಮಕ್ಕಳು ಪಾಠ ಕೇಳುವಂತಾಗಿದೆ. ಜಿಲ್ಲಾ, ತಾಲೂಕು ಮಟ್ಟದ ಅಧಿಕಾರಿಗಳು ಶಾಲೆಗೆ ಭೇಟಿ ನೀಡಿದರೂ ಶಾಲೆಯ ಮಾತ್ರ ಇನ್ನೂ ದುಸ್ಥಿತಿಯಲ್ಲೇ ಇರುವುದು ವಿಪರ್ಯಾಸ. ಶಾಲೆ ದುಸ್ಥಿತಿ ಬಗ್ಗೆ ಮುಖ್ಯಶಿಕ್ಷಕಿ ಪಿ.ಪಾರ್ವತಮ್ಮ, ಸಹ ಶಿಕ್ಷಕಿ ವಿಜಯಮ್ಮ ಅವರನ್ನು ಕೇಳಿದರೆ, ಅಧಿಕಾರಿಗಳು ಶಾಲೆಗೆ ಭೇಟಿ ನೀಡಿ ಪರಿಶೀಲಿಸಿದ್ದಾರೆ. ಆದರೆ ಇದುವರೆಗೂ ಕ್ರಮ ಕೈಗೊಂಡಿಲ್ಲ. ನಾವಾದರೂ ಏನು ಮಾಡಲು ಸಾಧ್ಯ? ಇರುವ ವ್ಯವಸ್ಥೆಯಲ್ಲಿಯೇ ಕಾರ್ಯನಿರ್ವಹಿಸುತ್ತಿದ್ದೇವೆ. ಇಲ್ಲಿ ಕೆಲಸ ಮಾಡಲು ಭಯ ಆಗುತ್ತಿದೆ. ಪಕ್ಕದಲ್ಲಿ ಸರ್ಕಾರಿ ಜಮೀನು ಇದೆ. ಅದನ್ನಾದರೂ ಮಂಜೂರು ಮಾಡಿಸಿದರೆ ಅನುಕೂಲವಾಗುತ್ತದೆ ಎನ್ನುತ್ತಾರೆ.
ಶಾಲೆಯ ಕೊಠಡಿ ಒಳಭಾಗದಲ್ಲೇ ಶೌಚಗೃಹವಿದ್ದು, ನೀರಿನ ಸಂಪರ್ಕವಿಲ್ಲದ ಕಾರಣ ಬಳಸಲು ಯೋಗ್ಯವಿಲ್ಲದ ಸ್ಥಿತಿ ತಲುಪಿದೆ. ಶಾಲೆಯ ಬಿಸಿ ಊಟಕ್ಕೂ ಶಾಲೆಗೆ ಮುಂಭಾಗದಲ್ಲಿನ ಸಿಮೆಂಟ್ ತೊಟ್ಟಿಯಲ್ಲಿಂದ ನೀರು ತೆಗೆದುಕೊಂಡು ತಯಾರು ಮಾಡಲಾಗುತ್ತಿದೆ.
